Niðurstöður úr Vegasvarpinu 2016 (yfir/undir)

Tweet

Í nýjasta þætti Hlaðvarps NBA Ísland fara þeir Baldur Beck og Gunnar Björn Helgason yfir það hversu getspakir þeir voru á gengi liðanna í NBA í deildarkeppninni sem er nýafstaðin.

Hér er um að ræða hitt árlega yfir/undir-hlaðvarp, þar sem þeir félagar tóku mið af spám veðbanka í Las Vegas yfir sigrafjölda allra liðanna í NBA og giskuðu á það hvort sigrar liðanna yrðu fleiri eða færri en Vegas spáði. Þetta var tekið ítarlega fyrir í þáttum 68 og 69 í haust.

Skemmst er frá því að segja að keppnin var æsispennandi þetta árið, en hún er auðvitað fyrst og fremst ástæða til að gera deildarkeppnina upp og skoða hvaða lið voru að standa sig og hver ekki.

Þið getið hlustað á nýjasta þáttinn í spilaranum hér fyrir neðan eða farið inn á hlaðvarpssíðuna og sótt hann þar á mp3 formi til að setja hann inn á t.d. símann ykkar eða mp3 spilarann. Ekki er ólíklegt að þessi nýjasti þáttur hlaðvarpsins verði sá síðasti með því sniði og tíðkast hefur til þessa, en það kemur væntanlega betur í ljós í næstu þáttum.

77. þáttur hlaðvarpsins er í boði ritstjórnar NBA Ísland og er því ókeypis, en ef þig langar að auglýsa hjá okkur, er þér velkomið að senda okkur línu á nbaisland@gmail.com og kanna málið. Njótið vel, kæru lesendur/hlustendur.

Popovich ræðir forsetakosningarnar

Tweet

Hugsandi fólk er enn í losti yfir því að bandaríska þjóðin hafi kosið sjálfsmiðaðan níðing og trúð til að taka við embætti forseta þar í landi. Þetta kemur körfubolta ekkert við, en körfuboltamenn og miðlar hafa séð ástæðu til að tjá sig um málið eftir niðurstöðu kosninganna í vikunni.

Þannig tóku Ernie Johnson og félagar í Inside the NBA á málinu. Shaq og Barkley voru dálítið hneykslaðir á niðurstöðunni en ætla að gefa forsetanum nýkjörna tækifæri til að sanna sig. Ernie Johnson bað Jesú Krist bókstaflega að hjálpa sér í beinni útsendingu TNT - hjálpa sér að vinna úr þessari niðurstöðu mála.

Það sem allir biðu hinsvegar eftir, var að heyra viðbrögð Gregg Popovich þjálfara San Antonio. Þeir vissu að þar gæti komið biti sem færi rakleitt í mest lesið. Og Pop olli ekki vonbrigðum frekar en venjulega. Hann lýsti yfir áhyggjum sínum og fordæmdi óábyrgar og níðskotnar yfirlýsingar forsetans í kosningabaráttunni, sem hann sagði að hefðu kostað hvaða barn sem er áralangt útgöngubann. Hann líkir Bandaríkjunum við Rómarveldi.

Fyrir þremur árum settum við fram tvíþætta spá. Fyrri hluti hennar spáði því að Trump yrði kjörinn forseti Bandaríkjanna. Fólk hló að okkur. Síðari hlutinn sagði að Trump yrði valdur að þriðju heimsstyrjöldinni í forsetaembættinu. Við vonum að fólk eigi líka eftir að hlæja að því.

Þegar Donald Trump er dauður.

Líklegt

Tweet

Golden State er endanlega búið að sanna sig

Tweet

Oft og títt í vetur hefur okkur orðið á að hugsa um hvað Golden State virkaði með sterkt lið - lið sem gæti jafnvel keppt til úrslita eða jafnvel unnið meistaratitilinn í sumar. Svona hugsanir eiga það til að fljóta með annað slagið þegar lið vinna 67 leiki í deildarkeppninni og virðast ekki þurfa að hafa neitt fyrir því.

En þetta voru bara hugsanir, pælingar, ekkert meira. Golden State átti svo sannarlega eftir að sanna marga hluti áður en við færum að tala um það sem alvöru meistaraefni, því það var jú ekki eins og liðið hafi verið að gera neina stórkostlega hluti í úrslitakeppninni til þessa.

Frá og með 108-95 sigri liðsins á Memphis í nótt verður hinsvegar risavaxin breyting á þessu. Núna er Golden State búið að stimpla sig inn sem alvöru meistaraefni.*

Í fyrsta lagi af því það er búið að sópa einvígi í fyrstu umferð, í öðru lagi af því það er búið að fá á kjaftinn en svara því óaðfinnanlega og í þriðja lagi af því það er einfaldlega er besta körfuboltalið í heimi í dag.

Liðið er búið að vera besta lið í heimi í allan vetur, en núna er það búið að sanna að það getur líka verið besta lið í heimi í úrslitakeppni. Það er nefnilega sá tími sem æði mörg lið sem byggja mikið upp á langskotum ungra manna eiga erfitt uppdráttar.

Það á ekki við hér.

Þriggja stiga skotin eru vissulega stór þáttur í sóknaraðgerðum Warriors og ein af helstu ástæðunum fyrir því að liðið er svona ógnarsterkt.

Hvernig í fjandanum eiga lið til dæmis að stöðva menn sem eru svo heitir að þeir þurfa ekki að fara yfir miðju til að hitta?

Nei, það er vörnin sem er aðalatriðið hjá Warriors. Meistarar síðustu áratuga í NBA deildinni hafa undantekningalítið verið á topp tíu í varnar- og sóknartölfræði fyrir lengra komna. Golden State er við toppinn í sóknarleiknum og er besta varnarliðið - það er meira að segja fjölhæfasta liðið líka.

Við þurfum alltaf að sjá lið fara í gegn um ákveðnar prófraunir áður en við krýnum þau kandídata og núna er Golden State búið að fara í gegn um það ritúal og meira til.

Þetta lið er bara best, alveg sama hvort þú ert tölfræðinörd eða pjúristi, óldskúl eða njúskúl.

Golden State verður meistari í júní og þarf ekki einu sinni að hafa mikið fyrir því, allra síst lokaeinvíginu sjálfu.

Okkur þykir leiðinlegt að koma fram með svona grófa spoilera strax áður en annari umferðinni lýkur, en þetta þarf bara að koma fram á prenti núna. Þið eruð nú ekki svo vitlaus að ykkur hafi ekki varið farið að gruna þetta.

Það eru í sjálfu sér engar staðreyndir í þessum stutta pistli, við vildum bara segja ykkur stuttlega frá því að Golden State vinni meistaratitilinn í ár af því að NBA Ísland er búið að samþykkja það. Við ætluðum að hafa þessa færslu rosalega langa og flotta með töflum, gröfum og græjum, en eins og þið sjáið er það algjör óþarfi. Meira að segja við getum ekki búið til langloku úr svona augljósum staðreyndum.

Nú skulið þið bara slaka á og njóta þess vel að horfa á Golden State vinna átta leiki í viðbót. Aðeins stórslys getur komið í veg fyrir það hér eftir. Þett´er bara búið.

---------------------------------------------------------------------------------------------------

* - NBA Ísland ber enga ábyrgð á jinxi af neinum toga, hvort sem það er viljandi eða óvart.

Veðurspá fyrir Austurdeildina

Tweet

Lesendur NBA Ísland geta alltaf treyst á að fá að vita með reglulegu millibili hvað klukkan slær í NBA. Eins og þið vitið flest, er narratífið fljótt að breytast í þessari dásamlegu deild. Stundum þarf ekki annað til en að einn eða tveir leikmenn verði fyrir því óláni að meiðast og þá getur allt farið upp í loft.

Við setjumst reglulega niður og skoðum stöðu mála í deildinni og reynum að veita ykkur yfirsýn á 30 liða deild þar sem fjöldi leikja fer fram á hverju kvöldi og fólk því fljótt að detta út úr taktinum. Við höfum kallað þetta vörutalningar. 

Nú ætlum við að henda í smá áramótapistil, en að þessu sinni er hann ekki aðeins ætlaður sem vörutalning og stöðutékk, heldur eru að verða til nokkrar áhugaverðar fléttur sem vert er að skoða nánar. Eitt það allra áhugaverðasta við NBA deildina - alveg eins og t.d. ensku úrvalsdeildina - er að taka eftir því og fylgjast með því þegar ný lið og nýir leikmenn ryðja sér til rúms í deildinni.

Fyrst beinum við sjónum okkar að Austurdeildinni og þróun mála þeim megin. Þar er að eiga sér stað merkileg þróun, þó megnið af liðunum þar sé í ruslflokki. Við botninn þar er New York, sem er búið að tapa 20 af 21 þegar hér er komið við sögu og er svo mikið drasl að stuðningsmenn þess eru farnir að þykjast vera Nets-aðdáendur.

Við erum reyndar búin að skrifa nóg um hamfarir Knicks og látum það því duga, þó það sé bíó út af fyrir sig að horfa á þetta lið tapa. 

Annað lið á botninum í austrinu er Detroit. Þið hafið heyrt okkur hrauna yfir þann ágæta klúbb með reglulegu millibili í vetur, en nú eru skondnir hlutir að gerast þar á bæ.

Þið munið að félagið borgaði Josh Smith fyrir að hætta að mæta í vinnuna um daginn. Þegar Smith fór til Houston, var Detroit búið að tapa fjórum leikjum í röð, sem var svo sem bara í ætt við annað hjá liðinu í vetur. 

Síðan Smith fór, hefur liðið hinsvegar snúið svona hressilega við blaðinu og er allt í einu búið að vinna fjóra leiki í röð - og það stórt. Detroit var 5-23 þegar Smith fór og var einn og hálfan mánuð að vinna fjóra leiki í upphafi leiktíðar (þó það væri 3-6 eftir fyrstu tvær vikurnar), en núna hefur það skyndilega unnið fjóra í röð á aðeins einni viku.

Þýðir þetta að Detroit sé allt í einu hætt að vera sorglegt körfuboltafélag? Nei, en það var kominn tími til að einhverjir af stuðningsmönnum Pistons hættu við að stökkva í sjóinn. Það er alveg hægt að búa til smá stemningu í kring um brotthvarf Josh Smith og ef stuðningsmönnunum leiðist, geta þeir líka horft á Houston-leiki sér til skemmtunar. 

Leiðindaspá NBA Ísland gekk eftir

Tweet

Eins og það er gaman að hafa rétt fyrir sér, vakti það enga gleði hjá okkur þegar spá okkar um afdrif miðherjans Anderson Varejao hjá Cleveland gekk eftir.

Í dag var tilkynnt að Brasilíumaðurinn hárprúði væri með slitna hásin og því úr leik með liðinu í vetur.

Nú þarf auðvitað engan Nostradamus til að spá því að Varejao eigi eftir að meiðast og það er að vissu leyti smáborgaralegt að vera að hreykja sér af því að hafa séð svona lagað fyrir. Það er ekki merkilegra fólk en þetta á ritstjórn NBA Ísland. 

Það eina sem kemur á óvart við þetta er að hann hafi spilað 26 leiki í vetur en ekki 25 eins og hefð hefur verið fyrir hjá honum undanfarin ár. 

Það er með hreinum ólíkindum hvað þessi drengur er búinn að vera endalaust óheppinn með meiðsli á ferlinum, ekki síst nú á síðari árum Hérna fyrir neðan sjáið þið að við höfðum aldrei neinar vonir um að Varejao ætti eftir að spila allt tímabilið með Cleveland. Hér er brot úr vörutalningu okkar þann 12. desember síðastliðinn.

NBA Ísland spáir í spilin fyrir veturinn

Tweet

Það er orðinn næstum því mánuður síðan við spáðum í spilin fyrir veturinn í Austurdeildinni. Liðin þeim megin gerðu sig flest að fíflum síðasta vetur af því þau voru svo óguðlega léleg, en sum þeirra virtust ætla að reyna að gera eitthvað í því í sumar.

Nokkur spennandi félagaskipti gerðu það að verkum að kannski yrði breyting til batnaðar hjá einhverjum klúbbunum eystra. Efst á blaði þar var auðvitað Cleveland, sem endurheimti Týnda Soninn og bætti við sig Ástþóri og nokkrum eldri borgurum.

Við vorum ekkert að stressa okkur á að taka stöðuna í Vesturdeildinni af því liðin þeim megin voru miklu rólegri á leikmannamörkuðum í sumar og mæta flest svipað mönnuð til leiks í haust og á síðustu leiktíð. Það þýðir þó ekki að við setjum þau í umfjöllunarbann.

Landslagið í NBA er sífellt að taka einhverjum breytingum og hérna fyrir neðan ætlum við að skoða liðin í Vesturdeildinni og athuga hvort þau koma með nýjar áherslur, vonir eða væntingar inn í tímabilið sem hefst eftir nokkra daga. Taflan hérna fyrir ofan er veðurspáin sem við gerðum fyrir mánuði síðan, þar sem við tippuðum á hvort liðin myndu bæta við sig, standa í stað eða jafnvel bæta sig í vetur. Það verður gaman að hlæja að því hvað þetta kemur illa út í vor, enda er þetta nákvæmlega til þess -- að hafa gaman af því.

DALLAS MAVERICKS

Eins og þið sjáið á töflunni, tippum við á að Dallas muni bæta við sig á komandi vetri og eftir þeirri spá sjáum við því fyrir okkur að liðið vinni amk fimmtíu leiki.

Þessi bjartsýni stafar að hluta til vegna þess hvað liðið stóð sig vonum framar í úrslitakeppninni í vor, þar sem það var liðið sem veitti meisturum San Antonio hvað verðugasta samkeppni.

Nokkrar mannabreytingar hafa orðið hjá Dallas. Þeir Vince Carter (Memphis), DeJuan Blair (Washington), Jose Calderon (New York), Samuel Dalembert (New York) og Shawn Marion (Cleveland) eru allir horfnir á braut.


Í staðinn eru komnir menn eins og Jameer Nelson (Orlando), Raymond Felton (Latibær), Chandler Parsons (Houston), Al-Farouq Aminu (New Orleans), Richard Jefferson (Utah), Charlie Villanueva (Detroit) og sjálfur Tyson Chandler (New York) er mættur aftur til liðsins sem hann varð meistari með árið 2011.

Þetta eru satt best að segja helvíti miklar mannabreytingar og ef við eigum að segja alveg eins og er, líst okkur nákvæmlega ekkert á sumar þeirra.

Flestir af þessum nýju mönnum hjá Mavericks kunna jú körfubolta, en sumir þeirra hafa gert minna af því að spila körfubolta undanfarin ár.

Hafa gert meira af því að éta kleinuhringi og athuga hvað væri líffræðilega hægt að troða hausnum langt upp í ristilinn á sjálfum sér (við höfum ekki rekist á neinar opinberar mælingar ennþá, en þær hljóta að vera til). Þegar allt er talið er það fyrst og fremst trú okkar á Rick Carlisle þjálfara og Dirk Nowitzki sem stýrir allri þessari bjartsýni á gengi Dallas.

Chandler Parsons ætti að hjálpa liðinu, þó þjálfarinn hans hafi lýst því yfir opinberlega að hann sé með bumbu og þá verður allt annað líf fyrir liðið að fá Tyson Chandler aftur inn í miðjuna til að binda saman vörnina, þó hann sé orðinn ansi fullorðinn.

Undir/yfir töflurnar

Tweet

Þeir sem eiga eftir að heyra undir/yfir hlaðvörpin tvö geta heyrt þau með því að fara inn á þar til gerða síðu.  Um er að ræða þætti 30 og 31 í röðinni.

Þar spáðu þeir Baldur Beck og Gunnar Björn Helgason í spilin fyrir komandi leiktíð og "tippuðu" undir eða yfir á spár spilafíklanna í Las Vegas. 

Þetta er ljómandi góð leið til að gera sig að fífli eins og þið sjáið, því aðeins tveimur dögum eða svo eftir að bæði Baldur og Gunnar sögðu "yfir" á 57,5 sigra hjá Oklahoma, bárust þær fréttir að Kevin Durant myndi líklega ekki verða með Oklahoma City fyrstu vikurnar á tímabilinu vegna meiðsla. 

Þar með erum við ekki að segja að Oklahoma geti ekki unnið 58 leiki í vetur, það getur sko meira en verið þó Durant missi úr nokkra leiki. Þetta er bara dálítið dæmigert.

Við ákváðum að birta spár þeirra félaga hérna svo þið getið séð hvað þeir eru vitlausir þegar tímabilinu lýkur næsta vor. Þá þurfið þið ekki að hlusta á bæði hlaðvörpin aftur - þá er nóg að draga fram þessa töflu. 

Svo getið þið auðvitað gert ykkar eigin spá og séð hvernig ykkur tekst til í spámennskunni. Þeir Vegas-menn ná oft að vera glettilega nálægt þessu.

NBA Ísland spáir í spilin fyrir veturinn

Tweet

Það sem átti að verða stutt og létt upphitun fyrir komandi tímabil í NBA deildinni varð auðvitað eitthvað allt annað og miklu meira eins og svo oft hjá okkur.

En við hugsuðum með okkur að það væri nú ekki andskoti mikið NBA-tengt að lesa fyrir aumingja lesendur okkar þessa dagana, svo þeir hefðu kannski bara gaman af því að stauta sig í gegn um hátt í 5000 orða hlemm.

Það sem fylgir hér á eftir er smá hugleiðing um hvers er að vænta frá liðunum í Austurdeildinni næsta vetur, þó þessi pæling sé náttúrulega allt of snemma á ferðinni. Hér er á ferðinni rakalaust blaður út í loftið eins og venjulega þegar ritstjórn þessa miðils tekur sig til.

Ætla mætti að við þyrftum að skrifa annað eins um Vesturdeildina næst - og við gerum það nú væntanlega einn daginn - en þar hefur sumarið verið áberandi rólegra en í austrinu, svo það eru litlar líkur á því að þú verðir í þrjár vikur að lesa þá pælingu eins og þessa.

En nú er best að halda kjafti og leyfa ykkur að lesa þetta í friði. Vesgú, elskurnar.

ATLANTA HAWKS

Atlanta hefði með öllu átt að vera stór "player" á leikmannamarkaðnum í sumar, en sumir hlutir breytast seint og svo virðist sem atvinnumenn í körfubolta kjósi heldur að spila á Svalbarða en í Atlanta. Það er rétt að þeir stuðningsmenn sem á annað borð mæta á leiki hjá Hawks eru með frekar lágan blóðþrýsting, en það verður samt að segjast eins og er að það er fáránlegt að félag með svona efnilegt lið skuli ekki geta fengið til sín leikmenn.

Lið Hawks var ágætis Öskubuskuævintýri á síðustu leiktíð þegar það var í raun klaufi að slá Indiana ekki úr leik í fyrstu umferðinni eftir að hafa komist í 3-2 með sjötta leikinn á heimavelli. Eins og flestir vita var Atlanta þarna án síns besta leikmanns, Al Horford, og því búast flestir við að liðið taki skref fram á við í vor - jafnvel þó það verði ekki stórt. 

NBA Ísland skyggnist inn í framtíðina

Tweet

Fólk er hlaupandi um göturnar nakið, skrækjandi út i loftið eins og villidýr af því það botnar ekkert í því hvað er að gerast í Austurdeildinni núna. Derrick Rose er loksins byrjaður að spila körfubolta, Paul George er fótbrotinn, LeBron James er að skipta um lið og Kevin Love ætlar að elta hann. Er það von að fólk sé að missa vitið.

Við hér á NBA Ísland verðum að koma til móts við þetta fólk og veita því andlegan stuðning. Leiða það út úr völundarhúsi Austurdeildarinnar sem enn er eitt stórt drullusvað þó sólin sé að brjótast í gegn um skýin. Ja, þó það nú væri.

Mörg ykkar kannast við ESPN-pennan Marc Stein sem skrifað hefur um deildina okkar fögru frá aldamótum. Einn af föstum liðum hjá honum er að halda FIFA-lista NBA deildarinnar þar sem hann metur styrkleika liðanna í deildinni bæði með fræðilegum og huglægum hætti.

Í lok síðustu leiktíðar voru aðeins tvö Austurdeildarlið á topp tíu á FIFA-lista Marc Stein - Miami og Indiana - en nú er útlit fyrir að þau falli bæði af topp tíu listanum og tvö ný komi inn í staðinn.

Ekki er útlit fyrir að verði stórar breytingar á valdajafnvæginu í Vesturdeildinni næsta vetur og því má áfram reikna með að megnið af liðunum þar verði ógnarsterk áfram.

Nokkrar breytingar verða hinsvegar í Austurdeildinni. Hún var mjög "top heavy" á síðustu leiktíð eins og sagt er. Þá erum við að meina að það var nokkuð ljóst allan veturinn að tvö lið yrðu langbest og það stóðst nokkurn veginn. Miami og Indiana voru langefst lengst af og mættust að lokum í úrslitaeinvígi Austurdeildarinnar alveg eins og árið á undan.

Annað verður uppi á teningnum í vetur. Miami er búið að bæta við sig nokkrum sæmilegum körfuboltamönnum, en það missti besta körfuboltamann í heimi og hrapar fyrir vikið af toppi austursins.

Indiana lét Lance Stephenson fara til Charlotte og Paul George meiddist illa á dögunum, sem þýðir að öll spilamennska Pacers riðlast og versnar til mikilla muna.

Margir hafa meira að segja lýst því yfir að liðið komist ekki einu sinni í úrslitakeppnina. Við vitum ekkert um það, en við vitum að ykkur er alveg óhætt að setja Indiana ofan í kassa sem kandídat í stóra hluti í að minnsta kosti eitt ár.

Þá komum við að liðunum tveimur sem ætla að koma í staðinn.

Það eru Chicago og Cleveland - liðin sem voru við og á toppnum hérna fyrir nokkrum árum en eru nú komin aftur í baráttuna mikið til af því þau eru að endurheimta sitt hvora stórstjörnuna. Mennina sem voru handhafar MVP-styttunar eftirsóttu allar götur frá 2009 til 2013 - Derrick Rose og LeBron James. Og þeir taka með sér nokkra góða körfuboltamenn, svo það er morgunljóst að það verða breytingar á toppnum í austrinu í vetur og vor.

Það er galið að spá því í ágúst hvernig staðan verður í NBA í vor, en eins og staðan er núna, hallast flestir að því að það verði Chicago sem verði besta liðið í Austurdeildinni í vetur. Margir af þessum flestum spá því meira að segja að Bulls eigi eftir að stinga af fljótlega.

Þetta eru skiljanlegar pælingar. Það hefur sýnt sig að Derrick Rose er það góður leikmaður að hann fer með Chicago-liðið frá því að vera gott lið yfir í að vera meistarakandídat.  Og nú ku pilturinn vera endanlega kominn til baka eftir þessa löngu og ógeðslegu baráttu sína við meiðsladrauginn.

Ká þjálfari, landsliðsþjálfari Bandaríkjanna í körfubolta, hefur gefið það út að Rose sé kominn á sama stig sem leikmaður og hann var á þegar hann var upp á sitt besta. Þá fékk hann styttu að launum fyrir leik sinn og leiddi Chicago til 60+ sigra. Núna er hann með talsvert betri meðreiðarsveina, á pappírunum í það minnsta.

Meiðslahrúgaldið Chicago komst í úrslitakeppnina í fyrra af vanefnum, en ef liðið fær nú til liðs við sig heilan Derrick Rose, heilan Pau Gasol, x-faktórinn Nikola Mirotic og skotóðan Doug McDermott, er ekki skrítið að sumir sjái fyrir sér að þetta lið eigi eftir að stinga af í vetur (jafnvel þó það missi Carlos Boozer!).

Hástökkvari vikunnar verður svo auðvitað Cleveland. Lið eiga það til að hækka aðeins í áliti hjá mönnum við það að fá til sín tvo af bestu körfuboltamönnum í heimi og þannig er það hjá Cavaliers núna.

Cleveland minnir okkur dálítið á Íslending sem tók 100% gengislán til að kaupa sér allt of dýran bíl en sleppur með skrekkinn, á meðan þeir sem söfnuðu sér fyrir fjárfestingum sínum sáu peningana sína gufa upp.

Cleveland er búið að vera í því að drulla á sig alveg síðan löngu áður en LeBron James fór þaðan í burtu árið 2010, en eina refsingin sem félagið hefur fengið fyrir alla þessa drullu er að fá alltaf fyrsta valréttinn í nýliðavalinu. Svona eins og bara til að leyfa því að halda áfram að drulla og drulla enn meira - drulla jafnvel á aðra. Stundum er lífið bara bæði samhengislaust og óréttlátt.

Lið Cavaliers verður fjarri því fullkomið þó það verði með þrjá af besti leikmönnum deildarinnar hver í sinni stöðu í þeim LeBron James, Kyrie Irving og Kevin Love. Þú ættir að geta unnið 50+ leiki í Austurdeildinni með þessa þrjá í byrjunarliðinu jafnvel þó Ingvi Hrafn og Jónína Ben fylli stöðu miðherja og skotbakvarðar.

Þessir þrír kappar geta skorað 30 stig í svefni, en það verður varnarleikurinn og almennur andi og taktur í liði Cleveland sem ráða því hve langt liðið fer næsta vor.

Það er fátt um fína drætti í miðherjastöðunni hjá Cavs og þó liðið sé komið með reynsluhunda eins og Mike Miller og James Jones (og jafnvel Shawn Marion og Ray Allen síðar) á bekkinn, hafa piltar eins og Dion Waiters og Kyrie Irving ekki unnið svo mikið sem fimmtíukall á Happaþrennu, hvað þá mikilvæga körfuboltaleiki.

Það ætti að verða styrkur fyrir Cleveland að hafa landað David Blatt þjálfara, en þó hann sé með flotta ferilskrá í Evrópu, á hann enn eftir að sanna sig í NBA.

Líklega má í fljótu bragði reikna með því að lélegu liðin í Austurdeildinni haldi áfram að vera lélegu liðin í Austurdeildinni. Miðjupakkinn hinsvegar - liðin sem skriðu í úrslitakeppnina - ættu að geta bætt aðeins við sig.

Þetta eru Toronto, Washington, Charlotte og Atlanta. Þessi fjögur eru sumpart keyrð áfram af ungum mönnum sem ættu að verða betri í vetur og svo eru þau að bæta aðeins við sig mannskap líka. Mest munar þar líklega um það að Charlotte fær til sín Lance Stephenson frá Indiana og Atlanta endurheimtir Al Horford - a.m.k. þangað til hann meiðist aftur og verður aftur frá það sem eftir lifir leiktíðar.

Það er ekki víst að Indiana verði nógu gott til að hanga í þessum svokallaða miðjupakka í austrinu, en það er mjög líklegt að Miami verði á þessum slóðum.

Sem sagt: ef við skjótum út í loftið á það í ágúst hvernig Austurdeildin á eftir að líta út í vetur, gætum við tippað á að Chicago yrði með besta liðið, Cleveland kæmi þar á eftir og svo einhver súpa af Miami, Toronto, Washington, Charlotte og jafnvel Brooklyn.

Restin af liðunum í austrinu ættu ekki að verða merkileg í vetur, en það þarf þó alls ekki að þýða að verði eitthvað leiðinlegt að horfa á þau spila körfubolta.

Þannig eru mjög spennandi nýliðar í liðum eins og Milwaukee, Boston, Philadelphia og Orlando svo eitthvað sé nefnt, svo þetta verður ekki allskostar ömurlegt. Að minnsta kosti aldrei eins og á síðustu leiktíð, þegar Austurdeildin setti vetrarbrautarmet í langskitu án atrennu.

Austurdeildarleikirnir voru margir svo lélegir á síðustu leiktíð að það var farið að hafa áhrif langt út fyrir körfuboltavöllinn. Leikur New York og Detroit í byrjun mars var til dæmis svo lélegur að vörubíll í úthverfi í Lansing í Michigan skautaði út af veginum og keyrði í gegn um hárgreiðslustofu og hænsnabú áður en hann endaði ónýtur á toppnum úti á túni.

Þetta var ekkert grín þarna í austrinu á síðustu leiktíð, en þetta lítur allt miklu betur út í ár. Þér er óhætt að treysta því þegar meira að segja neikvæðnihundar og vestansleikjur eins og við segjum þér það.

Svona var sumarið 2014: LeBron James

Tweet

Lætin í kring um leikmannamarkaðinn, nýliðavalið og sumardeildirnar í Orlando og Las Vegas eru orðin svo mikil að segja má að NBA-pennar vestra fái sama og ekkert sumarfrí. Bættu svo við það HM í körfubolta og þá er sumarið orðið ansi stutt hjá þeim sem vinna t.d. við það að fjalla um NBA á einn eða annan hátt.

Ekkert að því.

Við sögðum ykkur eftir að lokaúrslitaeinvíginu lauk að við ætluðum ekki að taka okkur langt sumarfrí og við ætlum að reyna að standa við það. Auðvitað er andinn á ritstjórninni ekki eins frjór á sumrin og hann er yfir veturinn, en eins og við sögðum áðan, hefur ekki verið nein lognmolla í NBA deildnni í sumar.

Nostradamus

Tweet

Þú segir nokkuð, Patrekur

Tweet

Margir velta því fyrir sér af hverju Patrick Ewing hefur enn ekki fengið tækifæri sem aðalþjálfari í NBA deildinni. Það sem stendur hérna fyrir neðan gæti hjálpað til við að útskýra það.

Before the (Tracy McGrady) trade, (Jeff) Van Gundy asked assistant coach (Patrick) Ewing for his opinion of T-Mac. Ewing assured him that McGrady had the character and leadership skills to build around, insight the future Hall of Famer gained while playing alongside McGrady in 2001-02.
- Eric Palmer, ESPN 2010

Einmitt.

Þetta gat aðeins farið á einn veg

Tweet

San Antonio hefur náð 3-2 forystu í úrslitaeinvíginu um NBA meistaratitilinn eftir magnaðan 114-104 sigur á Miami í fimmta leik liðanna í Texas í nótt. Ef ekki væri fyrir NBA Ísland og jinxkrafta ritstjórnarinnar, væri San Antonio undir 3-2 og horfði fram á að þurfa að vinna tvo leiki í röð í Miami.

Auðvitað var pistillinn sem við skrifuðum í gær ekkert annað en vandlega staðsettur þráður í vef örlaganna. San Antonio átti ekki möguleika í fimmta leiknum nema við tækjum okkur til og reverse-jinxuðum x-faktórinn í einvíginu til andskotans.

Við urðum að gæta þess að tilætlanir okkar væru ekki of augljósar og því varð pistillinn að vera sannfærandi. Við urðum að keyra Manu Ginobili í kaf til að gefa örlögunum start og það tókst - með látum.

Við meintum hvert orð sem við sögðum í pistlinum í gær og stöndum við það. Ginobili er ekki sami maður og hann var.

Góður lesandi orðaði það best þegar hann sagði að Manu gæti í besta falli haft áhrif á einstaka leik, en ekki heilu einvígin eins og hann gat áður.

Einhver varð að kasta grjóti í örlögin og við tókum þetta á okkur til að fá sem flesta leiki í einvígið. San Antonio þurfti á hjálp að halda - og þá sérstaklega argentínski vinur okkar.

Það var ekkert, Manu. Nú verður þú hinsvegar að sjá um restina af þessu, við höfum séð um okkar part.

Rödd Charles Barkley ómar í höfðinu á okkur:

"GINOBILIIIIIIIIIII!!!"

Þið megið hlæja að okkur alveg fram á næsta tímabil. Okkur er sama. Þetta dásamlega úrslitaeinvígi verður langt og skemmtilegt og Manu lifir - í versta falli í nokkra daga í viðbót.

Við höfum aldrei gefið okkur úr fyrir að hafa vit á körfubolta, en við getum jinxað hitabylgju yfir Norðurpólinn ef við vöndum okkur.

Og vakið körfuboltamenn upp frá dauðum, greinilega.

En Manu okkar á ekki allan heiðurinn.

Þrátt fyrir að San Antonio hafi á köflum leikið frábæran bolta í fimmta leiknum í nótt, var með ólíkindum hvað Miami var fljótt að keyra inn í leikinn aftur með snörpum áhlaupum sem komu oftast algjörlega upp úr þurru.

Leikmenn Spurs gerðu sig hvað eftir annað seka um einbeitingarleysi og klaufamistök og það er bara dauðasök á móti sterku liði eins og Miami.

Þú tekur tvö illa ígrunduð skot og missir tvo bolta - og allt í einu er Miami búið að taka 11-0 sprett á þig á rúmri mínútu. Það er með ólíkindum.

Þegar þetta er ritað er eflaust verið að lyfjaprófa Danny Green hjá San Antonio. Það nær ekki nokkurri átt hvað drengurinn er að hitta vel.

Green er búinn að skora 90 stig í lokaúrslitunum og skora 25 þrista, en það er meira en hann gerði
í deildakeppninni samanlagt bæði 2010 og 2011.

Hann nýtir 66% þrista sinna í lokaúrslitunum og er búinn að slá met Ray Allen yfir flesta skoraða þrista á stóra sviðinu.

Tony Parker gerði líka sitt þó hann væri augljóslega ekki á fullu gasi. Segir sína sögu um það hvað hann er góður og hvað við leggjum mikið á herðar hans að hann skuli skila 24 stigum (10-14 í skotum) á felgunni vegna meiðsla í læri.

Það getur vel verið að Miami hafi tapað þessum leik og hvað eftir annað lent um 20 stigum undir í þessum leik, en við höfðum það á tilfinningunni að liðið væri aldrei mjög langt undan.

Við fengum samt ekki þessa ofurframmistöðu frá Sólstrandargæjunum og við fengum í leik fjögur.

Okkur grunaði það svo sem, en það var ekki mikið út á frammistöðu þeirra að setja. Stjörnurnar voru að hver um sig að skila ágætisleikjum heilt yfir.

Enn eina ferðina hefur orðið viðsnúningur í þessu einvígi. Enn og aftur er San Antonio komið yfir eftir að hafa verið komið langt undir á stigum og útlitið verið farið að dökkna.

Það lítur ekkert illa út fyrir svona rútínerað lið eins og San Antonio að þurfa bara að vinna einn af næstu tveimur leikjum sínum til að landa titlinum enn eina ferðina - jafnvel þó það þurfi að gerast á útivelli.

En Miami á að sjálfsögðu eftir að líða betur á heimavelli sínum og þið vitið hvað gerist alltaf þegar Miami tapar - það kemur öskrandi í næsta leik.

Ef næsti leikur verður þannig eitthvað í takt við annað í þessu einvígi, vinnur Miami auðveldan stórsigur í næsta leik og við fáum hreinan úrslitaleik á fimmtudaginn.

Það yrði nú ekki leiðinlegt.

Við skulum samt ekki fara fram úr okkur. Draumar okkar allra sem erum hlutlaus í þessu rættust með sigri Manu og félaga í nótt.  Fjörið heldur áfram og við eigum dásamlega leiki í vændum, jafnvel þó hlegið verði að sumum okkar - gangandi um með ullarsokka í kjaftinum.

Það er ekki nema ánægjulegur fórnkostnaður fyrir svona veislu. Amen.

Fara stórveldin snemma í sumarfrí?

Tweet

Sum okkar hafa svo gaman af því að láta söguna tala fyrir sig.

Ef spár svartsýnustu manna í vetur verða að veruleika, sitja bæði gömlu stórveldin Lakers og Celtics eftir með sárt ennið og komast ekki í úrslitakeppnina.

Í ljósi þess hvernig spilamennsku þau hafa boðið upp á að undanförnu er þessi möguleiki sannarlega til staðar.

Hugsið ykkur, ef svo færi, yrði það aðeins í annað sinn frá því NBA deildin var sett á laggirnar árið 1946 sem bæði þessi lið færu snemma í sumarfrí.

Það segir sína sögu um óhemju velgengni Lakers og Celtics að þetta hafi aðeins gerst einu sinni, en liðin tvö hafa auðvitað unnið um helming allra meistaratitla frá stofnun deildarinnar. Það var leiktíðina 1993-94 sem þessi sérstaki atburður átti sér stað, en þá voru bæði félögin að ganga í gegn um miklar breytingar.

Það tók Lakers ekki langan tíma að koma sér á toppinn aftur og aðeins sex árum síðar var liðið orðið NBA meistari. Það tók Celtics að vísu lengri tíma, en liðinu tókst á endanum að ná sér í titil árið 2008 eins og þið munið. Lakers hefur svo bara bætt í og unnið fimm titla síðan um aldamótin.

Með þessari pælingu erum við alls ekki að segja að Celtics og Lakers missi af úrslitakeppninni, enda yrði hún klárlega fátæklegri án stórveldanna. Við skulum bara segja að við séum að reyna að bakk-jinxa liðin inn í úrslitakeppnina.

Við létum fylgja með tvær skemmtilegar myndir. Önnur er liðsmyndin af Lakers frá umræddu ´93-´94 tímabilinu og hin sýnir nokkur andlit úr liði Celtics, reyndar frá leiktíðinni á eftir, 1994-´95.

Eins og þið sjáið eru þetta nú ekki beint gullaldarárin hjá risunum tveimur, þó vissulega megi skemmtilega leikmenn inn á milli í hóp beggja liða (eins og til dæmis leikmann í treyju númer níu hjá Lakers - lengst til vinstri í fremri röð).

Kisurnar og Clippers með andstæðar rispur:

Tweet

Mánudagurinn 26. nóvember sl. var nokkuð merkilegur dagur á NBA almanakinu okkar í ár. Þá áttu sér stað tveir tapleikir sem mörkuðu upphafið að miklum rispum í sitt hvora áttina.

Þessi lélega afsökun af körfuboltaliði sem kölluð er Charlotte Bobcats tapaði þetta kvöld hrottalega fyrir Oklahoma City 114-69 og lauk þar hreinlega keppni á tímabilinu, sem hafði byrjað svo efnilega.

Eins og frægt er orðið  vann Charlotte aðeins sjö leiki alla leiktíðina í fyrra og skilaði lélegasta vinningshlutfalli í sögu NBA deildarinnar.

Kisurnar byrjuðu ótrúlegt nokk 7-5 í haust og gott ef okkur varð ekki á að hrósa liðinu fyrir að jafna sigrafjölda síðustu leiktíðar strax í nóvember.  Síðan þetta var hefur beinlínis verið drulluslóð á eftir Charlotte, sem gæti allt eins verið með Sigga Storm og Axl Rose í byrjunarliði sínu.

Eins og þeir vita sem fylgjast með NBA, hefur Charlotte nú tapað 18 leikjum í röð frá 26. nóvember.

Á hinum endanum á spektrúminu er það Los Angeles Clippers sem brillerar sem aldrei fyrr.

Clippers hefur nefnilega ekki tapað leik síðan á umræddu mánudagskvöldi og hefur síðan unnið hvorki meira né minna en 16 leiki í röð, sem er löngu orðið félagsmet og meira til.

Það var nú ekki merkilegra lið en New Orleans Hornets sem var síðasta liðið til að leggja Clippers að velli, en Chris Paul og félagar töpuðu reyndar fjórum leikjum í röð áður en þeir fóru á þessa svakalegu rispu sem þeir eru á núna.

Ef allt væri eðlilegt myndi þessi pistill sem við skrifum um sigurgöngu Clippers nægja til að jinxa liðið í 87 stiga tap í næsta leik, en þannig vill til að andstæðingur liðsins í kvöld á álíka gengi að fagna og Aston Villa um þessar mundir svo við höfum engar áhyggjur af jinxi.

Sextándi sigurinn í röð hjá Clippers kom gegn Jazz á útivelli í fyrrakvöld og það eftir að gestirnir höfðu lent 19 stigum undir í þriðja leikhluta. Sautjándi sigurinn í röð kemur einnig gegn leikstjórnandalausu Jazz-liði í Los Angeles í kvöld.

Fyrrum Clippers-maðurinn Mo Williams er frá vegna meiðsla hjá Jazz og er hans vægast sagt saknað. Mennirnir sem sjá um að fylla skarð hans, Jamaal Tinsley og Earl Watson eru samtals 1 af 8 í skotum með 12 stoðsendingar og 13 tapaða bolta í síðustu tveimur leikjum. Væri gaman að sjá hvort Ingvi Hrafn Jónsson næði að skila betra framlagi. Þessir snáðar gætu ekki hitt úr skoti þó þeir sætu uppi á spjaldinu og andstæðingum þeirra á ekki eftir að leiðast neitt sérstaklega í svæðinu ef þeir kveikja þá á því að spila það gegn Jazz til að eiga náðugt kvöld.

Sigurganga Clippers er orðin svo löng að það hefur unnið Jazz tvisvar á útivelli meðan á henni stendur. Liðið hefur reyndar unnið þrjá útileiki í röð gegn Jazz og það hefur ekki gerst í rúm 30 ár eða síðan Clippers spilaði í San Diego. Til gamans má geta þess að Joe "Jellybean" Bryant, pabbi hans Kobe Bryant, var í liði Clippers á þessum tíma.

Clippers er aðeins 23. liðið í sögu NBA sem nær að vinna 16 leiki í röð, svona til að gefa ykkur mynd af því hve mögnuð þessi sigurganga er nú.

Það var að sjálfssögðu Chris Paul sem lokaði leiknum þegar Clippers lenti í þessum vandræðum gegn Jazz í fyrrinótt og olli mestum skaða á vítalínunni, því hann lenti merkilegt nokk í vandræðum þegar hann vær í gæslu Gordon "Ásmundar" Hayward og skaut aðeins 1-6 gegn honum í fjórða leikhlutanum.

Það gefur ágæta mynd af því hvað Clippers er búið að vera að strauja andstæðinga sína í vetur að fyrir þennan hetjuskap Chris Paul gegn Jazz í fyrrakvöld hafði hann ekki komið við sögu í nema 21 af 29 síðustu 4. leikhlutum hjá liðinu. Í þessum tilvikum hefur hann setið rólegur á bekknum og fylgst með varamönnum klára leiki þar sem úrslitin hafa verið ráðin.

Fyrir leikinn í fyrrakvöld, hafði Clippers verið 15+ stigum yfir í 17% af spiluðum leikmínútum liðsins. Það er með hreinum ólíkindum. Þetta lið er svo sterkt að það lætur Jamal Crawford líta vel út, en það hefur verið í plús hverja einustu mínútu sem hann hefur spilað á sigurgöngunni.  Meira að segja Willie Green er að skila framlagi með 42% þriggja stiga nýtingu.

Þegar lið taka rispur eins og Clippers er eðlilegt að menn fari að spyrja sig hvort þeir eigi að taka þau alvarlega og kalla þau meistaraefni. Það er kannski dálítið snemmt að fara að pæla í því, en það má alveg skjóta í stutt krossapróf og athuga hvort Clippers hefur þessa helstu fídusa sem meistaralið þarf að hafa.

Ef lið ætla að verða meistarar þurfa þau meðal annars að spila úrvalsvörn, vera með sýstem, frákasta vel, karakter og mannskap sem kaupir konseptið, hafa neyðarkall, góðan bekk, rulluspilara og góðan þjálfara

Clippers getur krossað í alla reiti þarna nema kannski fráköstin og þjálfarann. Gárungarnir segja að styrkur Vinny Del Negro sem þjálfara sé að vera ekki að skipta sér að því hvað Chris Paul er að gera með liðið.

Það verður gríðarlega áhugavert að fylgjast með þessu Clippers-liði fram á vorið og sjá hvað í því býr. Það er ljóst að það vantar ekki mikið upp á að þessi gamli brandari NBA deildarinnar sem Clippers-liðið er, geti gert alvöru atlögu að meistaratitli.

Þetta eru Lakers

Tweet

Öll vorum við einu sinni ung. Það voru þeir líka, piltarnir sem draga munu vagninn hjá Lakers í vetur. Sjáðu þessa snáða. Ekki grunaði þá þarna að árið 2012 ættu þeir eftir að mynda ofurlið hjá Los Angeles Lakers. Reyndar gæti Kobe Bryant hafa grunað það þó hann hafi verið með þessa húfu á höfðinu.

Hvað ætli Magic Johnson hefði sagt ef þú hefðir farið til hans árið 1988 og sagt honum að meistaravonir liðsins sem hann var að stjórna, ættu eftir 25 ár eftir að liggja á herðum lítils, horaðs Kanadamanns sem kynni ekki að greiða sér og héldi með Tottenham.

"Totten-hvað? Blámaður, vinsamlegast!"

Jazzað aðeins til

Tweet

Utah Jazz átti mjög dæmigert sumar. Bætti við sig nokkrum leikmönnum og losaði sig við nokkra. Engin af þessum leikmannaskiptum vöktu athygli frekar en venjulega þegar þetta félag er annars vegar, en þau gætu átt eftir að skila sér. Það eru góðar líkur á því að þú nennir ekki að lesa lengra og það er allt í lagi.

Mo Williams er tekinn aftur við leikstjórnandastöðunni hjá félaginu sem tók hann í nýliðavalinu árið 2003. Williams var tekinn í annari umferð og kom lítið við sögu á nýliðaárinu þó John Stockton hafi lagt skó sína á hilluna vorið áður.

Framkvæmdastjóri Utah hefur æ síðan séð eftir því að leyfa honum að fara til Milwaukee þar sem hann sprakk út og var orðinn 17 stiga maður á sínu þriðja ári með Bucks. Flestir muna síðar eftir honum sem meðreiðarsveini LeBron James hjá Cleveland.

Marvin Williams er líka kominn til Utah frá Atlanta. Hann er blautur draumur þjálfarateymisins, gerir allt sem honum er sagt og gerir það vel. Hann á vafalítið eftir að skila bestu tölum á ferlinum í vetur og þvi er skothelt að ná í  hann í fantasy. Án gríns.

Randy Foye kom líka frá Clippers. Sæmileg skytta og harður af sér. Varð líka að vera harður til að komast til manns eftir að hafa misst föður sinn og móður með skömmu millibili í barnæsku.

Þetta eru ekki mannabreytingar sem kalla á aukavakt á ESPN og ÍNN en við tippum á að þær muni skila liðinu talsverðum framförum. Jazz náði nokkuð óvænt inn í úrslitakeppnina í vor, en ætti að fara örugglega inn í hana næsta vor.

Af hverju, spyrðu? Af því Randy Foye, Marvin og Mo Williams, skoruðu fleiri þriggja stiga körfur en allt Utah-liðið á síðustu leiktíð. Langstærsti veikleiki Utah í sóknarleiknum var langskotin og það mál hefur nú verið lagað. Nú verður ekki lengur hægt að pakka teiginn á móti Jazz.

Framtíð þeirra Derrick Favors og Enes Kanter er nokkuð björt. Fá lið sem eiga annan eins efnivið í stórum mönnum.

Og við vorum næstum því búin að gleyma Gordon Hayward - Gísla Marteini - sem er að verða flottur körfuboltamaður. Manu diet-light, má nota það.

Við ætlum því að tippa á að Utah eigi fínan vetur og jinxa þar með liðið okkar í tætlur. Það er svo bara spurning hvort það verður Mo Williams eða Al Jefferson sem meiðist út leiktíðina eftir þennan pistil #jinx

Bónus:

Troðkóngurinn Jeremy Evans gæti mögulega lækkað í mínútum annað árið í röð. Hann hefur ekki bætt sig mikið og var aðeins með 63% skotnýtingu á síðustu leiktíð. Af hverju er 63% nýting léleg, spyrðu?

Af því 25 af 27 körfum sem drengurinn skoraði á síðustu leiktíð voru troðslur.

Hann setti því niður tveimur fleiri stökkskot en Halldór Ásgrímsson í NBA deildinni.

Fyrsta karfa Hávards reyndist ekki þristur

Tweet

Vel við hæfi að fyrsta karfan hans Dwight Howard hafi verið ein viðstöðulaus eftir sendingu frá Pau Gasol. Þær verða ansi margar svona hjá Lakers í vetur, væntanlega enn fleiri en í fyrra þegar liðið leiddi deildina í þeim flokki.



Það ríkti mikil eftirvænting í Staples Center í nótt og enginn að hugsa um að hér væri á ferðinni leikur á undirbúningstímabilinu. Þetta var fyrsti leikurinn hans Dwight Howard. Við fengum að sjá forsmekkinn af því hvað þetta þýðir fyrir Lakers.

Meira að segja viðvaningar eins og við sjá hvað nærvera Howard í sókninni opnar allt upp á gátt fyrir Lakers, ekki síst þegar liðið keyrir á fyrsta tempói og með stóra manninn jafnvel á kantinum. Skelfileg tilhugsun fyrir lið að þurfa að hafa áhyggjur af honum og Gasol inní og Kobe og Nash fyrir utan í transisjónum. Úff.

Þeir sem lesa NBA Ísland að staðaldri vita að við erum ansi gagnrýnin á Dwight Howard. Við leyfðum okkur þó að taka frumraun hans inn alveg fordómalaust og það er ljóst að veturinn verður ekkert rosalega leiðinlegur hjá Lakers. Gaman fyrir þá að vera komnir með fullt lið af fræknum köppum.

Ónotatilfinning fer um mann.

Er það ekki hroki og kjánaskapur að veðja á móti svona ofurmönnuðu liði?

Jú, það er það.

Knicks 2014

Tweet