Atkinson-kúrinn

Tweet

Njarðvík áfram

Tweet

Njarðvík er komið í undanúrslitin í Flatbökudeild karla eftir 79-75 útisigur á Stjörnunni í Ásgarði í gærkvöldi. Þessi sería er búin að vera myljandi jöfn og skemmtileg og við munum í fljótu bragði ekki eftir seríu þar sem allir leikir unnust á útivelli.

Kannski erum við að verða viðkvæmari með aldrinum, en við finnum alltaf meira og meira til með liðunum sem falla út úr úrslitakeppninni eftir hetjulega baráttu í hnífjöfnum rimmum líkt og Stjarnan var að gera í gærkvöldi.

Það er reyndar meira í þessu. Við erum eflaust að taka tap Garðbæinganna svona inn á okkur af því okkur er farið að þykja svo vænt um höfðingjana í liðinu - bæði leikmenn og þjálfara. Hrafn þjálfari lýsti því yfir í samtali við Vísi að hann hefði áhuga á að halda áfram með liðið og við vonum innilega að hann fái tækifæri til þess.

Hrafn er góður þjálfari og heiðursmaður sem nýtur vináttu og virðingar ritstjórnar NBA Ísland - alveg eins og forveri hans Teitur Örlygsson og raunar báðir þjálfarar Njarðvíkurliðsins. Það er svo auðvelt að halda upp á lið sem eru þjálfuð af svona toppmönnum.

Á svona tímamótum er ekki laust við að við veltum því fyrir okkur hvort meistarar eins og Justin Shouse og Marvin Valdimarsson séu jafnvel farir að hugsa um að minnka eitthvað við sig þegar kemur að því að spila körfubolta. Við vonum að sjálfssögðu ekki, en hver veit.

Það sem við vitum hinsvegar, er að þeir Tómas Hilmarsson og Sæmundur Valdimarsson ætla að vera duglegir að lyfta og æfa sig í sumar og koma geggjaðir til leiks næsta haust (ef þeir stinga ekki af úr landi, það er að segja). Það er búið að vera gaman að sjá þá fá aukið hlutverk hjá liði Stjörnunnar í vetur. Þetta eru að verða fullorðnir menn.

Við óskum Njarðvíkingum til hamingju með að vera komnir í aðra umferðina eftir alla þessa sigra á útivelli. Það er búið að vera óskaplega mikið basl á þeim grænu í allan vetur, aðallega út af meiðslum, og enn sér ekki fyrir endann á því náttúrulega.

Nú er bara að sjá hvernig Njarðvíkingum vegnar á móti Íslandsmeisturunum. Við þurfum ekki að hafa mörg orð um það risaverkefni sem það er að mæta KR og Njarðvíkingar gera sér fulla grein fyrir því, en þeir ættu alveg að geta strítt Vesturbæingunum aðeins. Það eru bæði reyndir og góðir spilarar í þessu Njarðvíkurliði og þjálfarateymið er sannarlega ekki að byrja í þessu.

Við tókum eftir því að Stefán var gestur í Körfuboltakvöldi í gær og þó við hefðum misst af viðtalinu, verandi á vellinum, sögðu strákarnir í Körfuboltakvöldi okkur að Stefán hefði verið í ótrúlega góðum anda þrátt fyrir þessa grængolandi holskeflu mótlætis sem hann hefur orðið fyrir á liðnu ári.

Eitt sem við verðum að geta sérstaklega er mætingin og stemningin sem var í Ásgarði í gær, en bæði var til algjörrar fyrirmyndar. Við eigum ekki aðeins eftir að sakna Stjörnuliðsins í næstu umferð, heldur einnig Silfurskeiðarinnar, stuðningsmannasveitar Garðbæinga, sem er búin að standa sig frábærlega í úrslitakeppninni með skemmtilegum söngvum og tralli. Prik handa þeim.

Nú fáum við sem sagt KR-Njarðvík og Haukar-Tindastóll í semífænalnum.

Vá, það verður eitthvað, krakkar.

Hérna eru nokkrar myndir úr Ásgarði í gærkvöldi:

Haukfránn

Tweet

KR slátraði Njarðvík í frumraun Hauks Helga

Tweet

Við áttum von á talsvert mikið jafnari leik í Vesturbænum í gærkvöldi. Við flýttum okkur í Frostaskólið og tókum upphitun, hitting og burger áður en flautað var til leiks - allt eins og það á að vera fyrir hörkuleik tveggja stórliða.

En Íslandsmeistarar KR voru ekkert á því að halda einhverri spennu í viðureign sinni við Njarðvík. Þeir þurftu hvorki á Helga Magnússyni né Pavel Ermolinski að halda, þegar þeir völtuðu yfir þá grænklæddu 105-76.

Njarðvíkingarnir voru vissulega ekki með fullt lið heldur. Handsprengjan Stefán er í gönguskó og spilar ekkert með liðinu á næstunni, en dagurinn í gær snerist alls ekki um að væla út af meiðslum, heldur fagna komu Hauks Helga Pálssonar inn í Njarðvíkurliðið.

Haukur er slíkur hvalreki fyrir Suðurnesjaliðið að við ætluðum honum auðvitað að keyra beint í borgina og vinna KR. Það fór ekki alveg þannig eins og áður sagði, en það fer heldur enginn á taugum yfir óhagstæðum úrslitum í október - nema kannski Skagfirðingar.

Það var svo fjandi mikið að gera hjá okkur að taka myndir handa ykkur að við misstum af stórum hluta leiksins. Það er erfitt að lesa í spilamennsku á bak við linsuna. Við skulum kalla þetta ljómandi góða afsökun fyrir því að skrifa lítið sem ekkert um leikinn.

En þó voru nokkur atriði sem fóru ekki framhjá okkur. Við tókum eftir því að KR spilaði ljómandi fínan sóknarleik (reyndar gegn slökum varnarleik Njarðvíkinga) þar sem boltinn fékk á tíðum að fljúga milli manna og skapa opin þriggja stiga skot. Þetta er merkilegt þegar horft er til þess að það vantar jú besta leikstjórnanda deildarinnar í KR-liðið. Bæði lið lentu í klafsi og vandræðum annað slagið vegna leikstjórnarskorts, en KR tókst augljóslega betur að takast á við það. Leikmenn KR skiluðu flestir ljómandi góðum leik í gær og við vorum sérstaklega hrifin af því að þrír byrjunarliðsmenn meistaranna skiluðu 6+ stoðsendingum.

Þar fór Ægir Þór Steinarsson fremstur í flokki og reyndi að þrenna þetta upp með sjö stigum (sjö stigum? kommon), tíu fráköstum og níu stoðsendingum. Fagmaðurinn Darri Hilmarsson sletti líka á skýrsluna með 13/11/7 og Brynjar og Crayon voru solíðir.

Það var svo hinn 17 ára gamli Þórir Þorbjarnarson sem stal senunni í leiknum. Pilturinn skoraði 21 stig og henti niður fimm þristum í sjö tilraunum og er að neyða Finn þjálfara til að leyfa sér að spila, því hann hefur bætt við sig bæði stigum og mínútum í öllum fjórum leikjum KR í deildinni til þessa. Svo er það líka sérstakur plús að hann skuli vera örvhentur, það er alltaf gaman að horfa á örvhenta menn skjóta, jafnvel þó skotið þeirra sé dálítið flatt. Ef það fer ofan í, er öllum sama.

Þessi stóri skellur sem Njarðvíkingar fengu var ekki frumsýningin sem Haukur Helgi var búinn að sjá fyrir sér - það vitum við án þess að hafa sagt eitt orð við manninn. Hann gerði þó það sem hann gat og sýndi okkur annað slagið hvað hann er óhemju sterkur og fjölhæfur körfuboltamaður. Hann á eftir að gata nokkrar tölfræðiskýrslur í vetur, það er öruggt mál.

Njarðvíkurliðið á helling inni og þeir Friðrik Ingi Rúnarsson og Teitur Örlygsson munu sjá til þess að ná meira út úr því. Þetta var dálítið ljótt í gær og ljóst að það er mikil vinna fram undan hjá grænum, en þeir geta nú líka huggað sig við að þurfa ekki að spila við KR aftur alveg strax.

Það er haust og því fer enginn að missa sig í óðagot þó hann tapi körfuboltaleikjum. Við erum enn í október (þó að sé kominn nóvember þegar þú lest þetta) og þú vinnur ekkert í október, svo við rúllum okkur aðeins í 2. persónuna eins og Hubie Brown.

Það hefur ekki tíðkast hjá Friðrik Inga og Teiti að afsaka sig og sitt lið með væli út af meiðslum, en auðvitað gefur það augaleið að það vantar helling í Njarðvíkurliðið þegar það er án leikstjórnandans síns.

Innri element undanúrslitanna

Tweet

Tvífarar vikunnar

Tweet

Ungu mennirnir stóðu upp úr í sigri KR á Njarðvík

Tweet

Einhverjir urðu fyrir vonbrigðum með leik KR og Njarðvíkur í DHL höllinni í gærkvöldi og það er svo sem engin furða, 96-72 stórsigur KR var aldrei í nokkurri hættu.

Það var ekki að sjá að þessi lið væru á svipuðum slóðum í deildinni. Þetta var bara ekki dagur þeirra grænu, meðan allt gekk upp hjá heimamönnum. Flestum finnst leiðinlegt að horfa á blástra í körfubolta, en við skemmtum okkur konunglega. Við vorum að fylgjast með frammistöðu einstaka leikmanna í þetta sinn, ekki liðanna - per se.

Og þar fengum við vel fyrir peninginn. Pavel Ermolinski - sem okkur leiðist nú ekki að horfa á spila körfubolta - var samur við sig og bauð upp á 16/16/7 hjá KR.

Það var svo einvígi ungu strákanna sem var áherslupunktur kvöldsins og mikið hrikalega var það skemmtilegt, óháð stöðunni í leiknum.

 Þeir Martin Hermannson og Elvar Friðriksson eru löngu búnir að sýna að þeir eru mættir sem leikmenn í þessari deild, en ef einhver vafi var að sniglast innra með okkur um ágæti þessara frábæru bakvarða, gufaði hann endanlega upp í gær. Þvílíkir skemmtikraftar sem þeir eru báðir tveir.

Það er fullt af leikmönnum í deildinni okkar sem spila vel af og til, en þeir Elvar og Martin eru komnir á þann stað að þeir eru farnir að taka yfir leiki á löngum köflum. Þannig veistu að menn eru mættir - orðnir svona fullorðins.

Sérstaklega á þetta við um Elvar, sem spilaði bara eins og Kani í liði Njarðvíkur í gær. Bandaríkjamaðurinn Nigel Moore í liði Njarðvíkur er kannski ágætisleikmaður, en hann var gjörsamlega ósýnilegur í þessum leik.

Eini maðurinn sem gat eitthvað hjá Njarðvíkurliðinu í sóknarleiknum var Elvar Már og hann gerði bara það sem honum sýndist.

Það er ekki skrítið að pilturinn sé að skoða sig um í New York, hann er að verða of stór fyrir þessa deild.

Sömu sögu er að segja af Martin Hermannssyni. Hann fór hægt af stað í haust vegna meiðsla, en í undanförnum leikjum hefur hann verið óstöðvandi.

Það sem er svo sérstaklega flott við þessa stráka er tölfræðin þeirra. Báðir eru þeir að spila félaga sína uppi og skora helling af stigum, en skotnýting þeirra er framúrskarandi. Það er ekki eins og þeir séu bara eitthvað að drita skotum í allar áttir, þetta eru bara alvöru menn. Fullorðins.

Lengjutvíhöfði

Tweet

Strangt til tekið fórum við á tvíhöfða í Lengjubikarnum í kvöld. Renndum í Ásgarðinn og sáum Snæfell leggja Stjörnuna 97-85 þrátt fyrir að vera án Nonna Mæju.

Það fellur tæplega undir Ewing-kenningu Bill Simmons, en Nonni sjálfur glotti þegar við spurðum hann hvort það væri galdurinn fyrir Snæfell að hafa hann bara í hversdagsfötunum.

Kúdós á sækadelíuna í bolnum annars, Nonni. Jim Morrison hefði samið 2-3 texta um hann ef hann hefði séð hann.

Stjarnan spilaði líka án Dags Kárs Jónssonar í kvöld. Ljóst að hann og Lil Marv fá miklu stærra hlutverk í liðinu í vetur en á síðustu leiktíð og það er bara jákvætt.

Stjarnan er búin að missa óhemju sterka menn og á vafalítið eftir að sakna Jovan mikið. Hann var ekki bara skorari og langskytta, heldur teygði hann varnir andstæðinganna út og suður með nærveru sinni einni saman.

Ekki auðfyllt skarð þetta.

Finnur Magnússon var búinn að lofa aksjóni í Ásgarðinum og stóð við það. Skoraði meira að segja körfuna sem segja má að hafi ísað leikinn - reyndar með full snyrtilegu sniðskoti sem þú sérð á mynd hérna fyrir neðan.

Eh, það er ekkert bannað að troða, Finnur...

Við hefðum helst kosið að sjá bæði leikinn í Ásgarði og KR-KFÍ, en við náðum megninu af síðari hálfleik af því síðari leikurinn hófst klukkan 20. Þar voru heimamenn undir lengst af í leiknum en náðu að snúa taflinu sér í hag í restina og loka þessu 84-80.

Einhverjir voru að spá því að Ísfirðingar ættu eftir að eiga erfitt uppdráttar í vetur og það er svo sem eðlilegt.

Við sáum þó ekki betur en að væri töggur í þessu liði í Vesturbænum í kvöld.

Dómarar leiksins flautuðu Pavel okkar í villuvandræði og fyrir vikið spilaði hann ekki nema 22 mínútur.

Þetta er bara dónaskapur hjá þeim. Dómararnir eiga að vita að fólk borgar sig inn á leikinn til að sjá Pavel hlaða í þrennur en ekki sitja á bekknum.

Við biðjum dómara vinsamlegast að hafa þetta hugfast næst.

Nú er bara að bíða eftir undanúrslitaleikjunum á föstudaginn og úrslitunum um helgina. Lengjubikarinn er kannski ekki stærsti titilinn í boði en bikar er bikar, fjandakornið.

Verst að við þurfum víst að fara til Njarðvíkur til að sjá úrslitaleikinn.

Við höfum ekkert á móti Njarðvík, en ætli við þvælumst ekki nógu mikið út á land í vetur svo við þurfum ekki að fara á bikarúrslitaleik alla leið í Njarðlem.

Hérna eru örfáar myndir af aksjóninu í kvöld: