Fella hjá KR

Tweet

Körfuboltavertíðinni hér heima lauk formlega hjá strákunum í gærkvöldi þegar KR lagði Hauka nokkuð örugglega 70-84 á Ásvöllum og tók úrslitaeinvígið sumsé 3-1. Þetta er búinn að vera nokkurn veginn fullkominn vetur hjá KR-ingum sem tóku bæði deild og bikar í ár.

Áætlunin hans Helga Magnússonar um að hætta með stæl gekk því óaðfinnanlega upp, þar sem hann er Íslandsmeistari þrjú síðustu árin sín og vinnur allt á lokaárinu sínu. Þið munið eflaust eftir öðrum þekktum körfuboltamanni sem lagði skó sína á hilluna árið 1998 eftir að hafa orðið meistari þrjú ár í röð, en það er nokkuð skondin tilviljun að sá leikmaður fór líka til Washington eftir titlana þrjá eins og Helgi ætlar sér að gera átján árum síðar.

KR-ingar eru vel að titlinum komnir eins og venjulega. Haukaliðið er einfaldlega ekki nógu sterkt til að vinna KR í seríu og við vissum það öll fyrirfram. Hinsvegar verðum við að hrósa Haukapiltum fyrir að ná að gera þetta að einvígi á kafla en ekki sópi. Við fengum smá drama í þriðja leiknum og það reddaði seríunni, sem hefði ekki verið merkileg ella. Til dæmis ekki nálægt því eins góð og Njarðvíkurserían hjá KR.

Það hefði verið gaman að sjá KR mæta Stjörnunni, það hefði verið gaman að sjá KR mæta Njarðvíkurliði sem væri ekki með lykilmenn í meiðslum og síðast en ekki síst hefði verið helvíti gaman að fá að sjá Kára Jónsson spila með Haukunum í úrslitaeinvíginu. En svona er þetta víst. Meiðsli gerast og allt það.

Það verður forvitnilegt að sjá hvernig KR-ingar ætla að fylla í það stóra skarð sem Helgi Magnússon skilur eftir sig næsta vetur og það verður eftirsjá í þessum flinka leikmanni og leiðtoga. Það verður líka áhugavert að sjá hvernig Haukarnir tækla næstu leiktíð - hvort þeir ætla að láta sér nægja að hafa skrifað smá Öskubuskuævintýri núna og sökkva sér bara aftur í meðalmennskuna þegar Kári er farinn. Vonandi ekki.

Ritstjórn NBA Ísland óskar KR-piltum og Snæfellsstúlkum hjartanlega til hamingju með titlana sína í vikunni. Þetta er búinn að vera frábær körfuboltavetur hjá okkur á innlendum vettvangi.

Hérna eru loks nokkrar myndir frá Ásvöllum í gær.
Smelltu á "Lesa meira" ef þig langar að skoða þær allar.

Nýtt hlaðvarp

Tweet

Í 62. þætti Hlaðvarps NBA Ísland ræða Baldur Beck og Snorri Örn Arnaldsson hjá Stjörnunni úrslitaeinvígi karla og kvenna í Domino´s deildinni og fara svo stuttlega yfir stöðu mála í úrslitakeppni NBA deildarinnar.

Þið getið hlustað á þáttinn í spilaranum hér fyrir neðan eða farið inn á hlaðvarpssíðuna og sótt hann þar á mp3 formi til að setja hann inn á spilarann ykkar. Njótið vel, kæru lesendur/hlustendur.

Njarðvík áfram

Tweet

Njarðvík er komið í undanúrslitin í Flatbökudeild karla eftir 79-75 útisigur á Stjörnunni í Ásgarði í gærkvöldi. Þessi sería er búin að vera myljandi jöfn og skemmtileg og við munum í fljótu bragði ekki eftir seríu þar sem allir leikir unnust á útivelli.

Kannski erum við að verða viðkvæmari með aldrinum, en við finnum alltaf meira og meira til með liðunum sem falla út úr úrslitakeppninni eftir hetjulega baráttu í hnífjöfnum rimmum líkt og Stjarnan var að gera í gærkvöldi.

Það er reyndar meira í þessu. Við erum eflaust að taka tap Garðbæinganna svona inn á okkur af því okkur er farið að þykja svo vænt um höfðingjana í liðinu - bæði leikmenn og þjálfara. Hrafn þjálfari lýsti því yfir í samtali við Vísi að hann hefði áhuga á að halda áfram með liðið og við vonum innilega að hann fái tækifæri til þess.

Hrafn er góður þjálfari og heiðursmaður sem nýtur vináttu og virðingar ritstjórnar NBA Ísland - alveg eins og forveri hans Teitur Örlygsson og raunar báðir þjálfarar Njarðvíkurliðsins. Það er svo auðvelt að halda upp á lið sem eru þjálfuð af svona toppmönnum.

Á svona tímamótum er ekki laust við að við veltum því fyrir okkur hvort meistarar eins og Justin Shouse og Marvin Valdimarsson séu jafnvel farir að hugsa um að minnka eitthvað við sig þegar kemur að því að spila körfubolta. Við vonum að sjálfssögðu ekki, en hver veit.

Það sem við vitum hinsvegar, er að þeir Tómas Hilmarsson og Sæmundur Valdimarsson ætla að vera duglegir að lyfta og æfa sig í sumar og koma geggjaðir til leiks næsta haust (ef þeir stinga ekki af úr landi, það er að segja). Það er búið að vera gaman að sjá þá fá aukið hlutverk hjá liði Stjörnunnar í vetur. Þetta eru að verða fullorðnir menn.

Við óskum Njarðvíkingum til hamingju með að vera komnir í aðra umferðina eftir alla þessa sigra á útivelli. Það er búið að vera óskaplega mikið basl á þeim grænu í allan vetur, aðallega út af meiðslum, og enn sér ekki fyrir endann á því náttúrulega.

Nú er bara að sjá hvernig Njarðvíkingum vegnar á móti Íslandsmeisturunum. Við þurfum ekki að hafa mörg orð um það risaverkefni sem það er að mæta KR og Njarðvíkingar gera sér fulla grein fyrir því, en þeir ættu alveg að geta strítt Vesturbæingunum aðeins. Það eru bæði reyndir og góðir spilarar í þessu Njarðvíkurliði og þjálfarateymið er sannarlega ekki að byrja í þessu.

Við tókum eftir því að Stefán var gestur í Körfuboltakvöldi í gær og þó við hefðum misst af viðtalinu, verandi á vellinum, sögðu strákarnir í Körfuboltakvöldi okkur að Stefán hefði verið í ótrúlega góðum anda þrátt fyrir þessa grængolandi holskeflu mótlætis sem hann hefur orðið fyrir á liðnu ári.

Eitt sem við verðum að geta sérstaklega er mætingin og stemningin sem var í Ásgarði í gær, en bæði var til algjörrar fyrirmyndar. Við eigum ekki aðeins eftir að sakna Stjörnuliðsins í næstu umferð, heldur einnig Silfurskeiðarinnar, stuðningsmannasveitar Garðbæinga, sem er búin að standa sig frábærlega í úrslitakeppninni með skemmtilegum söngvum og tralli. Prik handa þeim.

Nú fáum við sem sagt KR-Njarðvík og Haukar-Tindastóll í semífænalnum.

Vá, það verður eitthvað, krakkar.

Hérna eru nokkrar myndir úr Ásgarði í gærkvöldi:

Útgáfupartí

Tweet

Fjórði leikur Hauka og Þórs í 1. umferð úrslitakeppninnar í gærkvöldi var einn sá skemmtilegasti sem við höfum séð í vetur - þvílík hávaðaskemmtun sem hann var.

Eins og þið vitið væntanlega, lauk leiknum með sigri gestanna úr Hafnarfirði 100-96 eftir framlengingu, sem þýðir að Haukarnir eru komnir í undanúrslitin. Við viðurkennum fúslega að við dauðsjáum á eftir Þórsliðinu og það er fúlt að Natvélin og félagar séu á leiðinni til Benidorm. 

Blanda af klaufagangi og óheppni liðsins hjálpaði ekkert, en það sem gerði gæfumuninn í þessum leik var sú staðreynd að Vance Hall spilaði gjörsamlega eins og aumingi. Ef hann hefði spilað af 50% getu í þessum leik, hefði Þórsliðið náð að knýja fram oddaleik, en hann valdi slæman dag til að eiga sinn versta leik á tímabilinu og því fór sem fór. Maðurinn hlýtur bara að hafa verið fárveikur. Ekkert annað afsakar þessa arfaslöku frammistöðu hjá þessum annars magnaða leikmanni.

Það sem stendur upp úr í þessum leik kemur Þórsliðinu hinsvegar ekkert við, því hann var að okkar mati útgáfupartí Kára Jónssonar. Drengurinn fór hamförum og kláraði leikinn fyrir Kanalausa Hafnfirðingana. Það er nákvæmlega ekkert eðlilegt við það að drengur sem er ekki búinn að eyða fermingarpeningunum sínum taki bara yfir leik í úrslitakeppni með þessum hætti, en hann gerði það nú samt. Þvílíkur töffari sem þessi drengur er.

Stjarnan hirti annað sætið (myndir)

Tweet

Það var gaman að horfa á Stjörnuna og Keflavík berjast um annað sætið í Domino´s deild karla í gærkvöldi. Leikurinn var ekki fallegur á að horfa, en gott ef hann var ekki besta mögulega upphitun liðanna fyrir úrslitakeppnina. Slík voru átökin - og það eðlilega - um hvort liðið gæti frestað því lengur að mæta KR í úrslitakeppninni.

Keflavíkurliðið hefur aðeins verið að gefa eftir undanfarið og við vitum að margir kenna Kanamálum liðsins um - að það hefði aldrei átt að skipta um Kana. Við kaupum ekki að það sé öll sagan á bak við vandræði Keflavíkur, en það er auðvitað rosalega þægilegt að benda á þetta. Kenna bara Jerome Hill um þetta allt saman. Við ætlum nú ekki að gera það, en það er ljóst að Kef þarf að rífa sig vel upp fyrir einvígið við Tindastól, annars er ekki langt eftir af leiktíðinni hjá þeim.

Hérna eru annars nokkrar myndir úr Ásgarði í kvöld:

Af leikandi léttum Haukum

Tweet

Ka-kaaaaa!*

Einar Árni kærði sig ekki um að nota flensuskít sem afsökun fyrir slökum leik hans manna í Þórsliðinu þegar þeir steinlágu 86-62 fyrir Haukum í Schweinhunde-höllinni í Hafnarfirði í gærkvöldi. Hann sagði að hefðu verið veikindi hjá Haukunum líka. Það bar þó eitthvað minna á því hjá heimamönnum.

Það sem fór með þetta hjá Þórsurunum var að mikilvægasti leikmaður liðsins var mjög augljóslega veikur, enda skoraði Vance Hall ekki nema 12 stig og hitti úr 4 af 13 utan af velli. Það gefur augaleið að þetta verður alltaf erfitt þegar prímusmótorinn er á felgunni. Sáum Natvélina poppa íbúfen á bekknum.

Þetta var skítt fyrir Þórsarana, að lenda í svona pestarkjaftæði á svona mikilvægum tímapunkti, þar sem liðin í efri hluta deildarinnar eru að klóra og bíta hvert annað til að ná í heimavöllinn í úrslitakeppninni. Þórsararnir reyndu, en stundum ganga hlutirnir einfaldlega ekki upp. Þeir eiga eftir að svara þessu þegar þeir hressast, ekki spurning.

Aftur urðum við vitni að Jekyll and Haukar móment hjá Hafnfirðingum. Þeir eru álíka stöðugir og íslenska krónan, en þetta getur verið drullu skemmtilegt lið þegar það er í essinu sínu. Við erum búin að sjá nokkra átakanlega leiki frá Haukunum í vetur, en þeir virðast hafa unnið í Kanalottóinu, því það er allt annað að sjá liðið eftir að Brandon Mobley kom inn í þetta hjá þeim.

Nú höfum við ekki hugmynd um hvort þessi uppsveifla Hafnfirðinga skrifast á hann eða ekki, en hann á tvímælalaust þátt í þessu. Maðurinn er einfaldlega frábær í körfubolta, sem hjálpar. Hann er með 21/9 meðaltal þrátt fyrir fúleggið sem hann verpti gegn Star um daginn og er að skjóta 50% fyrir innan og utan.

Þegar vörnin heldur hjá Haukum, boltinn gengur vel og skotin þar af leiðandi að detta, er ljómandi gaman að horfa á þá spila körfubolta. Sérstaklega þótti okkur gaman að sjá þegar (Steph) Kári Jónsson og Mobley tóku vegginn og veltuna. Það var svona dálítið: "Hvort viltu láta bora í hnéskelina á þér eða sparka úr þér tennurnar?"- dæmi fyrir aumingja Þórsarana.

Vorum við búin að segja ykkur frá hrifningu okkar af Kára Jónssyni? Já, margoft, en hér kemur það aftur. Við ráðum ekkert við þetta. Eigum ekki séns þegar kemur að Kára, eins og líklega allir körfuboltaáhugamenn sem á annað borð eru með mælanlegan púls. Drengurinn er listamaður í alla staði og skilar 18/5/5 með 55% og 37% í vetur. Uh, jez-ah.

Men in black, lag Will Smith úr samnefndri kvikmynd, var á toppi breska vinsældalistans daginn sem Kári fæddist í lok ágúst árið 1997.

Nú eru Haukarnir búnir að vinna fimm leiki í röð og eru taplausir í febrúar eftir að hafa kvatt janúar með blæstri frá KR. Það er freistandi að stökkva um borð í Haukavagninn og byrja að renna sér núna, en við ætlum ekki að gera það alveg strax. Viljum ekki brenna okkur aftur. Það er svo sárt.

Hvað sem öðru líður, ætti að vera óhætt að áætla að Haukar eigi eftir að setja skemmtilegan svip á úrslitakeppnina í vor - eitthvað sem við sáum ekki fyrir fyrir mánuði síðan. Þeir eru með hörkulið og eiga að krefjast þess af sjálfum sér að þeir fari að minnsta kosti í undanúrslitin í vor. Annað væru bara vonbrigði og við erum 100% viss um að Haukarnir eru því sammála.

Það er líklega of mikil bjartsýni að ætla þessu liði að keppa um titilinn, en okkur er alveg sama. Ef þetta lið spilar svona skemmtilegan bolta í úrslitakeppninni, fáum við öll eitthvað fyrir peninginn okkar og þá eru allir glaðir.

Hérna eru loks nokkrar myndir frá leiknum í gær. Þú mátt alveg fá þær lánaðar ef þú gætir þess að merkja okkur þær. Nema þú sért fjölmiðill. Þá eru ekkert of góður til að borga fyrir þær. Dollah, dollah, bill yo!

-------------------------------------------------------------------

* - Þetta er mökunarkall hauksins um fengitímann

Ófreskjan að vakna?

Tweet

Sumir héldu kannski að KR-ingar yrðu eitthvað værukærir þegar deildarkeppnin byrjaði á ný, eftir þennan ljómandi fína sigur í bikarúrslitaleiknum um síðustu helgi. Ekki við. Við sáum það langar leiðir að leikmenn og þjálfarar KR ætluðu einmitt að gæta þess vel að koma brjálaðir til leiks í deildinni og klára hana sem fyrst. Þar styttist í verklok.

Andstæðingar KR í úrvalsdeildinni upplifa örugglega ákveðið "ó, fokk" móment núna. Þetta er augnablikið árlega þegar KR ófreskjan stendur upp, hristir sig og öskrar eins og T-Rex - minnir alla hina á að þeir eiga ekki séns. Sigur KR á Kef í gær var dálítið þannig.

KR á enn helling inni. Við vitum það og þeir vita það, en við þóttumst merkja það á liðinu í gær að nú ætti að fara að ræsa mótorana. Svo hjálpar það mikið þegar einn besti leikmaður deildarinnar er að komast í sitt besta form aftur eftir endalaus meiðslaleiðindi. Við fögnum því að sjá Pavel Ermolinski nálgast sitt fyrra form - sjá hann í og við þrennuna leik eftir leik. Þannig á þetta að vera.

Hérna eru nokkrar myndir úr Vesturbænum í gær.

Og þá var kátt í Höllinni

Tweet

NBA Ísland óskar KR-piltum og Snæfells-stúlkum til hamingju með bikarmeistaratitlana í gær. Það er alltaf svo gaman að vera til á bikardeginum, þegar við fjölmennum öll í höllina, hittum hvort annað og skemmtum okkur saman yfir frábærum körfubolta. Allir vinna, nema þeir sem tapa.

Við ætlum ekki að reyna að neita því að Þórsliðið úr Þorlákshöfn er búið að heilla okkur mikið í vetur og því var sómi af því að sjá þetta skemmtilega lið í Höllinni í gær. Eins og flestir reiknuðu með, reyndist KR-liðið of stór biti til að kyngja fyrir austanmenn, en þeir stóðu sig frábærlega og eiga hrós skilið fyrir frammistöðu sína í sínum fyrsta bikarúrslitaleik.

Það sem gladdi okkur mest við úrslitaleikinn í karlaflokki var sú staðreynd að Helgi Magnússon næði að vinna sigur í því sem er nokkuð örugglega hans síðasti bikarúrslitaleikur. Helgi og KR-liðið hans hefur lent í basli í bikarnum á undangengnum árum, en það var ljóst frá fyrstu mínútu í gær að Helgi ætlaði alls ekki tómhentur heim úr höllinni. Hann ætlaði að vinna þennan fjandans titil og ekkert rugl!

Það verður eftirsjá í höfðingja eins og Helga þegar hann hættir að spila í vor, því menn eins og hann vaxa ekki á trjánum. Liðsmenn og leiðtogar út í gegn, fúndamentin á hreinu og aldrei neitt bull. Sannkallaður meistari, hann Helgi. Þá er bara að loka Íslandsmeistaratitlinum, til að fullkomna endasprettinn. Það yrði sannarlega draumaár fyrir þennan frábæra leikmann.

Hérna eru nokkrar gular myndir úr Höllinni: