Goðsögn í vanda

Tweet

Lesendur NBA Ísland í gegn um árin vita að ritstjórnin á í nokkuð flóknu sambandi við skotbakvörðinn og goðsögnina Kobe Bryant hjá Los Angeles Lakers. Við berum virðingu fyrir Kobe út af því sem hann hefur afrekað á löngum og glæstum ferli sínum, en síðari ár höfum við átt það til að stríða honum dálítið vegna hugarfars hans og leikstíls.

Það var allt í lagi að gera stundum grín að Kobe Bryant, því hann hefur alltaf staðið undir því og meira til. Hann var kannski á of háum launum og skaut kannski aðeins of mikið en það var allt í lagi, því Lakersliðið undanfarin ár er svo lélegt að það skiptir engu máli hvort Kobe tekur 3 eða 30 skot. Því ekki að halda bara áfram að bomba og reyna að slá met áður en skórnir fara á hilluna?

En svo byrjuðu bölvuð meiðslin að setja strik í reikninginn og eins og þið vitið hafa þau allt nema eyðilagt fyrir honum tvö keppnistímabil í röð. Þegar öll þessi meiðsli eru svo lögð ofan á skrokk sem búið að níðast á í tuttugu ár, er útkoman einhver elsti 37 ára gamli íþróttamaður veraldar.

Það var byrjað að bera á því áður en öll þessi meiðsli komu til. Kobe var byrjaður að dala verulega sem leikmaður, því skrokkurinn á honum var hættur að gera það sem honum var sagt.

Þetta kemur fyrir okkur öll á endanum og flest okkar sætta sig við það og aka eftir aðstæðum.

Ekki Kobe Bryant - varla hefur þú reiknað með því.

Við munum eftir viðtali sem Amad Rashad tók við Bryant fyrir nokkru þar sem hann sýndi áður óþekkta auðmýkt og viðurkenndi að meiðslavesenið hefði fengið á hann.

Var þetta ávísun á að þessi samviskulausi skorari væri farinn að þroskast og ætlaði að taka hugarfar sitt og leikstíl til endurskoðunar?

Ekki svo mikið.

Varast ber að stökkva á of miklar alhæfingar á 82 leikja keppnistímabili þegar búið að spila 5% af því, en nú er ljóst að allir eru farnir að hafa áhyggjur af Kobe Bryant. Bæði við og þið - og meira að segja hann sjálfur. Bryant kallaði sjálfan sig 200. besta leikmann deildarinnar í viðtali á dögunum, þar sem hann fór ófögrum orðum um sjálfan sig - sagðist frekast sjúga.

Það bætir svo ekki úr skák að Lakers skuli vera með eitt lélegasta lið í sögu félagsins um þessar mundir. Það er án sigurs í fjórum leikjum og er með lélegustu vörnina í NBA (fær á sig 113 stig á hverjar 100 sóknir andstæðinga sinna) og það ekki í fyrsta skipti. Og varnarleikurinn er meira að segja áberandi verri þegar Kobe Bryant er inni á vellinum (nærri 117 stig per 100 sóknir), sem er ákveðið afrek.

Við máttum bara til með að skrifa nokkur orð um þetta sérstaka vandamál sem komið er upp í gula hluta Los Angeles í dag, af því við höfum aldrei séð neitt þessu líkt áður. Ein af goðsögnum leiksins - einn besti skotbakvörður í sögu körfuboltans - stendur skyndilega frammi fyrir þeirri staðreynd að hann er ekki skugginn af sjálfum sér. Sjáðu t.d. þessa átakanlegu loftbolta:

Svartsýnustu menn spáðu því að öll þessi meiðsli gætu átt eftir að gera út af við Kobe og raunar þurfti enga svartsýni til. Skrokkur á þessum aldri með allt þetta slit, hefur einfaldlega ekki efni á að meiðast jafn illa og raun bar vitni hjá Kobe Bryant og höggið núna er enn þyngra af því hann er búinn að vera svo lengi frá. Svo poppar hann allt í einu inn í liðið á ný og í ljós kemur að það er allt í einum rjúkandi mínus.

En þarna er ekki öll sagan sögð. Þetta væri kannski ekki svo grábölvað ef Kobe Bryant hefði andlega burði til að takast á við allt mótlætið og setti alla sína orku og einbeitingu í aðlögunarferlið.

Málið er bara að það er ekki stíllinn hans Kobe Bryant. Kobe hefur aldrei farið eftir annari pólitík en sinni eigin - aldrei dansað eftir lögum annara. Hann er búinn að vera maðurinn í fimmtán ár og er búinn að gleyma því hvernig rulluspilarar hjálpa liðum sínum að vinna. Það eina sem kemst að hjá Kobe er að drepa, klára leiki, hleypa alfa-menninu lausu - Svörtu Mömbunni.

Gallinn er bara að lemstraðir fertugir karlar eru engar andskotans Mömbur, sama hve heitt þeir þrá það. Banvæn Svarta Mamban er horfin og í staðinn er kominn drukkinn órangútan með vélbyssu, sem er alveg jafn líklegur til að skjóta sjálfan sig í tætlur og einhvern annan.

Einmitt

Tweet

´Melo dagsins

Tweet

Magnús setti 60

Tweet

Eins og þið vitið er NBA Ísland aldrei nokkru sinni með puttann á púlsinum þegar kemur að fréttamolum í körfuboltanum hér heima og erlendis.

Í kvöld gerði stórskyttan Magnús Þór Gunnarsson hjá Keflavík sér lítið fyrir og skoraði 60 stig í einum og sama leiknum með b-liði Keflvíkinga í sigri þess á b-liði Skallagríms. 

Engan þarf að undra að stigin 60 komu öll úr þriggja stiga skotum, enda engin ástæða til að vera að hnoðast inni í teig þegar lið eru með mann sem setur niður 20 af 35 þristum.

Við erum auðvitað alls ekki fyrsti miðillinn sem segir frá þessu skemmtilega afreki Magnúsar, en við göngum hér skrefinu lengra og sýnum ykkur skotkortið hans Magnúsar úr leiknum. 

Þetta er þjónusta sem við efumst um að þið fáið á hinum miðlunum. Það var ekkert.

Banvæn blanda

Tweet

Hvað er athugavert við þessa mynd?

Jú, það sjá allir að það eru ekki nema tveir boltar á henni - allt of fáir til að þessi mannskapur geti spilað saman körfubolta. Eins og þið vitið þurftu þessir herramenn að spila með einn bolta og því gekk dæmið ekki upp hjá þeim.

Hugsið ykkur. Fólk hélt í raun og veru að þetta ætti eftir að virka!

Það er ekki í lagi.

Íþróttafólkið í Curry-fjölskyldunni

Tweet

Það er nákvæmlega ekkert að því að vera Stephen Curry í dag. Þú ert ungur, myndarlegur, ríkur, vel giftur og besta skytta í heimi. Helvítis álag bara.

Það er ekki víst að yngri lesendur átti sig á því, en það er engin tilviljun að Stephen Curry sé svona hittinn. Pabbi hans Dell Curry var ein besta skytta sinnar kynslóðar í NBA deildinni þegar hann spilaði með frægu liði Charlotte Hornets á tíunda áratugnum.

Þar var hann liðsfélagi manna eins og Muggsy Bogues, Larry Johnson og Alonzo Mourning. Curry eldri skaut ófá liðin í kaf með bombum sínum af bekknum hjá Hornets.

Dell Curry lék með Hornets á árunum 1988-98 og eignaðist nokkur börn á þessum tíma. Eitt þeirra var Stephen Curry - maður sem allir sem fylgjast með NBA í dag þekkja.

Það er eiginlega fyndið að hugsa til þess að Curry hafi enn ekki verið valinn í Stjörnulið, en það verður væntanlega breyting á því í febrúar.

Stephen Curry er ekki eina undrabarnið undan Dell-gamla, því sonur hans Seth Curry spilaði fyrir Duke háskólann og hefur verið að banka á dyrnar í NBA deildinni.

Hann spilar sem stendur með systurfélagi Golden State, Santa Cruz Warriors og fékk að reyna sig hjá Golden State í haust. Hann náði þó ekki að landa samningi og ganga til liðs við bróður sinn.

Sonya Curry, móðir þeirra Curry-bræðra er fyrrum blakspilari og gerði gott mót á því sviði á sínum tíma. Systir þeirra Curry-bræðra, Sydel Curry, er að feta í fótspor móður sinnar og er fantagóð í blakinu.

Sannarlega mikil íþróttafjölskylda og skotvissari en flestar venjulegar fjölskyldur.

Það væri nú ekki leiðinlegt að sjá þá feðga Dell og Stephen fara í asna. Hvor þeirra ætli hefði betur? Kannski að við skerum bara úr um það á staðnum.

Stórskyttan okkar Stephen Curry gekk að eiga unnustu sína Ayeshu Alexander árið 2011* og saman eiga þau eina dóttur.

Dóttirin er svo hrikalega mikið krútt að hún er næstum því jafnmikið krútt og pabbi hennar. Næstum því.  Þú ert ekki mannleg(ur) nema þig langi að klípa í kinnarnar á Steph og tala barnamál við hann.

Eins og sjá má á myndunum þarf móðir litlu stúlkunnar hún Ayesha ekkert að skammast sín fyrir útlitið. Hún er enda fyrrum fyrirsæta og leikkona, eins og um það bil allar konur sem ekki eru þeim mun ljótari í Bandaríkjunum.

Þau Ayesha og Curry eru svona klassískt hæskúl svítharts frá Charlotte og segir sagan að þau hafi bæði verið svo miklir dúllurassar að þau hafi aldrei ætlað að byrja saman. Fjölskyldur þeirra þekktust vel og fólkið var alltaf að tala um hvað væri mikill hjónasvipur með krökkunum tveimur. Nokkuð til í því.

Curry bað kærustu sinnar í innkeyrslunni hjá fjölskyldu sinni, staðnum þar sem hann kyssti hana í fyrsta sinn. Eins og nútímapara er siður, tilkynntu þau þetta að sjálfssögðu á Twitter á sínum tíma. Eru þau ekki óstjórnlegar dúllur?

* Hvað er samt að frétta með sækó-svipinn á Curry á brúðkaupsmyndinni þar sem þau sitja saman á bekknum?

Dæmigerð sókn frá Golden State Warriors

Tweet

Skotkortið hans Melo í úrslitakeppninni

Tweet

Carmelo Anthony hefur verið nokkuð kaldur í úrslitakeppninni til þessa. Til gamans sýnum við ykkur hér skotkortið hans svo þið getið skoðað nákvæmlega hvernig hann er að skjóta utan af velli.

Græni flöturinn þýðir að hann sé að skjóta yfir því meðaltali sem gengur og gerist í deildinni, gult er á pari en rauði liturinn segir að viðkomandi leikmaður sé að skjóta undir meðaltali deildarinnar. Á kortinu hans Melo má segja að tveir hlutir æpi á okkur.

Fyrst er það að hann er ekki að skjóta nema 25% í þristum á vængjunum þar sem hann er að taka megnið af langskotum sínum og í öðru lagi er hann ekki að skjóta nema 40% undir körfunni, sem er hræðileg nýting. Þetta skrifast á menn eins og Kevin Garnett og Roy Hibbert, en sá síðarnefndi er gjörsamlega búinn að loka teignum hjá Indiana í rimmunni við New York.

Chicago er við það að slá út slappa Brooklyn-menn

Tweet

Chicago er komið í 3-1 lykilstöðu í einvígi sínu við Brooklyn eftir sögulegan sigur í þríframlengdum leik fjögur í Chicago í kvöld. Leikmenn Nets eru allt nema úr leik og það er þeim sjálfum að kenna.

Brooklyn leiddi 109-95 þegar skammt var eftir af leiknum, en missti allt niður um sig á lokasprettinum og því varð að framlengja í stöðunni 111-111.

Það var fyrst og fremst ólíkindatólið Nate Robinson sem tryggði Chicago framlengingu með ógurlegri hetjurispu í sókninni. Naggurinn skoraði 34 stig á 29 mínútum og án hans hefði Chicago aldrei unnið þennan leik.

"I always think I'm on fire, kind of like the old school game NBA Jam," sagði Robinson eftir leikinn og laug engu - það var engu líkara en hann væri persóna í leiknum NBA Jam þegar hann var að raða niður skotunum.

Við höfum alltaf sagt að þetta Brooklyn lið fari bara eins langt og leikstjórnandi þess og aðalstjarna Deron Williams ber það.

Williams var úti í drulla í leikjum tvö og þrjú (sem Nets tapaði auðvitað) en var talsvert grimmari í kvöld. Hann á samt meira inni og okkur er alveg sama þó hann hafi skorað 32 stig í leiknum, Kirk Hinrich gerði honum lífið leitt á báðum endum vallarins.

Chicago á skilið gott klapp fyrir frábæra frammistöðu í þessu einvígi. Það er að vinna þessa leiki á frábærum varnarleik og nógu góðum sóknarleik og er komið í 3-1 þrátt fyrir að vera án sínst besta manns og með sinn næstbesta mann haltrandi um völlinn.

Í þúsundasta skipti: Tom Thibodeau er að gera fáránlega góða hluti með Bulls og á líklega skilið að vera kjörinn þjálfari ársins (eins og reyndar sjö aðrir menn, en látum það liggja milli hluta).

Brooklyn hefur engar afsakanir. Þetta er bara lélegt hjá þeim og liðið er að drulla á sig. Gæfulegur fjandi að vera að borga öllum þessum mönnum svimandi há laun og fá þessa frammistöðu fyrir peninginn. Prokhorov getur ekki verið sáttur við þetta. Ætli hann reki ekki PJ þjálfara og ráði Rafa Benitez í staðinn.

Nei, svona án gríns. Þetta er ekki að virka hjá Nets. Deron Williams virðist ekki geta haldið sér nógu heilum til að leiða þetta lið áfram og Joe Johnson var náttúrulega á annari löppinni eins og þið sáuð í kvöld.

Þetta lið hefur náð sér ágætlega á strik inn á milli en svo dettur það niður í ruglið.

Næsti leikur í þessu einvígi verður í Brooklyn á mánudagskvöldið og það getur vel verið að Nets nái að lengja aðeins í snörunni, en þetta lið er aldrei að fara að vinna þrjá leiki í röð á móti Bulls. Það vantar alla stemningu, baráttu og anda í þetta Nets lið og ekki eykst það nú eftir þetta drull í Chicago í kvöld.

Til að súmmera: Kúdós á Bulls, en það verður einhver að hringja á Hreinsitækni til að þrífa upp eftir Nets, sem eru einfaldlega að valda vonbrigðum í vetur þrátt fyrir að hafa bætt árangur sinn mikið í deildakeppninni.

Hér fyrir neðan getur þú séð samantekt af sprengjuárás Nate Robinson á aumingja Nets í kvöld.

Kyrie Irving ákvað að vinna skotkeppnina

Tweet

Það er mesta synd að annars árs maðurinn Kyrie Irving hjá Cleveland Cavaliers hafi ekki verið skráður í troðkeppnina í ár, því hann hefði örugglega unnið hana.

Irving kom sá og sigraði í NBA á nýliðaárinu sínu í fyrra og hann hélt áfram að setja mark sitt á deildina í nótt þegar hann varð mjög óvænt hlutskarpastur í þriggja stiga skotkeppninni.

Margar af bestu þriggja stiga skyttum NBA deildarinnar voru á meðal keppenda, en menn eins og Stephen Curry, Steve Novak og Ryan Anderson ollu okkur miklum vonbrigðum í nótt.

Það voru þeir Irving og Rauða Mamban Matt Bonner sem skutu til úrslita og þrátt fyrir að Bonner hafi sýnt jafna og góða tilburði í báðum umferðum, átti hann bara ekki séns í Irving sem óð eldinn í lokaumferðinni.

Irving skoraði heil 23 stig í úrslitunum, sem er aðeins tveimur stigum frá metinu í keppninni sem er í eigu Craig Hodges (´86) og Jason Kapono (´08) og er 25 stig.

Irving er annar Cleveland-leikmaðurinn sem nær að vinna sigur í skotkeppninni, en eins og eldri menn muna sigraði goðsögnin Mark Price í þessari keppni tvö ár í röð 1993 og 1994.

Það var því sannarlega vel við hæfi að Irving næði að vinna keppnina á 20 ára afmæli fyrri titils stórskyttunnar Mark Price.

Það er eitthvað við Kyrie Irving. Þessi drengur gæti átt eftir að ná langt og er að sýna að hann hefur alla burði til þess.

Við erum alltaf í góðu sambandi við gárungana eins og þið vitið, og í gær voru gárungarnir á einu máli um að Kyrie Irving væri mjög sérstakur leikmaður.

Því til sönnunar bentu þeir á að hann væri elskaður nánast einróma þrátt fyrir að hafa spilað með Duke-háskólanum.

Það er ekki hægt að undirstrika hvað þetta er sterkur punktur.

Irving spilaði kannski ekki mjög marga leiki fyrir Duke, en það er ekkert leyndarmál að hann er einn elskaðasti ungi leikmaðurinn í NBA deildinni og gjörsamlega skilið hvert gramm af þeirri ást.

Góði Hirðirinn

Tweet