Af vel spilandi körfuboltamönnum

Tweet

Það er skondið að hugsa til þess hvað NBA-pennar væru að skrifa um ef Stephen Curry (og liðið hans allt, reyndar) væri ekki að spila eins og reið geimvera um þessar mundir.

LeBron James er alltaf LeBron James náttúrulega og hann er að skila fáránlegum tölum og fullt af sigrum eins og hann er vanur, þó það sé orðið vinsælt að skrifa heilu dálkana um að hann sé ekki lengur besti körfuboltamaður í heimi. Meiri róninn að vera ekki að bjóða upp á nema 26/8/7 meðaltal.

Þeir Kevin Durant og Russell Westbrook eru líka iðnir við að krota út tölfræðiskýrslur, hoppa ofan á þeim og kveikja í þeim. Fyrir það fyrsta er náttúrulega alveg þræleðlilegt að liðsfélagar séu að skora 28 stig að meðaltali í leik, en þar fyrir utan eru þeir báðir skemmtilega í ruglinu á sitt hvorum helmingnum á skýrslunum.

Westbrook með sín 28 stig, 7 fráköst, 10 stoðsendingar og vel á þriðja stolna bolta. Durant með sín 28 stig, 7 fráköst, 51% skotnýtingu og 46% 3ja stiga skotnýtingu. Hvort um sig bara vitleysisgangur náttúrulega. Það eina sem vantar er að liðið þeirra fari að spila vörn og vinna 80% leikja sinna í stað 58% eins og eitthvað Austurdeildarlið.

Paul George er líka búinn að vera skemmtilega bilaður í sinni spilamennsku og er búinn að draga Indiana-liðið sitt með sér til sigurs í tveimur af hverjum þremur leikjum, sem er nokkuð sem fáa hefði órað fyrir - hvort sem tímabilið er nýbyrjað eða ekki. Það er bara drullu vel gert. 

George er vel rúmlega "back", eins og sést á því að hann er að bjóða upp á 27/8/4/2 og 43% 3ja stiga nýtingu. Ákaflega ánægjuleg þróun þarna á ferðinni, hjá einum skemmtilegasta og besta leikmanni deildarinnar.

En þá komum við að rúsínunni í afturendanum, ólíkindatólinu Kawhi Leonard hjá San Antonio Spurs. Hann á bara engan sinn líkan og hefur aldrei átt, enda fjarri því eðlilegur einstaklingur.

Þið munið kannski eftir því að við vorum eitthvað að rífa kjaft um það í sumar og haust að nú væri kominn tími til fyrir hann að sýna það fyrir alvöru að hann væri stórstjarna - ekki bara gaur sem poppaði upp með einn og einn geimveruleik svona þegar við gleymdum því að hann væri þarna.

Kannski voru þetta óraunhæfar kröfur á þennan allt að því sjúklega hlédræga pilt, en það skondna við það er að hann virðist hafa verið að hlusta - bæði á tuðið í okkur og óskir forráðamanna San Antonio Spurs. Já, og allra sem hafa gaman af því að sjá gæðakörfubolta.

Hann er að spila eins og brjálæðingur og eins og einhver orðaði það svo skemmtilega - væri hann mögulega verðmætasti piltur tímabilsins til þessa ef ekki væri fyrir krúttlegu geimveruna sem getur ekki tapað í liði Warriors.

Þetta eru kannski stór orð, því eins og þið sáuð á upptalingunni hér fyrir ofan (sem er ekki ætlað að vera tæmandi), er fullt af mönnum að spila körfubolta rosalega vel í NBA deildinni í dag. 

Það er samt í góðu lagi að hrósa honum Kawhi aðeins, því eins og áður sagði er spilamennska hans nokkurn veginn andstæða lundarfars hans og framkomu - sem sagt hávaði og læti út í eitt.

Fram hefur komið hvað drengurinn er mikil hamhleypa í varnarleiknum og þar slær hann hvergi af, en í vetur hefur hann náð að valda miklum usla á hinum enda vallarins líka. Eins og til stóð - bæði hjá okkur og þjálfarateymi San Antonio.

Leonard er að skora 22 stig að meðaltali í leik, hirða 8 fráköst, gefa 3 stoðsendingar, verja skot og stela hátt í þremur boltum. Ef það er ekki nóg, er drengurinn að skjóta 51% utan af velli eins og Kevin Durant - en fimmtíu prósent í 3ja stiga skotum (c.a. 2 af 4 í leik)! Framherjinn ungi er búinn að setja 67 þrista niður að meðaltali á síðustu þremur tímabilum, en í ár er hann þegar búinn að setja 39 slíka niður í aðeins 19 leikjum. 

Annað sem er svo skondið við Leonard, er að þegar hann skoraði 27 stig í sigri Spurs á Memphis á fimmtudagskvöldið, var það aðeins í annað skiptið á ferlinum sem hann nær að skora 27 stig í deildarleik! Sem er galið ef haft er í huga hvað hann gerði við aumingja Miami-liðið í lokaúrslitunum 2014. 

Þetta er skólabókardæmi um stöðugleikann í spilamennsku San Antonio og vaxandi stöðugleika í sóknarleik hans sjálfs. Hann skorar nær aldrei yfir 26 stig í nokkrum einasta leik, en er samt með 22 stig að meðaltali í leik. Mjög spes. Mjög svo.

Skál fyrir því að Kawhi Leonard a) fjósist til að haldast heill - og b) haldi áfram að vaxa og dafna sem einn allra besti leikmaður deildarinnar, þó hann verði klárlega síðasti maðurinn til að segja þér það.

NBA vertíðin fer ekki eftir handritinu í haust

Tweet

... og Golden State vinnur allt, alltaf. Þannig er helst að lýsa meisturum Warriors þessa dagana. Fólk er að verða hætt að nenna að tala um þá, þeir eru svo góðir. Það eina sem þeir gera er að slá met og vinna körfuboltaleiki, en ef maður er atvinnumaður eða kona í körfubolta á annað borð, er svo sem ekki galið að verja tíma sínum í þetta tvennt.

Nú síðast settu Stríðsmennirnir ungu nýtt NBA met með því að salla fimmtán þristum (úr fokkíngs 20 tilraunum) og 75 stigum í andlitið á aumingja Phoenix í fyrri hálfleik viðureignar liðanna í nótt. Slökuðu svo á í seinni og luku leik með "aðeins" 22 þrista, sem er félagsmet á þeim bænum og aðeins einum þristi frá NBA metinu í eigu Orlando (2009) og Houston (2013).

Þetta met yfir flesta þrista liðs í leik er líklega eitt ótryggasta metið í NBA í dag, því Warriors-liðið er búið að vera í svo miklu stuði að við höfum á tilfinningunni að það sé dagaspursmál hvenær það slær þetta met.

Hvað ætti til dæmis að aftra Steph Curry frá því að salla 15 þristum á Sacramento í nótt? Vinur hans Klay Thompson skoraði 37 stig í einum leikhluta á Kings í fyrra - því ætti Steph ekki að geta sett tíu þrista í einum leikhluta á móti liði sem hefur ekki hugmynd um hvað það er að gera? Ætti að vera kinderspiel.



Skotin sem Stephen Curry er að setja niður eru sum hver bara móðgandi. Sjáðu til dæmis bull-skotið sem hann setti í grillið á vesalingnum honum Ronny Price hérna fyrir ofan. Þetta er nákvæmlega ekkert kirkjurækið við þetta hjá þér, Steph. Þetta er dónaskapur.

Hvurn fjandann eigum við svo sem að segja um þetta Warriors-lið sem hefur ekki þegar verið sagt? Við gætum sýnt ykkur skotkortið hans Steph Curry eins og það lítur út í dag, en þið mynduð örugglega halda að við hefðum fótósjoppað það af því það er svo mikið endemis rugl. Nema þér finnist svona hittni kannski bara eðlileg (rautt þýðir hittni undir meðaltali í deild frá viðkomandi svæði á vellinum, gult þýðir c.a. meðaltal í deildinni en grænt þýðir yfir meðaltali - við erum búin að fara oft yfir þetta. Tölfræðin sýnir okkur sumsé að Curry sé að "yfir meðaltal-a yfir sig" í nóvember.

Þá gætum við prófað að bjóða upp á stutta draugsýn frá leik Warriors og Suns í nótt, svona til að brjóta þetta aðeins upp meðan við pælum í því hverju þetta lið tekur upp á næst.



Eins og þið vitið erum við alltaf að taka stöðuna í NBA deildinni fyrir ykkur og því er óhjákvæmilegt að við séum stundum að tyggja það sama aftur og aftur. Golden State er t.d. að verða tugga af því það vinnur alltaf.

Í ljósi þess hve stutt er síðan við tókum síðustu vörutalningu (og hvað við erum húðlöt) ætlum við frekar að skrifa hérna niður nokkra hluti sem vakið hafa athygli okkar í NBA deildinni undanfarna daga. Það er nefnilega fjandi margt og sumpart áhugavert.

Það merkilegasta við fyrsta mánuðinn á leiktíðinni er að sjálfssögðu sú staðreynd að Golden State sé búið að gleyma því hvernig á að tapa (þegar þetta er ritað eru nákvæmlega tíu mánuðir síðan liðið tapaði síðast heimaleik í deildarkeppninni, sem er eðlilegt).

Án þess að vera með neikvæðni og leiðindi, skulum við ekki gleyma því hvað NBA deildin er grimm og vægðarlaus. Lögmál Murphys er alltaf í gildi og hversu oft höfum við ekki séð lið sem eru á löngum sigurgöngum detta á andlitið ofan í drullupoll þegar þeim skrikar aðeins fótur?

Það er nefnilega svo skondið að Golden State, sem tapaði aðeins 15 leikjum á síðustu leiktíð, tapaði fjórum sinnum tveimur leikjum í röð.

Og þessi fjögur "tvítöp" komu eðli málsins samkvæmt eftir góðar sigurgöngur, sem er dálítið sérstakt. Sum þeirra höfðu beint með leikjaröðina að gera (t.d. tveir erfiðir útileikir í restina af löngu keppnisferðalagi), en önnur ekki.

Og hvað erum við að fara með þessu? Jú, ef Warriors myndi hiksta aðeins og endurtaka leikinn í næstu viku - tapa tveimur í röð - myndi muna nákvæmlega einum leik á þeim og San Antonio.

Einum fjandans leik.

Það er svona viðbjóðslega stutt á milli í þessu og leikmenn Warriors vita það 100% þó sumir þeirra hafi ekki mikla reynslu.

Eitt af því fyrsta sem þú kemst að þegar þú byrjar að spila í NBA, er nefnilega að loksins þegar hlutirnir byrja að meika sens og allt fer að verða gaman, áttu leik við San Antonio og þá fer allt umsvifalaust til helvítis í handtösku. San Antonio neyðir þig til að spila sinn leik og tekur þig í leiðinni gjörsamlega út úr þínum leik.

Vörutalning: Austurdeild

Tweet

Nú ríkir mikil eftirvænting á íslenskum heimilum og það kemur jólahátíðinni ekkert við. Nei, nú er fólki orðið mál að fá vörutalningu frá NBA Ísland til að hjálpa sér að skilja hvað er í gangi í deildinni. Við erum vön að gera þetta nokkrum sinnum á tímabili

Vörutalningin að þessu sinni verður  með styttra sniði enda hefur aðeins eitt lið í deildinni spilað tíu leiki þegar þetta er ritað, flest átta eða níu. Það liggur í augum uppi að það er ekki tímabært að kafa mjög djúpt ofan liðin sem við tökum fyrir svona snemma á leiktíðinni, en í staðinn höfum við fengið nokkrar óvæntar uppákomur og nokkra rosalega leiki.

Venju samkvæmt skulum við byrja á að dýfa tánum aðeins í Austurdeildardrullupollinn áður en við hoppum nakin út í Vesturdeildarlaugina. Við verðum nú samt að viðurkenna að Austurdeildin fer þokkalega af stað og er enn sem komið er bara með tvö lið sem gera sig að fíflum í hverjum leik, Brooklyn og Philadelphia.

Öllum hinum liðunum í austrinu hefur tekist að vinna amk 3-4 leiki og meira að segja friggin´ New York er næstum því með 50% vinningshlutfall. Næstum því.

Eins og við sögðum er ekki hægt að lesa mjög mikið út úr þessu meðan úrtakið okkar er enn svona lítið, en þó er áhugavert að sjá óvænta hluti í töflunni. Þannig eru Detroit (5-3), Indiana (5-4) og Charlotte (4-4) búin að planta sér inn á topp átta meðan klúbbar eins og Washington (3-4), Boston (3-4) og Milwaukee (4-5) eru utan við sæti í úrslitakeppninni.

Það er stutt á milli þegar liðin eru ekki búin að spila nema tíu leiki, en helsta trendið sem við sjáum í þessu er að Detroit, Charlotte og Indiana eru að byrja betur en við reiknuðum með. Við verðum samt að hafa hugfast að austrið er jú að spila mest við austrið og þannig hrannast sigrarnir upp.

Samt verðum við að henda einu kúdósi á Detroit, sem virðist loksins vera að finna sig í leikstjórn Stans van Göndís. Drummond er náttúrulega búinn að vera ofsalegur. 

Annað lið sem við ætlum að gefa sját-át eru kjúklingarnir í Orlando. Þeir eru búnir að tapa 5 af 9 leikjum sínum og flest þessi töp eru skólabókardæmi um reynsluleysi. Þeir eru allir að læra þetta. Við erum nokkuð hrifin af leikstíl Orlando-liðsins sem var einni handsprengju frá Russell Westbrook frá því að leggja Oklahoma á dögunum.

Eigum við að segja að það komi á óvart að Cleveland sé 7-1 út af öllum meiðslunum? Þið ráðið því, en það stefnir óneitanlega í huggulegan vetur hjá Cavaliers.

Það rýkur úr herbúðum Chicago Bulls, þó eldurinn sjáist ekki.

Þvílík gargandi hamingja að við skulum vera búin að endurheimta Paul George nokkurn veginn eftir fótbrotið ógeðslega. Við söknuðum hans mikið meðan hann var frá keppni, enda var hann og er einn besti tvíhliðaleikmaður deildarinnar.

Stuðningsmenn Knicks hafa nú loksins ástæðu til að fara fram úr rúminu á morgnana þar sem nýliðinn knái Kristaps Porziņģis er að reynast duglegur, skemmtilegur og spennandi. 

Hann treður yfir einhvern reglulega með því að hoppa á bakið á honum og þruma niður sóknarfráköstum. 

Það kæmi okkur satt best að segja ekkert á óvart þó sala á geðlyfjum ætti eftir að dragast saman í New York með tilkomu Porziņģis. Svona hengir fólk miklar væntingar á hann. 

Þessi strákur á eftir að læra mjög margt og hans bíður gríðarleg vinna við að byggja upp meiri físík. Hann þarf að taka dálítið vel á hnébeygjunni karlinn.

Já, við vorum ekki lengi að telja Austurdeildina, en í næsta pistli skellum við okkur vestur á bóginn og förum að pæla í alvöru liðum.

Paul George úr leik eftir hroðalegt fótbrot

Tweet

Rétt á meðan við vorum að fagna endurkomu Derrick Rose með hressilegri troðslu í æfingaleik með liði Bandaríkjanna í Las Vegas í nótt, urðum við vitni að hlut sem enginn vill sjá þegar hann horfir á íþróttakappleiki.

Paul George mölbraut á sér fótinn þegar hann lenti illa undir lok leiksins og þegar búið að var að stumra yfir honum í góða stund, var einfaldlega ákveðið að hætta leiknum. 

Við gætum farið að lýsa þessu óhappi eitthvað betur eða sýna ykkur myndir eða myndbönd af því, en við erum ekki sadistar og hálfvitar, svo við sleppum því. 

Atvikið var endursýnt einu sinni í sjónvarpsútsendingunni af því margir misstu af því, en sjónvarpsmenn ákváðu að sýna það ekki aftur vegna þess hve ljótt það var.

Það eina sem við höfum um þetta að segja er að við vonum að Paul George nái sér að fullu eftir þessa hræðilegu byltu. Það er engin hætta á því að hann fari nokkuð að spila körfubolta á næstunni aumingja strákurinn.

Óvísindalegir tölfræðimolar úr úrslitakeppninni

Tweet

Það er nákvæmlega engin hefð fyrir því að staldra við og skoða tölfræði leikmanna í miðri úrslitakeppni. Ástæðan er auðvitað ólíkar skammtastærðir - það er kannski ekki alveg lógík í því að bera saman menn sem spilað hafa sjö eða sautján leiki í úrslitakeppninni. Við gefum skít í þetta. Okkur langar að skoða aðeins tölfræðina og pæla dálítið í því hvaða menn hafa verið að standa sig vel í úrslitakeppninni og hverjir ekki. Það ætti ekki að særa neinn... hmmm, ha?

Ætli sé ekki best að klára það bara frá að dásama Russell Westbrook. Þið vitið hvað við elskum hann Russ. En hafið þið spáð aðeins í tölfræðina sem drengurinn er að bjóða upp á í úrslitakeppninni í vor? Hún er svo rosaleg að hún er líklega sú fallegasta í úrslitakeppninni í dag.

Svona að öllu gríni slepptu, eru þetta ekki bara tölurnar. Hvað eru margir leikmenn búnir að spila betur en Westbrook í úrslitakeppninni? 

Fullt af þeim, segja hatursmenn Russ. Það eru mennirnir sem sjá ekki annað en Vonda Russ - gaurinn sem tekur hræðileg skot, fær dæmda á sig ruðninga og kastar boltanum upp í stúku í staðinn fyrir að gefa hann á manninn við hliðina á sér.

Við erum alltaf að rífast við hatursmenn Russ, en margir þeirra fatta ekki ennþá að það er löngu, löngu, löngu orðið bæði þreytt og hallærislegt að dissa Russ. Það myndu allir vilja hafa Russ í sínu liði - mann eins og Russ - gaur sem er alltaf á útopnu, hræðist ekkert og berst til síðasta manns. 

Ristill: Körfuboltalið New York Knicks er

Tweet

Þetta er vægast sagt afdráttarlaus fyrirsögn, en hún er með þeim sannari sem skrifaðar hafa verið á þetta vefsvæði. Það er alveg sama hvernig þú teiknar það upp - hvort þú ert fullur eða edrú - hvort sem þú elskar eða hatar New York Knicks. Þetta körfuboltafélag er fullkomið rusl og stjórn þess, þjálfarateymi og leikmenn eiga ekki skilið að fá borguð laun síðustu fjóra mánuði.

New York var eitt af Spútnikliðum síðasta vetrar og óvænt gengi liðsins kom engum fagmanninum á óvart, því það er sama hvort um er að ræða hörðustu stuðningsmenn Knicks eða blaðamenn í Bandaríkjunum - allir virðast jafnan halda að Knicks-liðið sé um það bil helmingi betra en það er í raun og veru.

Og auðvitað héldu bæði sérfræðingar og vitleysingar þess vegna að Knicks myndi byggja á árangrinum á síðustu leiktíð og verða enn betra í vetur.

Sem dæmi um þetta má nefna spá þeirra ESPN-manna Jalen Rose í haust. Þeir eru einmitt skemmtileg blanda af sérfræðingum og vitleysingum og þeir spáðu því að New York yrði eitt af tíu bestu liðunum í NBA í vetur.

Eins og staðan er í dag, er New York ekki einu sinni eitt af tíu bestu liðunum í Austurdeildinni og þó vill svo vel til að þessi Austurdeild er sú lang, langlélegasta sem við höfum orðið vitni að á þeim áratugum sem við höfum fylgst með NBA deildinni.

Ef við skoðum töfluna í dag, eru sex lið með verri árangur en New York og nokkur þeirra eru búin að skipta frá sér öllum NBA leikmönnunum sínum og spila á D-deildarmönnum.

Utah Jazz er með betri árangur en New York Knicks þegar þetta er skrifað. Já, sama Utah Jazz liðið og efast var um að ætti eftir að vinna tíu leiki í vetur eftir að það byrjaði 1-14 í haust.

Ein af sorglegustu staðreyndunum við þetta allt saman er að aðalstjarna liðstins, Carmelo Anthony, er að eiga eina af sínum bestu leiktíðum síðan hann kom inn í deildina með LeBron James og Dwyane Wade árið 2003. Hann hefur aldrei spilað jafnmargar mínútur og hefur aldrei frákastað eins vel.

En það er engin fylgni milli spilamennsku Carmelo Anthony og stöðu Knicks í töflunni. Carmelo Anthony er fyrst og fremst skorari og er vissulega í heimsklassa sem slíkur, en þar með er öll sagan sögð.

´Melo nær ekki að gera hina fjóra mennina sem spila með honum betri, það er orðið augljóst og fyrir vikið kemst liðið hans aldrei yfir ákveðinn þröskuld.

Það eru strangar kröfur á hvaða körfuboltamann sem er að ætla honum að gera meðspilara sína betri, en það eru eðlilegar kröfur á mann í launaflokki og stöðu Carmelo Anthony. Það eru ekki nema örfáir leikmenn í NBA deildinni sem uppfylla þessar kröfur, en það eru líka hinar sannkölluðu ofurstjörnur.

Það er Carmelo Anthony ekki.

Carmelo Anthony er fyrst og fremst frábær skorari, sem er byrjaður að ógna um leið og hann stígur yfir miðju, en hann er langt frá því að vera hagkvæmur skorari og seint verður sagt að skotval hans sé mjög gott.

´Melo getur spilað ágætis varnarleik ef honum sýnist svo, en það er bara mjög sjaldan sem honum sýnist svo. Það er svo fyrst núna í vetur sem hann er að frákasta eins og hann hefur burði til, en fram til þessa hefur hann oftar en ekki verið með lélegar tölur í þeirri deildinni.

Lykilatriðin á bak við listina að gera meðspilara sína betri eru boltameðferð, sendingageta og útsjónasemi og þá gefum við okkur að viðkomandi leikmaður hafi líka áhuga á að gefa boltann - sé óeigingjarn. ´Melo hefur eitthvað af þessu, en hann virðist ekki hafa nægan áhuga á að eyða tíma í þessa þætti leiksins.

Sjáðu bara pilt eins og Paul George hjá Indiana, strák sem spilar sömu stöðu og Carmelo Anthony. Það eru mörg ár síðan menn vissu að George hefði alla burði til að verða stórstjarna, en áður en svo mátti verða þurfti hann að laga tvo stór atriði. Hann var jú alls ekki góður skotmaður og svo var hann með afleita boltameðferð.


Skottækni geta menn alltaf lagað og hún fer oftar en ekki batnandi hjá mönnum eftir því sem árin líða í NBA deildinni. George hefur enda bætt sig sem skotmaður og á sjálfsagt eftir að halda því áfram.

En það var ekki skottæknin sem varð til þess að hann fór frá því að verða efnilegur yfir í að verða einn af fimm bestu alhliðaleikmennum í deildinni. Það var boltameðferðin. Og hana bætti pilturinn stórlega með þrotlausri vinnu.

Boltameðferðin hjá Paul George er enn ekki eins og best verður á kosið og skotnýtingin hans er líka oft upp og ofan. Það er samt skondið að sjá það að á síðasta rúma ári eða svo, hefur George að okkar mati tekið fram úr Anthony.

Jú, jú, Melo er með eitthvað betri tölfræði, en þið megið ekki gleyma því að leikurinn fer fram á tveimur vallarhelmingum.

Svo má kannski minnast á að Indiana-liðið hans George (þó það sé vissulega betur mannað en Knicks) er búið að vinna meira en helmingi fleiri leiki en liðið hans Anthony (44 vs 21).

Við höfum hundrað sinnum skrifað um vandræðaganginn á Knicks og þá staðreynd að hann hefur alltaf byrjað á skrifstofunni.

Það er bara svo grátlegt að forráðamenn félagsins virðast alltaf svo staðráðnir í því að binda félagið í báða skó og reka það eins og íslenskan banka. Keyra allt áfram á glórulausum lánum og halda áfram að hnoða stærri og stærri snjóbolta sem bara stækkar og stækkar.

Það hefur legið í loftinu í fjölda ára, en ekkert hefur verið gert í því. Núna bendir hinsvegar flest til þess að verði ekki bara gerð uppstokkun hjá Knicks, heldur verði spilastokknum bókstaflega hent og nýr keyptur í staðinn.

Það hefur ekkert annað verið í stöðunni í nokkur ár, en forráðamenn Knicks virðast alltaf vera einu aðilarnir sem fatta það ekki.

Það er ómögulegt að segja hvað verður um Carmelo Anthony þegar þessi uppstokkun á sér stað, en það vill svo vel til að kappinn er með lausa samninga í sumar og því er augljóst að það kemur í ljós á næstu mánuðum hvort hann er í framtíðarplönum Knicks.

Vissulega er það hroki og besserwiss að segja svona, en ef forráðamenn Knicks ætla sér að gera eitthvað í framtíðinni, eiga þeir að láta Carmelo Anthony fara - hvort sem þeir fá eitthvað fyrir hann eða ekki.

Við erum löngu búin að sjá hvað lið getur náð langt með Carmelo Anthony sem aðalstjörnu, bæði með lélegan og þokkalega góðan mannskap í kring um hann. Ef metnaður Knicks gengur út á að vera í kring um 50% vinningshlutfallið og detta út í 1-2 umferð úrslitakeppninnar, er um að gera að semja við ´Melo sem fyrst.

Sé metnaðurinn meiri, verður hann að fara.

Og það krakkar, það er bara þannig.

Paul George ákvað að troða bara

Tweet

Indiana vann fyrstu lotu

Tweet

Indiana (19-3) sendi meisturum Miami (16-6) smá skilaboð í nótt með því að hafa betur 90-84 í fyrsta einvígi liðanna í deildakeppninni. Leikurinn fór fram í Indiana, þar sem heimamenn eru taplausir í tíu leikjum.

Góðu fréttirnar eru að þessi frábæru lið mætast aftur næsta miðvikudag en þá verður leikið í Miami. Hérna fyrir neðan eru nokkrir tölfræðipunktar úr einvíginu. Þarna sjáið þið m.a. hvað varnarleikur Pacers er rosalega sterkur og hvernig Paul George gekk að dekka LeBron James.

Rotið Epli

Tweet

Hér sjáum við morðvopnið á bak við enn eitt tapið hjá New York Knicks á heimavelli. Liðið var með leikinn við Indiana gjörsamlega í höndum sér þegar Iman Shumpert ákvað að brjóta á Paul George í þriggja stiga skoti og gefa honum tækifæri til að jafna og senda leikinn í framlengingu.

Auðvitað vann Indiana aukaleikhlutann og svínað Knicks í 3-8, þar af 1-6 á heimavelli. Þetta lítur ekkert rosalega vel út hjá liðunum tveimur í Stóra Eplinu þessa dagana.

Vissulega setja meiðsli strik í reikninginn bæði hjá Knicks og Nets (líka 3-8), en það verður bara að setjast eins og er að grannarnir eru báðir gjörsamlega að drulla á sig. Aðeins Milwaukee (2-8) hefur gert betur í buxurnar í Austurdeildinni það sem af er leiktíðinni.

Við vitum að skammtastærðin er enn lítil, en ef úrslitakeppnin hæfist í dag, myndu tvö lið með innan við 40% vinninshlutfall fara í hana í Austurdeildinni. Þar af lið með 36% vinningshlutfall (Detroit). Alltaf sömu risarnir þarna austanmegin.

Saga af Larry

Tweet

Paul George, stórstjarna Indiana Pacers, sat fyrir svörum hjá tímaritinu Slam fyrir nokkru síðan og var meðal annars spurður út í yfirmann sinn Larry Bird. Við höfum alltaf svo lúmskt gaman af svona sögum, hvort sem þær eru lygi eða ekki.

SLAM: "I believe you had talked about seeing Larry (Bird) shoot in the gym."

Paul George: "He picked a ball up that had rolled over. He rolled up his sleeves and made about 15 in a row and just walked out like nothing just happened. It was the craziest thing I’ve seen."

SLAM: "How did you and the rest of the team react?"

Paul George: "We were speechless. We didn’t know whether to keep shooting or just to end practice. It was sweet, man."

Auðvitað er hann ennþá með þetta, gamli sveitalúðinn. Og sá er að verða búinn að byggja upp sterkt og skemmtilegt lið á heimaslóðunum í Indiana. Ekki hægt annað en að halda með honum. Eitt af því fáa sem hann á eftir að gera á glæsilegum ferlinum er að vinna titil sem skrifstofumaður. Megi það lukkast hjá honum.

Miami og Indiana mætast í hreinum úrslitaleik

Tweet

Það ræðst ekki fyrr en á mánudagskvöldið hvort það verður Miami eða Indiana sem mætir San Antonio í úrslitaeinvíginu um meistaratitilinn í NBA.

Það á ekki að koma neinum hrikalega á óvart að þetta fari í oddaleik. Indiana var þegar búið að vinna tvo leiki gegn Miami og bætti einum við í nótt með góðum 91-77 sigri á flotta heimavellinum sínum. Ekki kom það okkur neitt sérstaklega á óvart.

Það sem kom okkur á óvart, var hinsvegar blóðlaus frammistaða Dwyane Wade og Chris Bosh. Enn eina ferðina. Meiðsli eiga þarna einhvern þátt, en okkur er alveg sama. Wade og Bosh eru í besta falli tálbeitur eins og þeir eru að spila núna - eru inni á vellinum til að draga athyglina frá LeBron James.

James konungur hefur oft átt betri leik en í nótt, sem segir sína sögu um standardinn sem hann hefur sett fyrir sjálfan sig og þarf helst að toppa í hverjum leik.

98% af leikmönnum deildarinnar myndu gráta af gleði ef þeir næðu að skora 29 stig, hirða 7 fráköst og gefa sex stoðsendingar með um 50% hittni. Hjá James heitir þetta bara bleh leikur.

 James skaut 48% í nótt, en restin af liðinu 26%. Miami endaði með 36% skotnýtingu í leiknum, sem er það versta í allan vetur í deildakeppni eða úrslitakeppni.

Ef þessar svokölluðu stórstjörnur í Miami verða að taka hausinn út úr ristlinum á sér og fara að spila eins og menn ef þeir ætla ekki í sumarfrí. Spilamennskan sem þeir eru að sýna í undanförnum leikjum er grátleg.

Chris Bosh er með sex stig að meðaltali í síðustu þremur leikjum, þar sem hann hefur aðeins hitt úr fjórum af 21 skoti utan af velli. Viltu heyra annan? Hann nær ekki fjórum fráköstum að meðaltali í leik í einvíginu. Hann er 211 sentimetra hár og vegur um 110 kíló.

Dwyane Wade hefur verið í svipuðu rugli. Í síðustu þremur leikjum hefur hann hitt úr 11 af 34 skotum sínum ( 33%) og skilar innan við tólf stigum að meðaltali í leik. Þeir Bosh og Wade eru samanlagt með 35 milljónir dollara í árslaun. Bosh eilítið hærri laun en Wade - þau sömu og LeBron James upp á krónu - 2,15 milljarða króna á ári. Og hækkar í launum á næsta ári. Umtalsvert.

Það getur vel verið að Wade sé að drepast í hnénu og Bosh sé aumur í ökklanum sem hann sneri um daginn - okkur er bara alveg sama. Svona spila meistarar ekki, enda er nákvæmlega enginn meistarabragur á Miami í síðustu þremur leikjum. Enginn.

Þeir Wade og Bosh skoruðu aðeins 15 stig í sjötta leiknum í gær og það er það lægsta sem þeir hafa skorað samanlagt síðan Bosh (og LeBron James) gekk í raðir Miami. Eldra metið var 17 stig og það jöfnuðu þeir í þarsíðasta leik, svo það fer ekki fram hjá nokkrum manni að hér er eitthvað að.

Eins og við höfum áður sagt, verður auðvitað að gefa varnarleik Indiana plús fyrir eitthvað af þessu, en hann einn og sér á ekki að geta eyðilagt leik Miami.

Sólstrandargæjarnir skoruðu ekki nema fimm sinnum undir körfunni í leiknum og hafa aðeins einu sinni í vetur skorað færri körfur þar. Það var að sjálfssögðu á móti Indiana sem það gerðist, nánar tiltekið í janúar.

Indiana spilaði ljómandi vel í sóknarleiknum í nótt með Paul George fremstan í flokki. Pilturinn skoraði 28 stig og hitti úr 11 af 19 skotum sínum annan leikinn í röð. Hann hirti auk þess 8 fráköst og gaf 5 stoðsendingar.

Roy Hibbert vinur hans var líka frábær með 24 stig og 11 fráköst, en það er nokkurn veginn meðaltalið hans í einvíginu.

Þetta var fimmti leikurinn í röð sem Hibbert fer yfir 20 stig og er það í fyrsta skiptið í vetur sem hann nær því.

Hann skoraði einu sinni 20 stig eða meira í fjórum leikjum í röð í haust, en þar fyrir utan voru bara einn og einn 20 stiga leikur á stangli hjá honum. Gott að spila á móti Miami.

Nú er ljóst að við förum í hreinan úrslitaleik í þessu einvígi - leik sjö í Miami á mánudagskvöld.

Ef tölfræðin er skoðuð, kemur í ljós að heimaliðið er með afgerandi betri árangur en útiliðið í þessari stöðu. Heimaliðið hefur unnið tæp 80% af öllum oddaleikjum sem spilaðir hafa verið í sjö leikja seríum í NBA (89-112). Á hinn bóginn er reyndar ekki langt síðan útiliðið vann sigur í oddaleik, því Chicago lagði Brooklyn á útivelli í eina oddaleiknum sem verið hefur í úrslitakeppninni í ár.

Miami hefur unnið þrjá af sex oddaleikjum sem það hefur tekið þátt í, en þar af fóru fimm þeirra fram á heimavelli liðsins. Síðasti sigur Miami í oddaleik kom gegn Boston Celtics í úrslitum Austurdeildarinnar í fyrra. Þessu er öfugt farið hjá Indiana, sem hefur unnið tvo en tapað þremur oddaleikjum og voru þeir allir á útivelli.

Miðað verið frammistöðu liðsfélaga LeBron James í síðustu leikjum, mætti ætla að Miami þurfi á ofurmannlegu framlagi að halda frá honum á mánudagskvöldið. Hann hefur þrisvar sinnum farið í oddaleik á ferlinum, tapaði í tvígang með Cleveland á útivelli en vann áðurnefnt einvígi við Boston fyrir ári.

James hefur skorað yfir 34 stig að meðaltali í leik í oddaleikjum á ferlinum og er það hæsta meðaltal í sögu deildarinnar ef miðað er við fleiri en einn leik spilaðan.

Þetta voru nokkrir tölfræðimolar sem við fengum að láni frá ESPN. Þessar tölur skipta auðvitað ekki nokkru máli þegar komið er í leikinn sjálfan á mánudagskvöldið, en úrslitin í nótt þýða að það er komin upp alveg ný staða í einvíginu í okkar huga.

Indiana getur unnið það.

Guttarnir hjá Pacers hafa verið að elta allt einvígið, en nú eru þeir allt í einu búnir að ná meisturunum og þá blasir við að taka fram úr þeim. Það er erfitt en þægilegt að elta, en allt önnur ella að taka fram úr. Aðeins hugrakkir og skapfastir menn geta klárað svoleiðis - ekki síst á útivelli.

Á pappírunum á Miami að vinna þennan oddaleik vandræðalítið og mun eflaust gera það, en þegar þú ert kominn í hreinan úrslitaleik, má ekkert klikka.

Öll pressan í einvíginu er nú farin af Indiana og hleðst á Miami.

Hugsið ykkur bara. Hvað í fjandanum ætlar Miami að gera ef svo ólíklega vildi til að LeBron James myndi nú eiga skítaleik á mánudaginn? Akkúrat - þeir væru (mök)!

Við skulum þvi segja að allt geti gerst af því þetta er oddaleikur. Það er alltaf mjög spes andrúmsloft þá sjaldan að spilaðir eru hreinir úrslitaleikir í NBA deildinni.

Nánast allir sem fylgjast eitthvað með spáðu Miami í úrslitin (eða lengra) en nú er sá möguleiki allt í einu kominn upp á borðið að það komist ekki í úrslit líkt og tvö síðustu ár.

Hugsið ykkur hvað sögusviðið breytist gígantískt ef meistararnir detta út. Indiana og San Antonio í úrslitum? Það væri eins og Njarðvík-Skallagrímur - enginn LeBron og markaðsdeildin færi í þunglyndi. Út frá körfuboltasjónarmiðinu væri samt ekkert að því, þó hinn möguleikinn sé meira sexý.

Það hefur aldrei gerst að lið hafi farið óverðskuldað í lokaúrslit. Menn þurfa að vinna fyrir því og guttarnir í Indiana eru búnir að vinna sér inn fyrir þessum séns. Nú er bara að sjá hvort þeir hafa pung í að taka hann. Þetta eru leikirnir sem við borgum fyrir að fá að sjá. Sagan skrifuð á staðnum.

Troðslan hans Paul George

Tweet

George yfir Bosh

Tweet

LeBron James var eina stórstjarnan í Miami í nótt:

Tweet

Ungt fólk um víða veröld hefði eflaust leiðst út í fíkniefnaneyslu og afbrot ef TNT-sjónvarpsstöðin hefði ekki sett móðu fyrir kjaftinn á LeBron James þegar hann húðskammaði félaga sína í Miami í nótt.



Við verðum eiginlega að hrósa James fyrir þolinmæðina, því meistararnir eru búnir að spila vel í einum leik í þessu einvígi. Og um leið einum leik í úrslitakeppninni. Milwaukee var engin fyrirstaða í fyrstu umferðinni og Chicago meinaði Miami að spila vel í annari umferðinni.

James hefði átt að hrauna yfir félaga sína strax eftir leik eitt, þegar Miami sýndi strax að það var ekki að taka Indiana nógu alvarlega.

Það var aðeins í leik þrjú sem Heat spilaði af fullri hörku frá upphafi til enda (eða þangað til úrslitin voru ráðin), en þar fyrir utan hefur það ekki náð að kveikja í sér nema í mínútu og mínútu.

Við sáum aðeins af þessu í þriðja leikhlutanum í kvöld og þá fyrst og fremst í vörninni. Í sókninni var LeBron James í Cleveland-leik og jarðaði Indiana bara sjálfur. Þurfti ekki aðstoð við það. Hann er það góður, en þó það sé óhemju gaman að horfa á James spila í þessum ham, er það ekki vænlegt til árangurs til lengdar hjá Miami.

Indiana var fullkomlega inni í þessum leik þangað til í þriðja leikhlutanum og fór hrikalega illa með mörg dauðafæri í fyrri hálfleik. Við sáum þreytumerki á Pacers í síðari hálfleiknum í nótt.

Það getur meira en verið að Indiana nái að æsa sig upp í að eiga brjálaðan leik á laugardaginn og jafna þetta einvígi. En við sjáum liðið bara ekki vinna þessa seríu. Sjáum ekki að þessir strákar hafi trú á því og sjáum ekki að þeir hafi breidd til þess.

Við mældum það á vísindalegan hátt í nótt og hér eru niðurstöðurnar: Það er ENGIN breidd í liði Indiana.

Það er ekkert lið í NBA deildinni með jafn gagnslausan varamannabekk. Að minnsta kosti ekkert af liðunum sem komust í úrslitakeppnina.

Meira að segja varamenn Lakers og Memphis myndu líta vel út við hliðina á þessum sekkjum.

Þetta telur rosalega. Strákarnir í byrjunarliði Indiana eru óhemju duglegir og virðast næstum hafa endalausa orku, en það getur bara ekki verið að lið með engan bekk komist alla leið í lokaúrslit.

Eins manns liðið Cleveland frá 2007 kemur einna fyrst upp í hugann þegar við hugsum um lið í úrslitum með lélegan bekk, en það lið var líka með LeBron James í sínum röðum.

Indiana er sannarlega ekki með neinn LeBron James og enga súperdúperofurmegastjörnu, þó það sé með þrjá leikmenn á Stjörnuleikskalíberi í þeim Paul George (1 stjörnuleikur), David West (2) og Roy Hibbert (1, reyndar óverðskuldað, en samt).

Talandi um Paul George. Við verðum að koma einni pælingu að í sambandi við hann. Ekki vera þessi sem byrjar að drulla yfir Paul George ef Indiana tapar þessu einvígi. Það er ekki honum að kenna ef svo fer. Drengurinn er tuttugu og þriggja ára gamall!

Að okkar mati er George einn mest spennandi ungi leikmaðurinn í allri NBA deildinni. Já, hann tapar dálítið mörgum boltum og já, hann gæti verið betri skytta - já - hann er ekki fullkominn.

En sjáðu pakkann sem þessi drengur er að bjóða upp á. Hann er frábær varnarmaður, gerir allt á vellinum og á bara eftir að verða betri.

Hvernig heldur þú að þér hefði tekist til með að spila leikstjórnanda, bera ábyrgð á sóknarleiknum og dekka LeBron James í 40+ mínútur á hverju kvöldi þegar þú varst 23 ára gamall?

Einmitt.

Gerið okkur greiða. Ekki drullast út í Paul George.

Skammið heldur Frank Vogel fyrir að koma boltanum ekki oftar inn í teig og stjórn Indiana fyrir að geta ekki fjósast til að setja saman mannsæmandi varamannabekk.

Já, og skammaðu meinta bakverði Indiana, sem gleymdu að taka þátt í fimmta leiknum - hurfu.

Leit stendur enn yfir og farið verður nánar yfir málið í kvöldfréttum klukkan tuttugu.

Okkur dettur ekki í hug að spá fyrir um úrslitin í leik sex á laugardagskvöldið, en vonum satt best að segja að Indiana vinni, því það er alltaf gaman að sjá úr hverju stjörnurnar eru gerðar í hreinum úrslitaleikjum.

Það er samt fjandi líklegt að LeBron James verði að fá aðstoð frá fleiri mönnum en Udonis Haslem og Mario Chalmers í sóknarleiknum ef meistararnir ætla að loka þessari seríu eins og menn.

Það er helvíti dýrt að menn sem þiggja 38 milljónir dollara (rúmlega 4,6 milljarða króna) í laun á ári skuli vera að skila sex körfum samanlagt í jafn þýðingarmiklum leik.

Gefum Dwyane Wade smá slaka því hann er meira en augljóslega í hakki, en Chris Bosh... hvað er hægt að segja um þann mann?

Bara ef til væri lið sem gæti lamið Miami út í horn og laðað fram það allra besta í meisturunum. Þetta eru óraunhæfar kröfur hjá okkur, en við gerum kröfur til besta körfuboltaliðs í heimi - alveg sama hvað það heitir.

Við elskum körfubolta

Tweet

Sæl aftur.

Það er ekki við Indiana að sakast, en Miami er nú mætt í úrslitakeppnina árið 2013. Miami vélin þurfti smá ræsingarúða eins og gamall Nalli, en naumur sigur í fyrsta leik og tap í öðrum gegn Pacers á heimavelli var það eina sem þurfti.

Þetta er Miami - liðið sem var óstöðvandi í deildinni í vetur og liðið sem við áttum von á að sjá eins og bremsulausa jarðýtu í úrslitakeppninni. Þarna er það.

Þriðji leikur Miami og Indiana í gær var ekki mjög spennandi, slíkir voru yfirburðir gestanna, en það var samt unun að horfa á það hvernig Miami hakkaði allt í sig sem Indiana reyndi að setja fyrir það.

Ekkert lið vinnur Miami þegar stjörnurnar eru rétt stilltar og fá í þokkabót hjálp frá öllum aukaleikurunum.

Aumingja Indiana ef þetta heldur svona áfram. Hætt við að þetta tap í gær hafi slegið úr þeim eitthvað af tönnunum. Það var alveg sama hvað þeir reyndu, allt kom fyrir ekki.

Við erum búin að segja ykkur allt um LeBron James og þurfum ekki að segja meira um hann í bili, en þessum snillingi er enn að takast að lyfta leik sínum á hærra plan.

Við verðum að deila með ykkur stuttu myndbroti sem fangar svo fullkomlega af hverju við elskum körfubolta.

Myndbrotið hér fyrir neðan er úr leik tvö hjá Miami og Indiana. Ungstirni dagsins í dag, Paul George hjá Indiana, byrjar þar á því að HAMRA boltanum í andlitið á Fuglamanninum Chris Andersen, en LeBron James lætur það ekkert á sig fá, brunar upp völlinn og setur niður langan þrist í andlitið á honum til baka.

Eftir þetta sjáið þið að þeir James og George skiptast á einhverjum pillum og í síðustu endurtekningunni, í blálokin á myndbrotinu, sérðu þá takast í hendur, brosa og halda hvor í sína áttina í lok leikhlutans.



Þetta er gæsahúðaraugnablik af bestu gerð.

Þetta er ástæðan fyrir því að körfubolti er fallegasta íþrótt í heimi að okkar mati.

Sælar stelpur, Paul George hérna.

Tweet

Innlit hjá einskisnýtu Indiana

Tweet

Paul George hefur skorað fleiri þriggja stiga körfur í einum leik með Indiana en Reggie Miller gerði nokkru sinni. Það er dálítið skondið, þar sem George er aðeins á sínu þriðja í deildinni og er miklu þekktari fyrir að vera troðari en langskytta.

George setti níu þrista þegar Indiana marði meiðslum hrjáð lið New Orleans á heimavelli í framlengdum leik á dögunum. Þristarnir hans George komu allir í síðari hálfleik og framlengingu.

Reggie Miller, ein frægasta þriggja stiga skytta sögunnar, átti tvo átta þrista leiki á ferlinum.

Árið 1993 átti hann 8 af 16 leik og árið 1997 setti hann aftur 8 þrista, en að þessu sinni úr 10 tilraunum. Sá leikur var einmitt gegn Hornets, sem þá var í Charlotte.

Þessi sigur á Hornets kvöldið fyrir Þakkagjörð var ekki nóg til að koma Indiana í 50% vinningshlutfall og í okkar bókum hefur ekkert lið í deildinni valdið öðrum eins vonbrigðum og Indiana það sem af er nema kannski Lakers - og þó ekki.

Danny Granger er enginn LeBron James þó hann haldi það stundum. En það mætti halda að hann væri Indiana-liðinu jafn mikilvægur og James er Miami, því liðið er bókstaflega búið að vera með drulluna í hárinu síðan hann meiddist.

Indiana átti að vera liðið til að fylgjast með í Austurdeildinni - Úlfarnir í austrinu ef þannig má að orði komast. Í staðinn er liðið í bullinu og eitt versta sóknarlið deildarinnar. Kannski sá Larry þetta fyrir og nennti þessu ekki. Kannski voru það þessir aumingjar sem urðu þess valdandi að Goðsögnin Larry kaus að snúa baki við leiknum.

Það væri hrikalegt að hafa á samviskunni þegar horft er til þess að ekki einu sinni Ron Artest og Stephen Jackson fengu hann til að hætta með því að ráðast á áhorfendur og berja þá.

Nei, það var ekki nóg til að fá hann til að hætta, en Larry missti hinsvegar trú á mannkyninu þegar hann sá hvað þetta svokallaða efnilega lið hans gat ekkert nema drullað á parketið.

Þvílík depurð - þvílík sóun.