Þýðingarmikill sigur hjá Stjörnumönnum

Tweet

Spennan í Domino´s deild karla er að verða óbærileg. Í kvöld fór fram sex stiga leikur í Ásgarði, þar sem heimamenn í Stjörnunni unnu nauman sigur á Snæfelli 93-88 í bráðfjörugum leik.

Sigurinn lyfti Garðbæingum upp fyrir Hólmara á innbyrðisviðureignum, því liðin eru jöfn að stigum í deildinni - Stjarnan í sjöunda sæti en Snæfell í því áttunda. Þetta getur þó átt eftir að breytast fljótlega, því ÍR ingar eru skammt undan og eiga leik inni. ÍR-ingarnir verða þó að komast upp fyrir bæði Stjörnuna og Snæfell, sem bæði hafa betri stöðu í innbyrðisviðureignum í vetur.

Haukarnir gerðu sér lítið fyrir og sóttu sigur í Keflavík í fyrsta skipti í einn og hálfan áratug á bak við þrennu frá Emil okkar Barja. Þeir eru ekkert að grínast þessir Hafnfirðingar og eru sannarlega að setja fjör í þennan lokasprett í deildinni eins og ÍR-ingarnir.

Það virðist vera smá deyfð yfir Keflvíkingum þessa dagana og heimildir okkar herma að andinn sé ekki með besta móti í herbúðum þeirra. Það er samt nægur tími fyrir Keflvíkingana til að snúa bökum saman og koma flottir inn í úrslitakeppnina.

Það er nánast sama hvert er litið, það er ljóst að það verður extra pressa á liðunum með heimavallarréttinn í úrslitakeppninni í vor, af því liðin í neðri sætunum eru mörg hver mjög óárennileg þessa dagana.

Hey, nokkrar myndir úr Ásgarðinum í kvöld =>

Halló Hafnarfjörður*

Tweet

Mikið fjandi er gaman að sjá þetta unga og skemmtilega lið Hauka í efstu deild á ný. Við skelltum okkur í Hafnarfjörðinn í gærkvöld og sáum Haukana skella Snæfelli 82-77 á Ásvöllum.

Ef marka má frétt karfan.is var þetta í fyrsta skipti síðan Stockton og Malone voru að spila sem Haukarnir ná að vinna Snæfell á heimavelli sínum. Sigur heimapilta var sanngjarn þó þeir hafi verið dálítið taugaóstyrkir í blálokin.

Nýliðar Hauka byrja leiktíðina því 3-1 og eru í rjúkandi fínum málum. Bandaríkjamaðurinn þeirra Terrence Watson var hrikalegur og skilaði 31/13 og Emil Barja hlóð í aðra þrennu vetrarins með dásamlegri 21/10/10 línu.

Emil er að bjóða upp á 10,3 stig, 9,8 fráköst og 8,5 stoðsendingar að meðaltali það sem af er á leiktíðinni og engum blöðum um það að fletta að hann er hér opinberlega að skora á Pavel Ermolinski í þrennukeppni í vetur.

Þvílík forréttindi að fá að fylgjast með svona snillingum spila körfubolta. Ef þessi byrjun á deildinni er til marks um það sem koma skal er ljóst að það verða jól í allan vetur.

Ef marka má fyrstu leikina liggur okkur við að segja að nýju 4+1 reglurnar um erlenda leikmenn séu besta reglubreyting í sögu mannkynsins. Við kunnum ekki að koma því í orð hvað við erum hamingjusöm yfir því hvað ungu íslensku leikmennirnir eru að standa sig vel.

Við vorum á báðum áttum um þegar ákveðið var að breyta reglunum frá því sem var í fyrra og óttuðumst að gæðin ættu kannski eftir að minnka eitthvað, en annað hefur komið á daginn. Þetta er bara blússandi þjóðlegt og skemmtilegt. Ekkert annað.

Þó við séum gjörsamlega fallin fyrir Haukaliðinu höfum við á tilfinningunni að við verðum að spara lofið á liðið svona snemma leiktíðar, því ekki viljum við að þessir guttar fari að ofmetnast og brenna yfir.

Það er samt ekki hægt annað en að hrífast af þessu liði og eins og við sögðum ykkur í síðustu færslu var umgjörðin hjá Haukunum til allrar fyrirmyndar í gærkvöldi. Stórt prik í kladdann fyrir Hafnfirðingana.

Íþróttamiðlar landsins eru nokkurn veginn á einu máli um það að Snæfellsliðið hafi átt arfaslakan leik.

Ingi Þór þjálfari var reyndar alveg sammála því og var til að mynda ekki par hrifinn af frammistöðu leikstjórnandans síns Vance Cooksey, sem er að skjóta innan við 32% úr 2ja stiga skotum það sem af er í deildinni. Þetta er snaggaralegur spilari en hann hefur ekki náð sér á strik og virðist vera orðinn tæpur á því að halda vinnunni.

Við ætlum nú ekki að setja Hólmara undir fallöxina eftir fjóra leiki, en það verður að viðurkennast að þetta lið á að vera miklu betra en þessi 1-3 byrjun segir til um. Snæfellsliðið er að okkar mati ljómandi vel mannað - a.m.k. hvað varðar stóra stráka - og hefur ekkert með það að gera að vera með undir 50% vinningshlutfall.

Það er ljóst að við verðum að fylgjast náið með þessu Haukaliði í vetur og við hvetjum fólk sannarlega til að skella sér á völlinn og sjá það spila. Einhver gæti haldið að þeir væru bara "ungir og vitlausir" og vissu ekki betur, en sennilegra er að þetta sé bara fjandi gott lið.

Kíktu á nokkrar myndir ef þú vilt. Það er aldrei að vita nema þær stækki ef þú smellir á þær.

* - Já, við sögðum halló Hafnarfjörður í (yfir)fyrirsögn. Enginn er fullkominn.

Það var til mikils að mynda þig vinur

Tweet

Lengjutvíhöfði

Tweet

Strangt til tekið fórum við á tvíhöfða í Lengjubikarnum í kvöld. Renndum í Ásgarðinn og sáum Snæfell leggja Stjörnuna 97-85 þrátt fyrir að vera án Nonna Mæju.

Það fellur tæplega undir Ewing-kenningu Bill Simmons, en Nonni sjálfur glotti þegar við spurðum hann hvort það væri galdurinn fyrir Snæfell að hafa hann bara í hversdagsfötunum.

Kúdós á sækadelíuna í bolnum annars, Nonni. Jim Morrison hefði samið 2-3 texta um hann ef hann hefði séð hann.

Stjarnan spilaði líka án Dags Kárs Jónssonar í kvöld. Ljóst að hann og Lil Marv fá miklu stærra hlutverk í liðinu í vetur en á síðustu leiktíð og það er bara jákvætt.

Stjarnan er búin að missa óhemju sterka menn og á vafalítið eftir að sakna Jovan mikið. Hann var ekki bara skorari og langskytta, heldur teygði hann varnir andstæðinganna út og suður með nærveru sinni einni saman.

Ekki auðfyllt skarð þetta.

Finnur Magnússon var búinn að lofa aksjóni í Ásgarðinum og stóð við það. Skoraði meira að segja körfuna sem segja má að hafi ísað leikinn - reyndar með full snyrtilegu sniðskoti sem þú sérð á mynd hérna fyrir neðan.

Eh, það er ekkert bannað að troða, Finnur...

Við hefðum helst kosið að sjá bæði leikinn í Ásgarði og KR-KFÍ, en við náðum megninu af síðari hálfleik af því síðari leikurinn hófst klukkan 20. Þar voru heimamenn undir lengst af í leiknum en náðu að snúa taflinu sér í hag í restina og loka þessu 84-80.

Einhverjir voru að spá því að Ísfirðingar ættu eftir að eiga erfitt uppdráttar í vetur og það er svo sem eðlilegt.

Við sáum þó ekki betur en að væri töggur í þessu liði í Vesturbænum í kvöld.

Dómarar leiksins flautuðu Pavel okkar í villuvandræði og fyrir vikið spilaði hann ekki nema 22 mínútur.

Þetta er bara dónaskapur hjá þeim. Dómararnir eiga að vita að fólk borgar sig inn á leikinn til að sjá Pavel hlaða í þrennur en ekki sitja á bekknum.

Við biðjum dómara vinsamlegast að hafa þetta hugfast næst.

Nú er bara að bíða eftir undanúrslitaleikjunum á föstudaginn og úrslitunum um helgina. Lengjubikarinn er kannski ekki stærsti titilinn í boði en bikar er bikar, fjandakornið.

Verst að við þurfum víst að fara til Njarðvíkur til að sjá úrslitaleikinn.

Við höfum ekkert á móti Njarðvík, en ætli við þvælumst ekki nógu mikið út á land í vetur svo við þurfum ekki að fara á bikarúrslitaleik alla leið í Njarðlem.

Hérna eru örfáar myndir af aksjóninu í kvöld:

Þetta er að byrja

Tweet

Það er haust í lofti, nokkuð sem hefur ekki farið framhjá nokkrum Íslendingi. Nú fer í hönd þessi nöturlegi tími þegar frostlögur og rúðusköfur eru allsráðandi. Við værum löngu flutt af landinu ef kuldinn og rökkrið þýddi ekki að þá færi í hönd jólahátíðin okkar - körfuboltatímabilið.

Af sérstökum ástæðum vorum við að fara á okkar fyrsta haustleik í körfunni í vetur í kvöld. Leikur KR og Snæfells varð fyrir valinu, já viti menn! Það þarf svo sem aldrei að hvetja þessa ritstjórn sérstaklega til að fara á KR-Snæfell, en hjörð af óðum nautum hefði ekki getað dregið okkur í burtu frá þessum tiltekna leik.

Ástæðan var auðvitað endurkoma Pavel Ermolinski með KR.

Þeir sem fylgst hafa með á NBA Ísland undanfarin ár vita að ritstjórninni leiðist ekkert sérstaklega að fylgjast með honum Pavel spila körfubolta. Frábær tíðindi fyrir deildina hérna heima að fá þennan galdramann aftur heim. Hann stimplaði sig inn með 15/9/9/5 leik og á eftir að skemmta okkur öllum með KR í vetur.

Við ætlum ekki að detta í þá gryfju að ætla að lesa mikið út úr þessum leik, en það vakti athygli okkar á köflum hvað KR-strákarnir voru óeiginigjarnir í sóknarleiknum og uppskáru nokkrar fallegar körfur upp úr því. Martin Hermannsson hvíldi hjá KR í leiknum og erlendur leikmaður er enn ekki kominn til sögunnar. Vesturbæingar verða sterkir í vetur, það ætti engum að dyljast.

Lið Snæfells verður öflugt að vanda með sína hörkuframlínu. Fyrstu kynni okkar af erlendu vinnuafli vestanmanna voru ekkert sérstök, en það á margt eftir að gerast áður en þau mál liggja fyrir.

Gaman að sjá þá Magnússyni kljást eftir að Finnur skipti í Snæfell. Það á eftir að taka einhvern tíma að venjast honum í rauðu, en á hinn bóginn er eins og Darri hafi aldrei farið úr röndótta búningnum. Við þreytumst aldrei nokkru sinni á því að segja ykkur hvað Darri Hilmarsson er mikill fagmaður.

Eitthvað er verið að pískra um það að Gillette sé að hugsa um að taka upp auglýsingu á Íslandi og að leikmenn KR og Snæfells verði notaðir sem fyrir og eftir-menn í stykkinu. Það voru ekki undir þrír metrar af skeggi inni á vellinum í einu í þessum leik.

Það er hálfundarlegt að þetta sé bara byrjað allt í einu. Eins gott og það var nú að fá smá sól í sumar, jafnast ekkert á við að heyra ískrið í skónum á ný. Jólin eru að koma.

Hérna eru nokkrar myndir: