Saturday, November 5, 2011

Nú var það ´Höfnin sem heillaði


Það er að myndast einhver hefð fyrir því að NBA Ísland fari út á land á körfuboltaleiki. Það var kominn tími á það að skella sér í Þorlákshöfn og kynna sér stemninguna umtöluðu hjá Þórsurum.

Fulltrúi Græna Drekans gerði sér lítið fyrir og hringdi í okkur og bauð okkur í sérstaka upphitun að hætti heimamanna. Þetta köllum við fagmannleg vinnubrögð. Þetta er til eftirbreytni.

Við eigum eftir að segja ykkur betur frá þessari skemmtilegu heimsókn fljótlega, en skemmst er frá því að segja að Drekamenn eru höfðingjar heim að sækja. Það er með ólíkindum að jafn lítið pláss og Þorlákshöfn skuli eiga sér svona öflugan hóp harðkjarnastuðningsmanna. Þeir kalla sig öflugustu stuðningsmenn Iceland Express deildarinnar og því er einfaldlega ekki hægt að mótmæla.

Drekamenn eru ekkert að finna upp hjólið og það er margt líkt með Drekanum og Miðjunni góðu í KR, sem reyndar hefur verið lítt áberandi í körfuboltanum upp á síðkastið. Það væri ekkert minna en rosalegt að sjá þessar tvær stuðningssveitir takast á á pöllunum einhvern daginn.

Fólk tekur misvel í fyrirbæri eins og Miðjuna og Græna Drekann. Margir eru viðkvæmir fyrir miklum hávaða og kyndingum sem stundum eru ef til vill á gráu svæði. En það er mjög mikilvægt að svona stuðningsmannasveitir fái að vera til og stunda sína iðju.

Harðlínustuðningsmenn setja ómetanlegan svip á kappleiki, en verða að gæta þess að missa sig ekki. Fjölskyldufólk verður líka að geta farið á leiki með börnin sín, en það má heldur ekki gleyma því að körfuboltaleikir eru vettvangur til að sleppa fram af sér beislinu og hafa hátt. Lifa sig inn í leikinn. Ef fólk þolir ekki smá atgang, verður það bara að vera heima og horfa á Útsvar.

Vonandi eigum við ekki eftir að fá það í bakið að hafa skrifað svona fallega um Græna Drekann. Megi þeir finna hinn gullna meðalveg í látunum í vetur og sem lengst fram á vorið.

Friday, November 4, 2011

Thursday, November 3, 2011

Það er alltaf gleði á KR-KEF



KR slapp með skrekkinn á heimavelli sínum í kvöld. Var með leikinn við Keflavík í hendi sér, reyndi að tapa, en það tókst ekki. Næst-frægasti Stevie G á Íslandi reyndi að fylla skarð Arnars Freys, sem verður klár í slaginn aftur eftir helgi.

Keflvíkingar ætla að reyna að pönkast í Nonna Norðdal og fá hann inn aftur eftir áramót. Hann er búinn að fara oft í gólfið í gegn um tíðina, líklega oftar en flestir, en svona toppmenn eiga ekki að hætta á unglingsaldri. Keflavík hefði líka geta notað Nonna í kvöld. Gormurinn David Tairu á ekki að hirða 5 sóknarfráköst leik eftir leik. Sérð hann hirða eitt þeirra á myndinni hér fyrir ofan. Hann er líklega enn á uppleið.

Emil Þór hatar ekki að fá skurðina í andlitið, en lætur það ekki á sig fá. Það er töggur í honum eins og KR-liðinu. Maður titraði ekkert af ótta þegar maður skoðaði KR-hópinn fyrir mót, en þeir standa sig.



Það er alltaf jafn gaman að fylgjast með Magnúsi Gunnarssyni spila körfubolta. Svægið er yfirgengilegt. Smitaðist þó ekki í félaga hans Charles Parker, sem ætla mætti að væri neyðarkarl © Keflavíkurliðsins. Hann sýndi það ekki í þessum leik. Stóri maðurinn þeirra svalt dálítið. Fór reyndar ekkert sérstaklega með þá mola sem hann fékk inn á borð til sín, en það lagast kannski þegar Arnar Freyr kemur aftur.



KR-Keflavík er einfaldlega prógramm sem klikkar ekki. Það var því upplagt fyrir Vísismenn að prófa tilraunaútsendingu frá þessum leik. Það sem meira er, er hægt að horfa á leikinn þegar manni hentar á vefnum eftir á, sem er flott þjónusta. Vísismenn ætla að gera meira af þessu á næstunni og er það einstaklega jákvætt.

Wednesday, November 2, 2011

Tíst


Það var Billy Owens


Fólk er enn að senda okkur svör við gátunni sem við settum inn hérna um daginn.

Flestir tippuðu á þarna færi framherjinn fjölhæfi Billy Owens og það var rétta svarið.

Owens átti sín bestu ár með Golden State og Miami, en spilaði eitt ár með Seattle Supersonics og við höfðum alveg steingleymt því þegar við sáum hann á myndinni með Þjóðverjunum huggulegu.

Þess vegna datt okkur í hug að leyfa lesendum að giska á þetta. Kom okkur raunar á óvart hve margir þekktu kappann.

Vel gert.

Sunday, October 30, 2011

Stórafmæli hjá Pétri


Körfuboltagoðsögnin Pétur Guðmundsson á afmæli í dag og óskum við honum til hamingju með það.

Miðherjinn fyrrverandi varð þess heiðurs aðnjótandi að verða fyrsti Evrópubúinn sem spilaði í NBA og er vitanlega eini Íslendingurinn sem spilað hefur í deildinni.

Pétur hóf NBA feril sinn hjá Portland Trailblazers leiktíðina 1981-82 og það vill svo skemmtilega til að það var einmitt á þessum degi fyrir sléttum 30 árum sem Portland spilaði opnunarleik vetrarins. Það var sigurleikur gegn Phoenix Suns.

Ef við gefum okkur að Pétur hafi komið við sögu í umræddum leik, sem er ekki ólíklegt því hann spilaði 68 leiki um veturinn, er ljóst að hann hefur spilað þennan tímamótaleik á afmælisdaginn sinn.

Við erum ekki með heimildir við höndina til að fletta þessu upp, en hvort sem Pétur kom við sögu þetta kvöld eða ekki, er gaman að staldra við og minnast merkra manna og góðra verka. Tíminn flýgur augljóslega í öllu sem tengist körfubolta,
einfaldlega af því hann er svo skemmtilegur.

Smelltu hérna til að lesa pistil sem Óskar Ófeigur Jónsson á Fréttablaðinu og Vísi skrifaði í tilefni af fimmtugsafmæli Péturs fyrir þremur árum.

Hver er maðurinn?


Á myndinni hér fyrir neðan má sjá tvo huggulega Þjóðverja etja kappi í NBA leik fyrir nokkrum árum.

Til vinstri er Seattle-maðurinn Detlef Schrempf sem lék til úrslita með liðinu árið 1996 en ungi maðurinn til hægri er auðvitað Dirk Nowitzki, sem tapaði einmitt í úrslitaeinvígi deildarinnar tíu árum síðar áður en hann krækti svo í dolluna í sumar sem leið. Þeir virðast hafa verið með sama rakara á þessum árum.

Það hefði verið gaman að veðja við einhvern eftir þennan leik um að Nowitzki ætti eftir að verða útnefndur bæði verðmætasti leikmaður deildarinnar og lokaúrslitanna í framtíðinni. Einhver hefði eflaust hlegið.

Flest ykkar þekkja eflaust þá Detlef og Dirk, en getur þú sagt okkur hver það er sem stendur á milli þeirra baka til?  Sendu svarið á nbaisland@gmail.com. Þú ert dálítið kúl ef þú ert með þetta.

Saturday, October 29, 2011

Tvífarar dagsins


Immit


   Nike segir...

















   LeBron segir...





















   Durant segir...

























   Einmitt!

Hann heillaði, Hólmurinn


Þá er tveggja vikna útlegð okkar í Hólminum lokið. Það hefði verið betra að fá fleiri leiki meðan á dvölinni stóð, því það er ekki margt annað að gera þarna fyrir vestan.



Þetta var þó mjög uppbyggilegur túr og heimamenn tóku vel á móti okkur. Það verður ekki tekið af þeim, þetta er eitt fallegasta pláss á landinu hvort sem hægt er að fá bernaise-sósu þar eður ei. Ritstjórnin er á betri stað en hún var þegar í Hólminn var haldið og er nú kominn aftur á skrifstofuna.



Það er veisla fram undan og hún hefst á morgun þegar KR tekur á móti Þórsurum úr Þorlákshöfn. Það ætti að verða okkur auðveldara að sinna ritstörfunum nú þegar við erum komin aftur í borgina og búin að ræsa Photoshop aftur.

Þökkum Hólmurum kærlega fyrir okkur. Það var gaman að sækja þá heim. Við verðum eitthvað meira á ferðinni utan höfuðborgarsvæðisins á næstunni. Landsbyggðin alla leið.

Wednesday, October 26, 2011

NBA Ísland fór á körfuboltaæfingu


Kíktum á æfingu hjá Snæfelli áðan. Það var bara ekki annað í boði eftir allt þetta körfuboltaleysi undanfarið - að ógleymdri þeirri staðreynd að við komumst ekki á Star-KR annað kvöld.

Hvað um það. Það var létt yfir Hólmurum eins og venjulega og þeir buðu fulltrúa NBA Ísland velkominn í þetta innlit. Kannski séð aumur á ræflinum þar sem hann stóð hokinn með myndavélina.

Glöggir taka eftir þvi að það var leynigestur á æfingu hjá Snæfelli. Var þarna á sinni annari æfingu. Pilturinn heitir Marquis Hall og ku vera nokkuð vel að sér í körfuboltafræðunum.

Hann leit amk mjög vel út í augum okkar viðvaninganna og ekki var annað að heyra á Hólmurum að þeir væru sammála, enda stefna þeir hátt eins og sjá má á myndinni hér fyrir neðan.




Saturday, October 22, 2011

Bæjarleyfið byrjaði á Ásvöllum


Stálumst aðeins úr Hólminum og sáum Hauka liggja heima fyrir Stjörnunni á Ásvöllum í kvöld. Höfum smá áhyggjur af Haukaliðinu. Varnarleikurinn var á tíðum skelfilegur og það var eins og væri þungt yfir leikmönnum. Vantaði bæði stemningu og grimmd í þá rauðu. Það er auðvitað ekkert gleðiefni að hefja leiktíðina 0-3, en meistari Pétur Ingvarsson verður að reyna að kveikja betur í strákunum sínum. Þeir eiga að geta betur og hljóta að fara að snúa þessu við.

Það myndi strax hjálpa þeim ef fólk nennti að mæta á leikina. Ótrúlega fáir sem mættu á þennan grannaslag í kvöld og því heyrðist lítið nema bölvaður hávaðinn í trommunni sem einn áhorfenda mætti með á leikinn. Svona trommur hafa ekkert að gera á körfuboltaleiki. Sparið þær endilega fyrir handboltann, nú eða stofnið þungarokksband. Miklu meira vit í því.

Stjarnan rúllaði í gegn um þennan leik á krúskontról og byrjar leiktíðina 3-0. Reyndar á móti liðum sem eru samanlagt 0-9, en það er ekki þeim að kenna. Fyrsta alvöru prófið hjá Garðbæingum kemur strax á fimmtudaginn þegar KR mætir í Ásgarðinn. Það verður alveg æðislegt að missa af þeim leik. Engin takmörk fyrir því hvað Hólmurinn heillar okkur þessa dagana.


Sumir láta það koma sér á óvart að Þór frá Þorlákshöfn sé að byrja vel, en það er óþarfi. Þetta lið er ekkert rusl. Flott hjá þeim að skella Snæfelli í kvöld. Við vitum ekkert um þennan leik, en Snæfellsliðið á enn eftir að finna rétta gírinn. Voru heppnir að tapa ekki fyrir Haukum um daginn, straujuðu KR og tapa svo fyrir Þórsurum á flautunni í kvöld. Mætti halda að væri haust.

Við stefnum á að taka rándýrt roadtrip í Þorlákshöfn sem fyrst. Ekki ólíklegt að úr því verði jafnvel hópferð fjölmiðlamanna. Vonum bara að Græni drekinn láti athyglina ekki stíga sér til höfuðs. Þetta verður eitthvað.

Talandi um græna hluti á flugi. Ungliðasveit Njarðvíkur kom til jarðar í vesturbænum í kvöld. Það er annað lið sem við þurfum að fara að sjá.



Að lokum langar okkur að nota þetta tækifæri og senda batakveðjur í Breiðholtið. ÍR-ingarnir eru eitthvað farnir að týna tölunni í meiðsli eins og venjulega. Reglulega óþolandi þróun. Sérstaklega höfum við áhyggjur af Sveinbirni Claessen og hnénu hans. Vonum sannarlega að meiðsli hans og annara ÍR-inga séu ekki alvarleg. Tökum brjálæðiskast ef Sveinbjörn verður tekinn aftur úr umferð.

P.s. - Af hverju gáfuð þið okkur 50 Facebook-like á færslu um Veitingahúsagagnrýni?

Wednesday, October 19, 2011

Digranes í Hólminum: Veitingahúsagagnrýni


Þeir segja að ekkert jafnist á við Bernaise-borgarann á Narfeyrarstofu. Það var því ekki annað að gera en að smakka kvikindið. Við vitum af þremur viðskiptavinum í gegn um árin sem fengið hafa pakka-bernaise í stað alvöru. Það var áhættunnar virði að prófa. Ekkert annað til að éta.






























Spennan var því gríðarleg síðustu skrefin að þessu fallega húsi. Það var kalt í veðri og okkur var farið að hlakka til að komast inn í hlýjuna og takast á við Bernaise-bombuna - hvort sem hún kæmi úr pakka eða ekki.



Þessi skemmtilega saga verður ekki mikið lengri. Við komum að læstum dyrum. Opnunartími bæði á húsinu og á heimasíðu staðarins segir allt annað eins og þið sjáið á efri myndinni. Neðri myndin sýnir svo glöggt hvað það er helvíti mikið opið þarna.

Vel gert, Narfeyrarstofa.

Núll stjörnur af fimm.

Tuesday, October 18, 2011

Sígild æskulist


Listformið sem þú sérð hérna á myndinni á líklega eftir að standa lengi í mann- og fornleifafræðingum framtíðarinnar.

Þetta táknmál endurspeglar vinsælt tjáningarform ungmenna í plássunum umhverfis Ísland frá árinu 1980. 

Þetta eru klassísk rokkhljómsveitarnöfn, skorin og krössuð ofan í borð úr skólastofu úti á landi.

Það vekur upp svo mikla nostalgíu að sjá þetta.

Svona var þetta gert í okkar sveit í gamla daga, svona vitum við að þetta var gert fyrir norðan - og nú höfum við skjalfest það á þessu litla ferðalagi okkar í Stykkishólm að svona gera menn þetta líka á vesturlandinu. Listaverkið hér á myndinni var skrifað á borð sem staðsett var í óhefðbundinni blaðamannastúku Snæfellsliðsins.

Kannski er unga fólkið okkar ekki vonlaust eftir allt. Ekki nema hann Leifur, sem var einn þeirra sem settu nafnið sitt við þetta tiltekna verkefni, hafi verið ungur maður fyrir löngu síðan. Það kæmi svo sem ekki á óvart.

Skóþáttur Nonna Mæju


Það er gaman að fylgjast með Nonna Mæju spila körfubolta. Hann spilar leikinn á dálítið öðru plani en þeir sem í kring um hann eru. Átti ekki sinn besta leik þegar Snæfell burstaði KR í gær, en það kom ekki að sök.

Hann lenti í óvenjulegu atviki í miðjum leik þegar hann bókstaflega gekk af sér skóinn. Hann bara rifnaði í tvennt.

David Tairu hjá KR var með leikfésið á sér allan tímann og var auðvitað önugur yfir gangi mála eins og allir KR-ingar, en hann gat ekki annað en brosað þegar hann sá Jón Ólaf koma gangandi af velli í öðrum skónum og með hinn dinglandi í tveimur pörtum í hendinni.

Þessi uppákoma vakti mikla kátínu í stúkunni og þegar Jón Ólafur kom aftur inn á völlinn, nú klæddur í hvíta skó, sungu dömurnar í stúkunni:

"Nú er Nonn´á nýju skónum, nú er´að koma jól!"  

Mjög skemmtilegt móment.

Við erum ekki sérlega mannglöggir, en gott ef það er ekki sjálf Mæja sem situr þarna hjá dömunum syngjandi í stúkunni. Þið leiðréttið okkur með það ef okkur skjátlast það.

Mikið var gaman að koma í hólminn þó um haustleik væri að ræða.










Óþægileg endurkoma Emils í Hólminn


"Af hverju ertu í KR? Hvað ertu að gera í KR? Þú átt ekkert að vera í KR!" 

Eitthvað á þessa leið sagði ungur gutti þegar Emil Þór Jóhannsson gekk inn í Íþróttamiðstöðina í Stykkishólmi með félögum sínum í vesturbæjarliðinu í gærkvöldi.

Emil gat ekki annað en brosað, eins og fullorðna fólkið sem heyrði til. "Svona gerir maður ekki," sagði einn úr miðasölunni hjá Snæfelli þegar guttinn áttaði sig á því að fólki fannst það sem hann sagði fyndið - og byrjaði að kýla Emil í magann.

Svo héldu fyrrum félagar Emils í Snæfells-liðinu áfram að lemja hann þegar inn á völlinn var komið.

Kannski hefði hann átt að hugsa sig um tvisvar áður en hann yfirgaf Snæfell og fór í KR. En kannski vildi hann bara prófa að leika með báðum liðum eins og maðurinn sem er með honum á myndinni.

Hólmurinn heillar




Ritstjórnin heldur til í Stykkishólmi þessa dagana og er það vel á dögum sem þessum, þegar KR er í heimsókn. Hitastigið hefur ekki farið upp fyrir -18 gráður ef vindkæling er tekin með. Ef við værum ekki utan af landi, værum við búin að stimpla Hólminn skítapleis bara af því veðrið hefur ekki leikið við okkur. Hlökkum samt til að upplifa almennilegt veður hérna einn daginn.

Það er skömm frá því að segja að þetta er aðeins í annað sinn sem við heimsækjum þetta fallega bæjarfélag. Það er ekkert nema fáránlegt að þetta pláss, sem er á stærð við Eskifjörð, skuli hafa landað Íslands- og bikarmeistaratitli i körfubolta. Það verður bara ekki of oft sagt.

Það var ekki mikil spenna í leik KR og Snæfells. Heimamenn sáu til þess og unnu öruggan sigur. Það hefði verið gaman að setja inn myndir úr leiknum, en nettengingin sem er í boði hérna virðist ekki ráða við að setja þær hérna inn. Blessunarlega veldur það okkur engri sérstakri gremju eða neitt svoleiðis. Reynum aftur á morgun.

Saturday, October 15, 2011

Framúrakstur á Ásvöllum


Fjörugur leikur á Ásvöllum í kvöld. Haukar voru með þennan hnífjafna leik í höndum sér þegar skammt var til leiksloka, en það var greinilega ekki í kortunum að þeir fengju að vinna góðan sigur í fyrsta leik. Það er ekki hægt að kalla þetta annað en skitu, því miður. Sérð framúraksturinn vel á þessu skemmtilega grafi af vef Körfuknattleikssambandsins.















Það er samt gaman af þessu Haukaliði og það þarf ekki að hafa stórar áhyggjur þó fyrsti leikurinn hafi farið í vaskinn. Mjög skemmtilegt lið, sem gaman verður að fylgjast með í vetur. Snæfell er líka með hörkulið og það verður taumlaus gleði að sjá það taka á móti KR í sveitinni á mánudagskvöldið.



Þetta var skemmtilegur leikur en við erum enn að venjast því að horfa á körfuboltaleiki í gegn um myndavélarlinsu. Það kemur óneitanlega niður á áhorfinu að vera að mynda í leiðinni. Sýnir okkur bara hvað hugsjónamenn eins og Nonni á Körfunni eru að vinna gott starf. Forráðamenn félaganna ættu að taka í höndina á honum og þakka honum fyrir í hvert sinn sem þeir hitta hann. Og gera það vafalítið.


Það er dálítið af myndum hérna af Hólmaranum Quincy Hankins-Cole að troða körfuboltum. Hann stóð sig vel og skilaði 17 stigum og 15 fráköstum. Útnefnum hann því mann leiksins af því félagi hans Brandon Cotton (33 stig, 13-18 fg) gleymdi að gefa stoðsendingu í leiknum.

Thursday, October 13, 2011

Drekinn er kominn



Það er dásamlegt að geta sagt að Iceland Express deildin sé byrjuð á fullu. Við sáum KR eiga fullt í fangi með Þórsara frá Þorlákshöfn. Ljóst að nýliðarnir hafa alla burði til að ná í fullt af stigum ef þeir spila af sama krafti og í kvöld.

Á hinn bóginn verður að gefa KR strákunum kúdós fyrir að klára dæmið, en þeir þurfa auðvitað að stoppa upp í stór göt frá því í fyrra. Það verður að segjast eins og er að ánægjan af því að sjá þennan fjöruga leik er ekki alveg sú sama eftir að Ed Horton hjá KR var sóttur í DHL höllina á sjúkrabíl. Vonum sannarlega að meiðsli hans séu ekki alvarleg. Hann lenti víst í árekstri við tröllið Grétar Inga Erlendsson og verður ekki öfundaður af því.

Græni Drekinn, stuðningssveit Þórs, setti skemmtilegan svip á leikinn. Þeir tóku sér stöðu fyrir Miðju og létu dólgslega. Hvar eru harðlínustuðningsmenn KR? Fjölskyldufólkið á bandi þeirra svarthvítu mátti hafa sig allt við til að halda í við æsta stuðningsmenn Þórsara. Það er völlur á þeim og vonandi er þessi öflugi stuðningur kominn til að vera með liðinu í úrvalsdeildinni. Það er reglulegur sómi af svona stuðningssveitum ef þær gæta þess að fara ekki yfir strikið.

Prótótýpan var að detta í hús