Showing posts with label Vel Gert. Show all posts
Showing posts with label Vel Gert. Show all posts

Monday, March 6, 2017

Litli-Curry sækir á


Stephen Curry náði að hrista af sér slenið í nótt þegar hann fór fyrir Warriors-liðinu sínu í nokkuð öruggum útisigri á New York Knicks 112-105. Curry skoraði 31 stig í leiknum og þó hann hafi oft hitt betur, reif hann sig sannarlega upp úr lægðinni sem hann var í í leikjunum þremur þar á undan, þar sme hann hitti aðeins úr 4 af 31 3ja stiga skoti sínu (til gamans má geta þess að hann var 16 af 31 í þristum í leikjunum þremur þar á undan).

En á meðan Stephen Curry (28 ára) týndi skotinu sínu í nokkra daga, hefur yngri bróðir hans Seth (26 ára) farið á kostum með liði Dallas Mavericks, þar sem hann er merkilegt nokk kominn langleiðina með að sanna að hann sé sannkallaður NBA leikmaður.

Seth fær þannig að spila 29 mínútur, skorar 13 stig, hirðir 3 fráköst og gefur 3 stoðsendingar. Meira að segja kominn með 30 stört og allt. Eitthvað af þessum aukna spilatíma kemur til vegna tánks og meiðsla hjá Mafs, en það kemur málinu ekkert við - hann er að spila ljómandi vel strákurinn.

Það eru ekki lítil tíðindi, því Seth litli hefur strögglað við það að finna sér lið sem vill eitthvað með hann hafa í nokkur ár. Segja má að hann hafi fengið fyrsta þokkalega sénsinn sinn til að spila með Sacramento á síðustu leiktíð, en Kings-menn hefðu auðvitað ekki verið samkvæmir sjálfum sér nema þeir hefðu látið hann fara fyrir að sýna þennan pótensjal allt í einu.

Snillingurinn Rick Carlisle var fljótastur að bregðast við þegar ljóst varð að óæðri Curry-inn væri skyndilega á lausu.

Það hefur alltaf verið vitað að strákurinn gæti skotið þokkalega, enda hefur það komið á daginn að fólki með Curry-genamengið virðist allt að því ófært um að hitta körfuboltum illa ofan í körfur.

Já, hann Seth virðist ekki aðeins hafa náð að sanna sig hjá Dallas, heldur er hann bara að spila eins og engill þessa dagana. Svo vel hefur hann verið að spila, að það er meira að segja hægt að þræta fyrir það að hann sé á einhverjum sviðum að skáka bróður sínum! Það hefði þótt saga til næsta bæjar fyrir tveimur árum síðan. Nú, eða tveimur mánuðum. Þú ræður.

Nú vitum við öll að Stephen Curry er þetta trúaða og brosmilda ofurkrútt sem krúttar allt í drasl, bregst vel við mótlæti og forgangsraðar rétt; liðið kemur alltaf fyrst.

En ætli það sé þannig í matarboðum í Curry fjölskyldunni í dag? Ætli Seth sé þannig ekki bara minna krútt heldur en Steph, heldur kannski bara algjör fáviti? Þið vitið, svona ógeðslega stríðinn, en svona nastí stríðinn gaur. Gaur sem gengur alltaf lengra en æskilegt er og þig langar reglulega að berja í andlitið með kúbeini.

Með öðrum orðum: Ætli Seth Curry sé alltaf að senda bróður sínum snapp þessa dagana, þar sem hann öskrar í símann sinn eitthvað á þessa leið: ÞÚ ERT BARA FOKKÍNG AUMINGI OG ÉG HEF ALLTAF SAGT AÐ ÉG VÆRI BETRI EN ÞÚ OG KONAN ÞÍN ER FEIT OG RILEY ER EKKERT KRÚTTLEG - HÚN ER BARA FREK OG LEIÐINLEG OG ÞAÐ ER EKKI NOKKUR EINASTI AGI Á ÞESSU BARNI YKKAR! OG MUNDU SVO AÐ ÉG ER BETRI EN ÞÚ, DRUSLAN ÞÍN! NANA-NANA-BÚÚÚ-BÚÚÚ!

Við skulum sannarlega vona ekki.

Steph vegna.


Friday, September 11, 2015

EM uppgjörið


Það var nýtt fyrir okkur öllum að fara með karlalandsliðinu okkar á stórmót í körfubolta og tilfinningarnar innra með okkur að loknu móti eru því einnig framandi. Það er erfitt að lýsa hugarástandinu eftir EM, en trúlega eigum við það öll sameiginlegt að vera full af þakklæti og stolti.

Strákarnir okkar voru í sannkölluðum martraðarriðli á mótinu, en við förum aldrei ofan af því að það var af hinu góða. Af hverju ekki að hitta keisarann ef maður fer til Rómar á annað borð?

Eins og alþjóð veit, náðum við ekki að vinna leik á mótinu þó oft stæði það tæpt, aldrei eins tæpt og í lokaleiknum gegn Tyrkjum í gær. Auðvitað hefði verið gaman að vinna svona sterka þjóð í lokaleiknum á mótinu, en risaskotið hans Loga sem kom okkur í framlengingu tryggði að við fengum öll eitthvað ógleymanlegt fyrir peninginn. Það var frábær punktur aftan við þessa ævintýralegu daga í Berlín.



Án þess að fara út í einhvern þjóðernisfasisma, er það alveg rétt að körfuboltafjölskyldan okkar ytra gerði þetta mót líka eftirminnilegt, eins og karfan.is náði að sýna okkur eftir lokaleikinn.



Nú ætlum við ekki að hætta okkur út á þann hála ís að fara að leikgreina spilamennsku íslenska liðsins, en það vakti athygli okkar hvað strákarnir náðu að halda planinu sínu vel í vörn og sókn. Ef við eigum að vera alveg hreinskilin, bjuggumst við frekar við því að íslenska liðið yrði gólfmotta fyrir þessa sterku mótherja en að það ætti eftir að standa í þeim.

Trúlega hafa fleiri en færri sem á annað borð vissu hvað liðið var að fara út í í þessum riðli, reiknað með að töpin yrðu stærri. Pappírslegur gæðamunur á liðunum var einfaldlega það mikill og við höfum tekið eftir því að margur Íslendingurinn sem heima sat gerði sér enga grein fyrir því.

Við sáum nokkrar athugasemdir frá Jónum utan úr bæ á Facebook þar sem þeir voru að hneykslast á þessari glórulausu jákvæðni og hrósi í garð landsliðsins eftir hvern tapleikinn á fætur öðrum. Þetta fólk áttaði sig ekki á samhenginu og ekkert við því að gera, en kannski væri bara hollt fyrir okkur öll að tileinka okkur svona hugarfar í garð allra landsliðanna okkar.

Thursday, August 28, 2014

Ísland á EM í körfubolta (+ myndir)


Karlalandsliðið okkar í körfubolta er búið að tryggja sér sæti í lokakeppni Evrópumótsins í fyrsta skipti í sögunni og körfuboltaáhugamenn á Íslandi vita hreinlega ekki hvað þeir eiga af sér að gera.

Þetta varð ljóst þrátt fyrir að liðið tapaði 70-78 á heimavelli fyrir Bosníumönnum og Hersigóvum í gærkvöldi. Tölfræðisérfræðingarnir okkar sögðu okkur að íslenska liðið væri sama og komið áfram vegna stöðunnar í öðrum leikjum áður en flautað var til leiks í Höllinni í gær. Íslenska liðið hefði þurft að tapa með yfir 30 stiga mun til að eiga á hættu að sitja eftir. Það var aldrei uppi á teningnum í þessum hnífjafna leik, þar sem gestirnir reyndust sterkari í lokin.

Það kemur enda lítið á óvart að Bosnía skuli vinna körfuboltaleik. Þetta er flott lið hvort sem í það vantar NBA leikmann eða ekki. Sérstaklega þótti okkur varnarleikur beggja liða sterkur í gær og það var varnarleikur gestanna sem tryggði þeim sigurinn að lokum. Íslenska liðið fann ekki svör í sókninni á síðustu mínútunum. Burðarásar eins og Stefánsson skiljanlega orðnir nokkuð þreyttir.

Það vantaði kannski skorunarmaskínu frá Brooklyn Nets í lið gestanna, en líklega hefur skarðið sem Hlynur Bæringsson skildi eftir sig verið enn stærra fyrir íslenska liðið.

Eins og atmennið sem hann er, spilaði Hlynur nokkrar mínútur á krambúleruðum ökklanum, en gat skiljanlega ekki beitt sér að fullu.

Þetta nýttu risarnir frá Bosníu sér vel og það gefur augaleið að ein stærsta breytan á bak við sigur þeirra var yfirburðir þeirra undir körfunni - bæði í sókn (54% nýting í tvistum gegn 32% hjá íslenska liðinu) og í fráköstunum (44-35).

Þetta var fín æfing fyrir strákana okkar á þessu sviði, því þeir eiga eftir að þurfa að kljást við ófáa risana þegar þeir koma á EM, hvar sem það verður nú haldið.

Annars erum við sammála Hauki Helga Pálssyni, sem í samtali við Guðmund Marínó Ingvarsson á Vísi sagði að líklega hefðum við tekið þennan leik ef Hlynur hefði verið 100% heill. Það er grábölvað að vera án hans eins og þið sáuð þegar andstæðingar okkar dældu boltanum hvað eftir annað inn í teiginn og fóru illa með miklu lágvaxnari leikmenn íslenska liðsins.

Þetta lagaðist aðeins þegar þjálfarinn sendi Natvélina á vettvang og við hefðum viljað sjá hana lengur en í sjö mínútur inni á vellinum.

Monday, August 11, 2014

Ljómandi sigur hjá landsliðinu


Það kom ansi mörgum á óvart a strákarnir okkar í körfuboltalandsliðinu tækju Stór-Bretana og flengdu 83-70 þá í Laugardalshöllinni í kvöld. Piltarnir okkar virðast hinsvegar hafa vitað það allan tímann að þeir ættu eftir að taka þetta.

Af því við höfum ekki hundsvit á körfubolta, spurðum við okkur reyndara fólk út í breska landsliðið og styrk þess. Allir voru á einu máli um að lið sem tryggir sér sæti á hverju stórmótinu á fætur öðru (án þess að nota NBA-menn í undankeppnum) hljóti bara að kunna körfubolta, jafnvel þó Alan Bannister sé hættur að spila.

Þið eruð öll búin að sjá og lesa um hvernig þetta fór allt saman. Hvernig piltar eins og Haukur Pálsson og Martin Hermannsson virtust ákveða það í síðari hálfleiknum að nú væri best að vinna körfuboltaleik.

Mikið er búið að ala þessa stráka vel upp á körfuboltasviðinu.

"Rosalega er gaman að sjá þessa ungu stráka. Þeir mættu bara og kláruðu leikinn!" sagði fyrrum landsliðsmaður himinlifandi eftir leikinn. Brosti hringinn eins og synir hans hefðu verið að vinna Nettómótið.

Flestir strákanna voru að gera eitthvað skemmtilegt fyrir okkur í kvöld. Hlynur Bæringsson Hlynur Bæringsson-aði til dæmis yfir sig með 14/15 leik, hörkuvörn, baráttu og er sjálfsagt enn að plokka tennurnar á Englendingunum úr olnbogunum á sér. Okkur þykir svo vænt um Hlyn.

Wednesday, July 23, 2014

LeBron og frú krúttuðu í buxurnar (mússí-mússí)


LeBron James er mögulega óvinsælasti maðurinn í hverfinu sínu vegna þeirrar gríðarlegu athygli sem hann fær frá fjölmiðlum. Þegar James liggur undir feldi og skipuleggur Ákvarðanir í huganum, er allt vitlaust í kring um húsið hans. Okkur er ekki ljóst hvað vakir fyrir öllum þessum fjölmiðlamönnum og konum með þessu áreiti. 

Hafi það farið í taugarnar á nágrönnum James-fjölskyldunnar, er sá pirringur alveg örugglega búinn núna, því Cleveland-maðurinn verðandi sendi öllum nágrönnum sínum kökur til að lina þjáningar þeirra. Þær líta út fyrir að vera góðar og orðsendingin sem fylgir er auðmjúk bæð´og mússí-mússí.


Friday, June 27, 2014

Huggulegt uppátæki hjá Silver og NBA-mönnum


Einhver ykkar hafa eflaust frétt af ógæfu Isaiah Austin frá Baylor-skólanum. Aðeins fjórum dögum fyrir nýliðavalið, greindist miðherjinn með alvarlegan sjúkdóm, sem þýðir að hann mun líklega aldrei spila körfubolta framar.

Þetta eru auðvitað skelfileg tíðindi fyrir þennan unga mann, sem var nokkrum dögum frá því að öðlast fjárhagslegt frelsi til æviloka. Flestir hölluðust að því að Austin yrði tekinn seint í fyrstu umferðinni eða snemma í þeirri annari, en þarna var ljóst að ekkert yrði af því. Við erum ekki læknar, en sumir segja að pilturinn megi þakka fyrir að veikindi hans hafi komið í ljós núna, því þau eru lífshættuleg.

Þrátt fyrir þetta mótlæti, var Austin samt mættur á nýliðavalskvöldið í Brooklyn í nótt. Hafi einhver furðað sig á því af hverju, fékk sá hinn sami svör við því þegar kom að því að velja fimmtánda leikmanninn í valinu.

Þá gerði Adam Silver forseti deildarinnar hlé á dagskránni, kynnti Austin til leiks og "valdi hann" svo fyrir hönd allrar NBA deildarinnar. Miðherjinn ungi fékk því að stíga á sviðið og taka í höndina á Silver eins og hann hafði dreymt um að gera síðan hann var barn.

Það má vel vera að einhverjum finnist þetta vera full tilfinningaklámfengið atriði, en okkur þótti þetta fallegur virðingarvottur af hálfu deildarinnar. Það er áberandi betri tilfinning að fylgjast með Adam Silver sinna starfi forseta NBA deildarinnar en hrokafullum forvera hans David Stern. Silver gefur af sér jákvæðan þokka og er í alla staði mannlegri og geðþekkari náungi.

Já, það var gaman að sjá hann Austin fá þarna smá móment til að nota sem hvatningu í baráttunni sem fram undan er hjá honum. Hérna fyrir neðan sérðu myndband af þessu skemmtilega augnabliki. Eftir seremóníuna er svo tekið viðtal við Austin, en það var einmitt framkvæmt af Jay Williams, manni sem veit allt um það hvernig er að sjá NBA ferlinum sópað í burtu á einu augnabliki.




Wednesday, June 18, 2014

Luke Bonner er Matt Bonner



Fagmaðurinn Matt Bonner var að vinna sinn annan titil með San Antonio Spurs á dögunum.

Bonner varð líka meistari með Spurs á fyrsta árinu sínu með félaginu árið 2007, en hann var áður á mála hjá Toronto Raptors.

Bonner var í liði Toronto daginn sem Kobe Bryant sallaði 81 stigi á Raptors í janúar árið 2006 og ef hann hefði verið óheppinn, hefði það kannski verið atriðið sem hann hefði verið frægastur fyrir á NBA ferlinum.

En þá kom San Antonio til sögunnar. Bonner er 33 ára gamall en hefur aldrei spilað 24 mínútur í leik í NBA. Hlutverk hans hjá liðinu hefur verið mjög misjafnt og hann hefur t.a.m. aldrei skorað minna að meðaltali í leik en hann gerði í vetur (3 stig).

Bonner er samt alltaf klár í slaginn þegar kallið kemur og það er þess vegna sem Gregg Popovich kýs að hafa hann í liðinu sínu. Það þurfa allir að vera með menn eins og Bonner í hópnum.

Hann gengur ýmist undir gælunafninu Rauða eldflaugin eða Rauða Mamban, sem er bein vísun í Kobe Bryant (Svörtu mömbuna) og er með betri gælunöfnum í deildinni. Bonner hefur leitt NBA deildina í þriggja stiga nýtingu og hefur meira að segja náð öðru sæti í þriggja stiga keppninni um Stjörnuleikshelgina.

Bonner á lítinn bróðir sem heitir Luke Bonner og er þremur árum yngri. Það er kannski ekki sanngjarnt að kalla hann lítinn, enda er hann langt yfir tvo metra á hæð eins og bróðir hans.

Luke hefur ekki náð eins langt í boltanum og bróðir hans. Hann er búinn að spila í Evrópu sem atvinnumaður en hefur líka reynt fyrir sér hjá Austin Toros, D-deildarliðinu undir San Antonio Spurs.

Þegar Luke var spurður að því hvaða hlutverki hann gegndi í liði Toros, stóð ekki á svarinu.

"Ég er svona Matt Bonner-inn hjá Toros."

Þeir bræður eru duglegir við að láta gott af sér leiða og halda reglulega tónleika og körfuboltauppákomur til að safna fé til góðgerðarmála. Eru meira að segja með heimasíðu í kring um uppátækið sitt, sem kalla mætti Rokksjóðinn. Þú getur séð hana hér.

Friday, January 17, 2014

Fulltrúi NBA Ísland á Úlfavaktinni í Heiðurshöllina


Lesendur NBA Ísland eru alltaf á ferð og flugi og það er dásamlegt hvað þeir eru duglegir við að fara á NBA leiki sem fulltrúar NBA Ísland klæddir í bolinn góða.

Nýjasta myndin frá þessu tilefni er sannarlega með þeim dýrari sem borist hafa, en þar fer enginn annar en séra Guðni Már Harðarson úr Lindasókn í Kópavogi. Séra Guðni er mikill áhugamaður um íþróttir og er einn harðasti stuðningsmaður Minnesota Úlfanna hér á landi.

Guðni var svo heppinn að fá að stunda nám í Minnesota og gat því laumað sér á leiki með Úlfunum af og til. Úlfavaktin góða er orðin alþekkt fyrirbæri hjá NBA-hneigðum Twitternotendum sem eiga það til að vaka fram eftir nóttu.

Ritstjórn NBA Ísland er óhemju montin af því að geta kallað séra Guðna fýsískan fulltrúa síðunnar á Úlfavaktinni.

Við ætlum því að nota þetta tækifæri til að tilkynna ykkur að séra Guðni Már hefur hér með verið innvígður í Heiðurshöll NBA Ísland fyrir að standa Úlfavaktina af drengskap fyrir hönd síðunnar og hreinlega fyrir að vera toppmaður í alla staði. Hann lengi lifi - húrra, húrra, húrra!

Sunday, November 24, 2013

Töff samantekt hjá Ísfirðingum


Flestum sem búa utan Vestfjarðakjálkans góða, vex það í augum að bruna alla leið á Ísafjörð jafnvel þó gæðakörfubolti sé í boði. Þess vegna er ómetanlegt að fyrir vestan sé metnaðarfullt fólk sem sýnir leiki KFÍ á netinu og tekur svo saman svona fallega pakka handa okkur sem búum í öðru landshlutum, hvort sem það er á Vopnafirði, Djúpavogi, Höfn, Reykjavík, Stykkishólmi, Hvammstanga, Húsavík eða Kópaskeri. Hérna fyrir neðan eru léttar svipmyndir frá leik KFÍ og Grindadvíkur í gær. Þetta er vel gert.

Berst Háskólanum aðstoð úr óvæntri átt?


Munið þið eftir Gilbert Arenas? Ef ekki, er hann leikmaður sem spilaði einu sinni í NBA deildinni en átti það leiðinlega oft til að meiðast. Það kom þó ekki í veg fyrir að menn (Washington, Orlando) væru til í að borga honum fullt af peningum.

Arenas blessaður er þannig þriðji launahæsti körfuboltamaður í heimi í ár samkvæmt uppgefnum tölum, þó hann hafi ekki spilað í NBA deildinni í nokkur misseri. Tæknilega á Orlando að punga út rúmum 2,7 milljörðum króna handa honum í vetur, en sagt er að félagið hafi nýtt sér klásúlur í kjarasamningum til að draga þessar greiðslur eitthvað aðeins á langinn, eða út árið 2016.

Það breytir því ekki að Arenas á enn inni mjög góða summu. Fregnir herma að þessi summa hlaupi á rúmum fjórum og hálfum milljarði króna.

Og eins og við hérna á NBA Ísland gerum gjarnan, þótti okkur upplagt að leggja til hvað hægt væri að gera fyrir alla þessa peninga annað en að borga manni þá sem mætir ekki einu sinni í vinnuna.

Þeir segja að Hús íslenskra fræða komi til með að kosta 3,4 milljarða íslenskra króna. Það er reyndar íslensk kostnaðaráætlun og þær eru álíka marktækar og bókhaldið hjá Juventus.

Verk á borð við þetta fer alltaf lágmark tvö ár fram úr verkáætlun og slíkar tafir - fyrir utan pólitíska vafninga og annan séríslenskan hálfvitagang - ættu að gera það að verkum að þessar 4600 milljónir sem Arenas er sagður eiga inni gætu fyllt nokkuð vel upp í framkvæmdina.

Ef okkur vantar 100-200 milljónir upp á, gæti Arenas að sjálfssögðu selt eitthvað af dótinu sem hann er hættur að nota. Til dæmis súrefnisklefann sem hann svaf í á nóttinni þegar hann var að ná sér af meiðslunum - nú eða hvítu krókódílana sem hann er alveg örugglega með í bakgarðinum hjá sér.

Þetta er win win krakkar. Bara að koma SDG og Arenas saman á Skype og negla þetta.

Það var ekkert.

Wednesday, October 30, 2013

Lúxuskvöld í Hafnarfirði


Ungt lið Hauka er án nokkurs vafa eitt skemmtilegasta liðið í Dómínósdeild karla, en það er ekki bara liðið þeirra sem er í blússandi uppsveiflu. Haukarnir slógu nefnilega upp veislu í tilefni tvíhöfðans við Snæfell.

Við erum ekkert að deyja úr hrifningu yfir því að plögga eitthvað dæmi sem snertir okkur ekki beint, en það er ekkert nema sómi af því að Valitor hafi haldið upp á flutning sinn í Hafnarfjörðinn með því að bjóða áhorfendum frítt á tvíhöfðann.

Fyrir vikið var mætingin á leikina til mikils sóma. Við erum ekki með staðfestar tölur um mætinguna, enda skiptir það ekki höfuðmáli. Það sem skiptir máli er að fólk fjölmennti og hvatti bæði stráka og stelpur af miklum móð.

Þá veittum við því athygli að Haukarnir fíruðu líka upp í grillinu og smelltu í nokkra burgers. Vel má vera að þetta hafi oft verið gert á Ásvöllum, en við tókum sérstaklega eftir grillstemningunni í Hafnarfirðinum í kvöld. Þar mátti sjá höfðingja eins og Marel Guðlaugsson munda grilltöngina.

Það er bara eitthvað við andrúmsloftið sem skapast þegar kveikt er í grillinu fyrir leiki og mætingin er góð líkt og oftast er hjá t.d. KR-ingum og Stjörnumönnum, þó mætingin hjá síðarnefnda klúbbnum mætti vera miklu betri.

Við ætlum bara að nota þetta tækifæri og hrósa Haukunum fyrir flotta umgjörð í kvöld. Félagið er vissulega með frábær lið í karla og kvennaflokki, en svona flott umgjörð ber vott um klassa og metnað. Vel gert, Haukar.

Saturday, August 3, 2013

Yao fílaði sig vel í Afríku


Yao Ming berst gegn veiðiþjófum. Þetta kunnum við að meta. Þessar skemmtilegu myndir voru
teknar í ferð hans til Suður-Afríku og Kenýa í fyrra. Sá stóri er að henda einhverjum peningum
í málefnið og það er meira en líklegt að hann sé þegar búinn að gera meira gagn í þessu en hann
gerði nokkru sinni á körfuboltavellinum. Það segjum við með fullri virðingu fyrir spilamennsku
hans með Houston Rockets á sínum tíma.








Thursday, July 11, 2013

Joakim Noah skoraði mark og hataði það alveg


Miðherjinn skemmtilegi Joakim Noah hjá Chicago Bulls skoraði þetta laglega mark í góðgerðaleik á vegum Steve Nash. Eins og sjá má á fagnaðarlátunum, var Noah að hata þetta allt saman.

Sunday, June 2, 2013

Miami og Indiana mætast í hreinum úrslitaleik


Það ræðst ekki fyrr en á mánudagskvöldið hvort það verður Miami eða Indiana sem mætir San Antonio í úrslitaeinvíginu um meistaratitilinn í NBA.

Það á ekki að koma neinum hrikalega á óvart að þetta fari í oddaleik. Indiana var þegar búið að vinna tvo leiki gegn Miami og bætti einum við í nótt með góðum 91-77 sigri á flotta heimavellinum sínum. Ekki kom það okkur neitt sérstaklega á óvart.

Það sem kom okkur á óvart, var hinsvegar blóðlaus frammistaða Dwyane Wade og Chris Bosh. Enn eina ferðina. Meiðsli eiga þarna einhvern þátt, en okkur er alveg sama. Wade og Bosh eru í besta falli tálbeitur eins og þeir eru að spila núna - eru inni á vellinum til að draga athyglina frá LeBron James.

James konungur hefur oft átt betri leik en í nótt, sem segir sína sögu um standardinn sem hann hefur sett fyrir sjálfan sig og þarf helst að toppa í hverjum leik.

98% af leikmönnum deildarinnar myndu gráta af gleði ef þeir næðu að skora 29 stig, hirða 7 fráköst og gefa sex stoðsendingar með um 50% hittni. Hjá James heitir þetta bara bleh leikur.

 James skaut 48% í nótt, en restin af liðinu 26%. Miami endaði með 36% skotnýtingu í leiknum, sem er það versta í allan vetur í deildakeppni eða úrslitakeppni.

Ef þessar svokölluðu stórstjörnur í Miami verða að taka hausinn út úr ristlinum á sér og fara að spila eins og menn ef þeir ætla ekki í sumarfrí. Spilamennskan sem þeir eru að sýna í undanförnum leikjum er grátleg.

Chris Bosh er með sex stig að meðaltali í síðustu þremur leikjum, þar sem hann hefur aðeins hitt úr fjórum af 21 skoti utan af velli. Viltu heyra annan? Hann nær ekki fjórum fráköstum að meðaltali í leik í einvíginu. Hann er 211 sentimetra hár og vegur um 110 kíló.

Dwyane Wade hefur verið í svipuðu rugli. Í síðustu þremur leikjum hefur hann hitt úr 11 af 34 skotum sínum ( 33%) og skilar innan við tólf stigum að meðaltali í leik. Þeir Bosh og Wade eru samanlagt með 35 milljónir dollara í árslaun. Bosh eilítið hærri laun en Wade - þau sömu og LeBron James upp á krónu - 2,15 milljarða króna á ári. Og hækkar í launum á næsta ári. Umtalsvert.

Það getur vel verið að Wade sé að drepast í hnénu og Bosh sé aumur í ökklanum sem hann sneri um daginn - okkur er bara alveg sama. Svona spila meistarar ekki, enda er nákvæmlega enginn meistarabragur á Miami í síðustu þremur leikjum. Enginn.

Þeir Wade og Bosh skoruðu aðeins 15 stig í sjötta leiknum í gær og það er það lægsta sem þeir hafa skorað samanlagt síðan Bosh (og LeBron James) gekk í raðir Miami. Eldra metið var 17 stig og það jöfnuðu þeir í þarsíðasta leik, svo það fer ekki fram hjá nokkrum manni að hér er eitthvað að.

Eins og við höfum áður sagt, verður auðvitað að gefa varnarleik Indiana plús fyrir eitthvað af þessu, en hann einn og sér á ekki að geta eyðilagt leik Miami.

Sólstrandargæjarnir skoruðu ekki nema fimm sinnum undir körfunni í leiknum og hafa aðeins einu sinni í vetur skorað færri körfur þar. Það var að sjálfssögðu á móti Indiana sem það gerðist, nánar tiltekið í janúar.

Indiana spilaði ljómandi vel í sóknarleiknum í nótt með Paul George fremstan í flokki. Pilturinn skoraði 28 stig og hitti úr 11 af 19 skotum sínum annan leikinn í röð. Hann hirti auk þess 8 fráköst og gaf 5 stoðsendingar.

Roy Hibbert vinur hans var líka frábær með 24 stig og 11 fráköst, en það er nokkurn veginn meðaltalið hans í einvíginu.

Þetta var fimmti leikurinn í röð sem Hibbert fer yfir 20 stig og er það í fyrsta skiptið í vetur sem hann nær því.

Hann skoraði einu sinni 20 stig eða meira í fjórum leikjum í röð í haust, en þar fyrir utan voru bara einn og einn 20 stiga leikur á stangli hjá honum. Gott að spila á móti Miami.

Nú er ljóst að við förum í hreinan úrslitaleik í þessu einvígi - leik sjö í Miami á mánudagskvöld.

Ef tölfræðin er skoðuð, kemur í ljós að heimaliðið er með afgerandi betri árangur en útiliðið í þessari stöðu. Heimaliðið hefur unnið tæp 80% af öllum oddaleikjum sem spilaðir hafa verið í sjö leikja seríum í NBA (89-112). Á hinn bóginn er reyndar ekki langt síðan útiliðið vann sigur í oddaleik, því Chicago lagði Brooklyn á útivelli í eina oddaleiknum sem verið hefur í úrslitakeppninni í ár.

Miami hefur unnið þrjá af sex oddaleikjum sem það hefur tekið þátt í, en þar af fóru fimm þeirra fram á heimavelli liðsins. Síðasti sigur Miami í oddaleik kom gegn Boston Celtics í úrslitum Austurdeildarinnar í fyrra. Þessu er öfugt farið hjá Indiana, sem hefur unnið tvo en tapað þremur oddaleikjum og voru þeir allir á útivelli.

Miðað verið frammistöðu liðsfélaga LeBron James í síðustu leikjum, mætti ætla að Miami þurfi á ofurmannlegu framlagi að halda frá honum á mánudagskvöldið. Hann hefur þrisvar sinnum farið í oddaleik á ferlinum, tapaði í tvígang með Cleveland á útivelli en vann áðurnefnt einvígi við Boston fyrir ári.

James hefur skorað yfir 34 stig að meðaltali í leik í oddaleikjum á ferlinum og er það hæsta meðaltal í sögu deildarinnar ef miðað er við fleiri en einn leik spilaðan.

Þetta voru nokkrir tölfræðimolar sem við fengum að láni frá ESPN. Þessar tölur skipta auðvitað ekki nokkru máli þegar komið er í leikinn sjálfan á mánudagskvöldið, en úrslitin í nótt þýða að það er komin upp alveg ný staða í einvíginu í okkar huga.

Indiana getur unnið það.

Guttarnir hjá Pacers hafa verið að elta allt einvígið, en nú eru þeir allt í einu búnir að ná meisturunum og þá blasir við að taka fram úr þeim. Það er erfitt en þægilegt að elta, en allt önnur ella að taka fram úr. Aðeins hugrakkir og skapfastir menn geta klárað svoleiðis - ekki síst á útivelli.

Á pappírunum á Miami að vinna þennan oddaleik vandræðalítið og mun eflaust gera það, en þegar þú ert kominn í hreinan úrslitaleik, má ekkert klikka.

Öll pressan í einvíginu er nú farin af Indiana og hleðst á Miami.

Hugsið ykkur bara. Hvað í fjandanum ætlar Miami að gera ef svo ólíklega vildi til að LeBron James myndi nú eiga skítaleik á mánudaginn? Akkúrat - þeir væru (mök)!

Við skulum þvi segja að allt geti gerst af því þetta er oddaleikur. Það er alltaf mjög spes andrúmsloft þá sjaldan að spilaðir eru hreinir úrslitaleikir í NBA deildinni.

Nánast allir sem fylgjast eitthvað með spáðu Miami í úrslitin (eða lengra) en nú er sá möguleiki allt í einu kominn upp á borðið að það komist ekki í úrslit líkt og tvö síðustu ár.

Hugsið ykkur hvað sögusviðið breytist gígantískt ef meistararnir detta út. Indiana og San Antonio í úrslitum? Það væri eins og Njarðvík-Skallagrímur - enginn LeBron og markaðsdeildin færi í þunglyndi. Út frá körfuboltasjónarmiðinu væri samt ekkert að því, þó hinn möguleikinn sé meira sexý.

Það hefur aldrei gerst að lið hafi farið óverðskuldað í lokaúrslit. Menn þurfa að vinna fyrir því og guttarnir í Indiana eru búnir að vinna sér inn fyrir þessum séns. Nú er bara að sjá hvort þeir hafa pung í að taka hann. Þetta eru leikirnir sem við borgum fyrir að fá að sjá. Sagan skrifuð á staðnum.

Sunday, February 24, 2013

Rodney Rogers gefst ekki upp


Framherjinn Rodney Rogers var skemmtilegur leikmaður á að horfa þegar hann spilaði í NBA deildinni.

Rogers lék m.a. með Denver, LA Clippers, Phoenix, New Jersey og Philadelphia. Hann var með um 11 stig og 4,5 fráköst á ferlinum. Var sterkur og góður íþróttamaður en leið reyndar best fyrir utan línu í sókninni eins og svo mörgum.

Ef þú horfðir á sjónvarpsþáttinn NBA Action á tíunda áratugnum, komstu ekki hjá því að sjá nokkur tilþrif með Rogers. Við munum vel eftir nokkrum andlitsmeðferðum sem hann gaf á þessum tíma.

Fyrir nokkrum árum lenti hann í því að detta af torfæruhljóli og hljóta mænuskaða. Hann hefur meðal annars dáið þrisvar, en alltaf kemur hann til baka.

Hér fyrir neðan er nýlegt viðtal sem Chris Webber tók við vin sinn og fyrrum liðsfélaga. Ekki hægt að segja annað en að Rogers sé baráttumaður með andann í lagi. Hann er líka greinilega með magnaða konu sér við hlið. Það eru forréttindi. Það vita þeir sem eru svo heppnir.


Thursday, December 20, 2012

5000 snuddur hjá Paul


Chris Paul náði þeim áfanga í nótt að gefa 5000. stoðsendinguna sína í 510. leiknum sínum á ferlinum. Paul er á svipuðu róli og bestu sendingamenn sögunnar og hér fyrir neðan sérðu skilti sem sýnir okkur þá leikmenn sem voru fljótastir að ná í 5000 stoðsendingar á ferlinum.



















Monday, December 3, 2012

Tuesday, May 8, 2012

Kemp rúllar upp Shakespeare


Það er gaman að sjá að Shawn Kemp er ekki bara lifandi, heldur er liðtækur á leiksviðinu, jafnvel þó hann sé 200 kíló. Þá vitum við það.