Afsakið (þetta) hlé

Tweet

Það er náttúrulega ekkert annað en vanvirðing við þá örfáu lesendur sem enn nenna að kíkja á NBA Ísland að skrifa ekki staf handa þeim í marga mánuði. Hvað sem því líður, getið þið rétt ímyndað ykkur hvort fór ekki um ritstjórn síðunnar þegar hún vaknaði allt í einu upp við það í lok sumars að hún hafði engan áhuga á að skrifa lengur - eftir að hafa gert það nánast daglega í meira en áratug.

Við höfum ekki hugmynd um af hverju ritstjórnin lamaðist skyndilega í ágúst, en mögulega hafa stórar breytingar eitthvað með það að gera. Svona breytingar eins og að flytja höfuðstöðvar okkar úr æsingi höfuðborgarinnar í sveitina og svo, tjah, ýmislegt annað skulum við segja.

Við höfum heldur ekki hugmynd um hvort neistinn til að skrifa er kominn aftur eða ekki. Það eina sem við vitum er að NBA deildin er alveg viðbjóðslega skemmtileg eins og alltaf - og að það er alveg stórkostlega asnalegt að skrifa ekki um það daglega eða vikulega eða hvað það nú er.

Tölvupóstunum hefur auðvitað rignt yfir okkur á nbaisland@gmail.com í þessari löngu og leiðinlegu pásu, þar sem þið lesendur eruð búnir að spyrja okkur hvað sé í gangi. Sum ykkar hafa verið reið yfir þessari leti og kæruleysi, sum ykkar hafið lýst yfir áhyggjum ykkar og spurt hvort við séum yfir höfuð á lífi.*

Við hefðum átt að vera búin að því fyrir löngu, en okkur langaði amk að segja ykkur að við værum enn lifandi, að okkur langaði ekki að loka síðunni, að við hötuðum meira en nokkru sinni að vera ekki lengur með hlaðvarp og að við ætluðum að reyna allt sem við mögulega gætum til að byrja að skrifa aftur. Ef ekki fyrir ykkur, þá fyrir okkur - og ef ekki fyrir okkur, þá fyrir ykkur, fattiði...

Við verðum bara að sjá hvað setur. Þessi færsla er amk byrjun, þó ekki væri annað.

----------------------------------------------------------------------------------------------------

* - Hvert einasta orð í þessari málsgrein er samviskulaus helvítis haugalygi. Við höfum ekki fengið einn einasta tölvupóst vegna málsins, enda er öllum svo skítsama hvort þessi síða er til eða ekki, en við ætlum bara að loka augum og eyrum fyrir þeirri staðreynd og halda áfram eins og ekkert hafi í skorist. Við erum ekki gáfaðari en þetta, eins og þið komust öll að fyrir mörgum árum.

Lokaúrslitin 2017 - Formáli

Tweet

Ef fólk ætlar að draga fram lífið af því að skrifa, hvort sem er að heilu eða hálfu, þarf það að geta skrifað þegar það er þreytt, annars hugar, þjáð og þurrausið. Það sögðum við við sjálf okkur í kvöld þegar við vorum búin að henda pistlinum sem var hálfnaður, en fundum ekki hjá okkur anda til að skrifa nýjan.

Við brutum allar reglurnar sem við vorum búin að setja okkur um þetta. Við blöðruðum öllu sem okkur langaði að segja um úrslitakeppnina frá okkur* í hlaðvörpum og á mannamótum og áður en við vissum af, vorum við runnin inn í eftirlokaúrslitasvartholið, 

Eftirlokaúrslitasvartholið er fyrirbæri sem aðeins fólk sem lifir og hrærist í körfubolta þekkir (eða kannski bara við, það er ekki gott að segja). Merking hugtaksins felst í nafninu, stundum grípur okkur ákveðin tilfinning eftir síðasta NBA leik sumarsins - og hún er stundum dálítið... deprímerandi. 

Og við komumst að því núna, að þetta er sérstaklega þungbær tilfinning þegar úrslitakeppnin stendur ekki undir væntingum í fyrsta skipti síðan við fórum allra okkar ferða á reiðhjólum og borðuðum nammi bara á laugardögum. Þetta voru áhyggjulausir tímar, svona ef hægt er að kalla æsku- og unglingsárin áhyggjulausa tíma, því þeir eru það sannarlega ekki hjá öllum.

En allar götur síðan á þessum tímum BMX-hjóla og blands í poka, hefur NBA deildin díliverað fyrir okkur. Hún hefur alltaf skilað sínu, hvort sem var á vetrum, vorum eða sólríkum sumrum.

Þangað til núna.

Og við vitum ekki alveg hvernig við eigum að haga okkur yfir þessu öllu saman. 

Þið munið að við reynum alltaf að vera heiðarleg hérna á NBA Ísland og það stóð ekki á okkur að viðurkenna að fyrstu þrjár umferðirnar í ár hefðu verið drasl. Þær voru það líka, því miður. Drasl á miðað við hvað, spyrðu? Til dæmis á miðað við allar úrslitakeppnirnar aldarfjórðunginn þar á undan. Það ætti að vera nógu stórt úrtak.

Ókei. 

En þá var komið að lokaúrslitunum sjálfum og það er þar sem fólk byrjar að vera ósammála. 

Við sögðum ykkur (einhvers staðar, í hlaðvarpi, útvarpi, sjónvarpi, á prenti - við munum það ekki) að það gæti vel verið að lokaúrslitin yrðu ekki mjög spennandi rimma (að það væru líkur á því að Golden State myndi vinna einvígið 4-1 - check the tape) per se, en sögðum jafnframt að það truflaði okkur ekkert, því við vissum það að körfuboltinn sem í boði yrði í þessu einvígi yrði ekkert minna en stórkostlegur!

Athugið að það er glapræði að lofa svoleiðis, því það getur enginn vitað upp á hár hvernig körfuboltaeinvígi spilast fyrirfram, sérstaklega ef liðin sem um ræðir mæta til leiks með nýjan mannskap (ef annað þeirra t.d. bætir við sig einum besta körfuboltamanni heims...).

En við lofuðum þessu nú samt - og stóðum við það, fjandakornið. Nánar um það síðar.

Því miður tilheyrum við sennilega frekar fámennum hópi fólks, hvers körfuboltaáhorf gengur ekki alltaf út á að halda með öðru liðinu, heldur erum við mætt til að horfa á körfuboltann sem liðin eru að bjóða upp á hvoru sinni. Hér er alveg sama hvort um er að ræða íslenska boltann eða NBA. Við höldum oftast einfaldlega með körfuboltanum. Og ef leikurinn sem við erum að horfa á hverju sinni er vel leikinn og/eða skemmtilegur, förum við ánægð að sofa.

Stuðningsmenn Cleveland og Golden State hugsa auðvitað ekki svona þegar þeir eru að horfa á liðin sín kljást eina ferðina enn í úrslitum, þó það nú væri. Þeir eru auðvitað brjálaðir allt einvígið og finna liði mótherjans allt til foráttu, það er bara partur af leiknum.

En hvað með alla hina? Hvað með þessa sem áttu ekki hest í kapphlaupinu? Lakers-fólkið og Celtics-fólkið og það fólk allt saman? Gat það ekki notið lokaúrslitanna eins og við?

Hreint ekki allir, virðist vera. Margir af þessum "öllum hinum" urðu fúlir og byrjuðu að vera með leiðindi þegar í ljós kom að einvígi liðanna tveggja sem spiluðu epískan oddaleik í úrslitum árið áður, hefði klárast í fimm leikjum að þessu sinni og "ekki einu sinni verið spennandi!"

Við erum búin að heyra allar mögulegar gerðir af leiðindum varðandi nýafstaðin lokaúrslit, sumar þeirra eiga rétt á sér, aðrar eru hreint út sagt fáránlegar. 

En af því við erum hérna til að hjálpa ykkur, skulum við gæta þess að taka allar þessar helstu vangaveltur fyrir í næstu greinum okkar og pistlum.

Næstu pistlar, hvort sem þeir verða fáir eða fleiri, langir eða stuttir, munu fara í það að leitast við að svara helstu spurningum og/eða fullyrðingum sem orðið hafa á vegi okkar í kring um þriðja lokaúrslitaeinvígi Golden State og Cleveland á jafnmörgum árum.

Ætli þið kannist ekki við megnið af þessum pælingum og fullyrðingum:

* Af hverju í andskotanum var Kevin Durant yfir höfuð að fara til Golden State?

* LeBron James er aumingi af því hann er bara 3-5 í lokaúrslitum - Jordan var 6-0!

* Frammistaða Kevin Durant þýðir einfaldlega að hann er orðinn betri en LeBron James!

* Lokaúrslitaeinvígið var ójafnt og þess vegna var það drasl!

* Iss, (einhver útgáfa af Celtics, Lakers eða Bulls) myndi rústa þessu Warriors-liði í seríu!

* Michael Jordan/LeBron James er klárlega miklu betri en LeBron James/Michael Jordan

* Kevin Durant/Warriors-liðið eyðilagði leiktíðina í ár og ekki bara það, heldur næstu 5 líka!

Þetta er það algengasta, en við eigum eflaust eftir að muna eftir fleiri atriðum þegar við byrjum að takast á við þetta. Við verðum bara að vinna þetta með þessum hætti núna, því fyrstu þrír pistlarnir sem við skrifuðum enduðu alltaf í einhverri algjörri steypu og fóru því í ruslið. 

Þessi hefði sjálfssagt átt að enda í ruslinu líka, flest sem við skrifum ætti að gera það, en við urðum að koma okkur einhvern veginn af stað svo við yrðum búin að klára að gera nýafstaðið tímabil upp áður en það næsta fer af stað í haust.

Hey, það er ekki eins og sé eitthvað mikið annað að gera næstu vikurnar.

Takk fyrir biðlundina.

P.s. - Ef þú ert með spurningar tengdar lokaúrslitaeinvíginu, er þér guðvelkomið að senda okkur þær á nbaisland@gmail.com - við skulum taka þær fyrir og svara þeim ef þær eru gáfulegar.

----------------------------------------------------------------------------------------------------------

* - Fyrsta regla varðandi (körfubolta)skrif

Reyndu að forðast það að "tæma af tönkunum" í spjalli við vini þína, í hlaðvörpum eða fjölmiðlum áður en þú skrifar um leikinn eða einvígið sem þú ætlar að að taka til umfjöllunar, þvi það getur fipað þig þegar kemur að skrifunum. 

Kannski komast sumir upp með þetta, en hafið þó hugfast að jafnvel reyndari pennar geta fipast eða jafnvel lent í sjálfheldu við skrifin ef þeir brjóta þessa reglu. 

Ef þú ert búin(n) að "tappa þessu öllu af þér" áður en þú ferð að skrifa, gætu töfrarnir staðið á sér þegar á þarf að halda. 

Aðeins fólk sem hefur prófað að skrifa af einhverju viti veit hvað við eigum við þegar við tölum um töfrana, en án þeirra væri ritlistin ósköp fábrotin. Og þetta eru raunverulegir töfrar, sem aðeins ákveðinn hluti okkar fær að upplifa.

Ef þú gerir þetta allt saman rétt og sest beint að lyklaborðinu eftir leik (því fyrr, því betra, þó sumir þurfi að leyfa hlutunum að gerjast aðeins fyrst), er þetta allt saman brakandi ferskt í hausnum á þér og þá hafa fingurnir ekki undan við að drita öllu sem þú þarft að segja á lyklaborðið. 

Stóri bónusinn við að vinna þetta svona er að þá er greinarskrifari líka miklu betur í stakk búinn til að rökræða leikinn/einvígið við hvern sem er, því þá er hann nýbúinn að telja fram allt það markverðasta sem gerðist í því í greininni sinni og það sem meira er - færa rök fyrir skoðunum sínum á því! 

Svona er hægt að hagnast á því að gera hlutina í réttri röð, ekki það að ritstjórn NBA Ísland sé til fyrirmyndar í neinu sem kallast getur skipulag eða hagkvæmni. En þó ekki væri nema einn ungur og upprennandi penni þarna úti - já, eða blaðamaður sem veit ekkert hvað hann er að gera. NBA Ísland er alltaf tilbúið að hjálpa.

Ykkur er alltaf, öllum, meira en velkomið að senda okkur línu um hvað sem ykkur liggur á hjarta. Hvort sem það tengist ritlist eða lokaúrslitaeinvíginu 2017 - ekki hika við að hafa samband. Við svörum öllum tölvupóstum innan skynsamlegra marka. Við erum eftir sem áður með póstfangið 

nbaisland@gmail.com 

Frá ritstjórn

Tweet

Úrslitakeppnin hjá strákunum í körfuboltanum hér heima hófst í kvöld með sigri KR á Þór frá Akureyri. Við erum með talsvert samviskubit yfir því að hafa ekki boðið ykkur upp á smá upphitunarhlaðvarp áður en herlegheitin hófust, en þetta samviskubit er reyndar ekkert annað en meðvirkni og uppgerð, því það er fjandakornið ekkert okkur að kenna þó þið hafið ekki fengið hlaðvarpið ykkar.

Viðmælendur okkar og sérfræðingar sem gefið hafa tíma sinn til að hlaða með okkur vörp hafa bara ekki alltaf tíma - og við ekki heldur. Svona er þetta stundum í áhugamennskunni. Þetta er ekki alltaf þarna, en það er frítt, fjandakornið.

Fyrir þau ykkar sem enn þyrstir í upphitanir, bendum við á frábært spjall þeirra Teits Örlygssonar goðsagnar, Tómasar Þórs Þórðarsonar á Fréttablaðinu/Vísi og Ólafs Þórs Jónssonar frá karfan.is við hann Dodda á Sportrásinni í vikunni. Þar er á ferðinni tæpitungulaust og tæmandi uppgjör á vetrinum í karlaboltanum og spáð í spilin fyrir úrslitakeppnina. Gæðaefni það, eins og búast má við frá öðrum eins úrvalsmannskap.

Ef við vindum okkur aðeins vestur um haf, eru tvær tegundir af fréttum að ríða húsum í NBA heiminum. Annars vegar vandræðagangur á öllum mögulegum liðum, aðallega Warriors náttúrulega, og hinsvegar þetta ógurlega kapphlaup um nafnbótina Verðmætasti leikmaður deildarkeppninnar.

Við erum eitthvað búin að taka þátt í þessum MVP-umræðum sem eru í gangi núna og satt best að segja hefur okkur oftar en einu sinni langað að leggja okkar lóð fastar á þær vogarskálar, en sem betur fer létum við það eiga sig. Tvennt kemur þar til: Annars vegar er allt of stutt eftir af tímabilinu og hinsvegar eru sveiflurnar í kapphlaupinu svo miklar og svo margir kandídatar að það væri glapræði að skrifa sig út í horn með það á þessum tímapunkti.

Reyndar tókum við stóra ákvörðun í þessum efnum í dag. Ef ekkert breytist stórkostlega í deildinni á þessum örfáu vikum sem eftir eru af deildarkeppninni, stefnir allt í það að þið fáið tvo spikfeita pistla tengda MVP-titlinum áður en úrslitakeppnin hefst. Glöggir lesendur átta sig kannski á því hvert efni pistlanna verður, en hafið ekki áhyggjur, þið fáið öll að lesa þá. Báðir pistlarnir eru svo sem komnir langt með að skrifa sig sjálfir, ef svo má segja, en til öryggis er best að bíða þangað til boltarnir hætta að skoppa í deildarkeppninni þann 12. apríl (úrslitakeppnin hefst 15. apríl).

Án þess að fara mikið nánar út í þá sálma hér, er ljóst að þetta MVP-kapphlaup í NBA í ár er með þeim svakalegri sem sést hafa í sögu deildarinnar og það eru engar ýkjur. Þið þurfið ekki annað en að skoða útúr steraða tölfræðina sem nokkrir af kandídötunum í ár eru að bjóða upp á í vetur.

Þessar sveiflur eru afsprengi þessarar nýju NBA deildar sem við höfum verið að segja ykkur frá undanfarin misseri og jafnvel ár. Stökkbreytingarnar sem orðið hafa á spilamennsku í deildinni að undanförnu hafa verið gríðarlegar og eru raunar svo miklar að þær gera störf forráðamanna félaganna í NBA deildinni enn erfiðari en þau voru áður. Bætið svo við þetta nýjum (og frekar glórulausum) kjarasamningum leikmanna og starf framkvæmdastjórans í NBA deildinni er orðið álíka spennandi og knattspyrnudómarastarfið í Argentínu.

Kannski erum við orðin svona gömul, en allar þessar breytingar rugla okkur stundum í ríminu. Stundum finnst okkur hreinlega sem við þekkjum ekki deildina okkar lengur. NBA-deildin sem við ólumst upp við - þessi með Magic, Bird og Jordan - meikaði oftast sens. Bestu leikmennirnir voru í bestu liðunum, bestu leikmennirnir fengu MVP-styttur og unnu meistaratitla og bestu liðin unnu. Það var bara þannig. Og það var frábært.

Undanfarin tíu ár - og allra helst síðustu c.a. 3-4 ár - hefur þetta allt saman breyst. Mennirnir sem kjörnir eru leikmenn ársins í deildarkeppninni vinna alls ekki alltaf meistaratitla og bestu liðin vinna ekki endilega alltaf titlana.

Vængmenn sem áttu erfitt með að hanga í deildinni og eyddu fyrstu árum sínum í henni á 10 daga samningum, urðu skyndilega þyngdar sinnar virði í gulli, leikstjórnendur fóru að taka flest skot allra í liðum sínum, miðherjastaðan (stein) dó - en lifnaði svo aftur við með látum eftir að hafa drepið skotbakvarðarstöðuna og rænt úr henni hjartanu, allt byrjaði að ganga út á að teygja á vörnum andstæðinganna með því að láta skotglaðan leikstjórnanda spila vegg og veltu með stórum manni sem annað hvort var heimsklassa íþróttamaður og/eða skytta og umkringja þá með eintómum langskyttum, tölfræðinördar fengu hálaunastörf, fram komu einhyrningar og skyttur sem voru svo magnaðar að það gretti sig enginn þó þær tækju 3ja stiga skot nær miðju en þriggja stiga línu - og það helst í hraðaupphlaupum.

Já, það eru örar breytingar í deildinni okkar í dag, en að okkar mati eru þær enn sem komið er jákvæðar. Ef við eigum að vera hreinskilin, er ekkert rosalega langt þangað til að 3ja stiga skotgleðin síaukna í deildinni gæti endað í einhverri hringavitleysu, en við erum amk ekki komin þangað ennþá.

Það hafa oft verið fleiri betri lið í deildinni en nú er (og við höfum vælt yfir því hér), en við erum tilbúin að rökræða við hvern sem er, hvar sem er, að deildin hafi líklega aldrei átt eins ríkulegt magn af leikmönnum sem eiga enga sína líka í sögu deildarinnar og flestir þessir leikmenn eru einmitt einstakir af því þeir eru svo hrikalega góðir í körfubolta.

Við höfum ekki hugmynd um hvaða lið vinnur meistaratitilinn í NBA deildinni sumarið 2017 - hvort það verður besta liðið sem nær að landa þessu, eða næstbesta liðið, eða bara eitthvað... rugl. Það getur enginn spáð í það á vitrænan hátt á þessari stundu og ef það er ekki skemmtilegt, vitum við svo sannarlega ekki hvað er skemmtilegt.

Frá ritstjórn

Tweet

Við munum vel hvað við blótuðum Bill Simmons ekki í hljóði hérna forðum þegar hann hætti að nenna að skrifa pistla á ESPN og gerði ekkert annað en að dæla út (stundum metnaðarlitlum) hlaðvörpum.

Líklega hefur Simmons aldrei verið jafn lélegur við að skrifa pistla á sínum tíma og við höfum verið undanfarið, en munurinn er kannski sá að hann var í 100% starfi við það, meðan við þurfum að djöggla námi, fjölskyldulífi, leik og starfi. Jú og við tölum/skrifum stundum um eitthvað annað en Boston Celtics.

Annars er þessum pistli ekki ætlað að vera skot á Simmons blessaðan, því hann var ákveðinn brautryðjandi fyrir fólk með takmarkaða menntun, metnað og gáfnafar í íþróttablaðamennsku. Þetta er ekkert skot, þetta er staðreynd og Simmons sjálfur myndi eflaust kvitta upp á þetta. Simmons hafði tvennt til brunns að bera og hefur enn - hann er duglegur andskoti þegar hann nennir því og hann er með frjótt ímyndunarafl.

Og hann veitti okkur líka innblástur á sínum tíma. Það má hann sannarlega eiga, þrátt fyrir sína vankanta. Og hann reyndi að vera skemmtilegur, þó það hafi stundum farið öfugt ofan í fólk. 

Við komumst að því sjálf fyrir löngu að það er alveg sama hvort þú heitir Bjarni Fel eða Bill Simmons, Martin Tyler eða Marv Albert, það verður alltaf alveg rosalega mikið af fólki þarna úti sem hatar þig og allt sem þú segir og er tilbúið að segja þér það, hvort sem þú átt það skilið eða ekki. Þannig er þetta bara.

Ætli við höfum ekki reynt með veikum mætti að feta í fótspor Simmons í baráttunni hér á landi. Við höfum verið að breiða út fagnaðarerindið frá því á níunda áratug síðustu aldar og það með nokkuð markvísum og beinum hætti í ræðu og riti síðasta rúma áratuginn. Fólk á skilið að fá að kynnast bestu skemmtun jarðar, meira að segja leiðinlegt fólk... svona næstum því.

Stundum berast okkur skilaboð og skeyti frá fólki sem kennir okkur um endurnýjaðan eða nýupptekinn áhuga sinn á NBA deildinni (eða körfubolta yfir höfuð) og þá brosum við eins og hýenur á Holtinu. Og svo rennur eitt lítið tár niður aðra hvora kinnina. Við erum ekki flóknari lífverur en þetta. Við fengum svona skilaboð í dag og það verður aldrei þreytt. Það skiptir máli.

Þúsund sinnum hefur staðið til að breyta NBA Ísland. Spæsa síðuna upp, færa hana í nýjan búning, kommersjalísera hana, breyta henni, en aldrei hefur orðið neitt úr því. Það kemur til af tveimur ástæðum:

1.) - Við trúum ekki á það að breyta einhverju ef það virkar (sæmilega, á sinn hátt).

2.) - Við rekum síðuna eins og við treystum okkur að reka hana, án mikilla afskipta eða aðstoðar annara, af því þá getum við verið örugg um að hún gangi og virki. Við erum hvorki markaðsfræðingar né forritarar - við skrifum um körfubolta.

NBA Ísland hefur sumsé verið dálítið eins og Andre Miller í gegn um tíðina. Ekkert flott, ekkert flashy, en hún hefur alltaf rúllað áfram, þó hægt hafi farið.

Þetta þýðir þó ekki að við séum ekki opin fyrir því að reyna nýja hluti. Ef þú eða þið vitið um fólk sem langar að hjálpa til, sponsa síðuna, gefa henni andlitslyftingu, hýsa hana, hanna hana, skrifa á hana eða kaupa hana, þá erum við alveg tilbúin að hlusta. 

Þetta vita allir sem lesa NBA Ísland að staðaldri, en við höfum engar áhyggjur af því að eitthvað svona komi upp á, af því við höfum sterkan grun um að það sé sennilega einmitt svona sem fólk vill hafa Íslandið sitt. Einfalt, asnalegt, íhaldssamt, einlægt, ókeypis og annað slagið fyndið eða fræðandi.

Ef ekki, er símanúmerið okkar nbaisland@gmail.com

Afsakið þennan stórundarlega pistil sem rann allt í einu fram af lyklaborðinu og gleðilega NBA hátíð 2016-17, kæru lesendur. Takk fyrir lesturinn á síðunni og hlustunina á hlaðvarpið. Það eruð þið sem haldið þessu uppátæki gangandi.

Ritstjórnin

Frá ritstjórn

Tweet

Þið vitið að okkur hérna á ritstjórn NBA Ísland þykir ákaflega vænt um traustan lesendahópinn okkar, sem að hluta til hefur verið með okkur frá byrjun. Þannig reynum við að koma til móts við lesendur eins og við getum þegar það á við.

Oft vantar fólk upplýsingar um hitt eða þetta (t.d. leikjadagskrá), stundum vantar það ráðleggingar um eitt eða annað (t.d. ferðir á leiki) og stundum hefur það samband til að segja okkur að það hafi gaman af að lesa NBA Ísland. 

Þetta síðastnefnda verður aldrei þreytt.

Fyrir þá sem vilja fá sem mest út úr því að nota NBA Ísland (til viðbótar við lesturinn) hlusta auðvitað á hlaðvarpið, læka NBA Ísland á Facebook og fylgja okkur eftir á Twitter. Það er til dæmis þægilegt að vera með læk á Íslandið á Facebook, því við setjum nýjar greinar oft beint þar inn eftir að þær fæðast og margir lesa pistlana eftir að við birtum tengla á þá á Facebook.

Twitter er óhemju gagnlegt og skemmtilegt verkfæri. Við notum Twitter líka til að miðla efninu okkar, en megnið af tímanum hjá okkur í því apparati fer í að vera með fíflagang á leikskólastigi, hvort sem hann tengist körfubolta eður ei. 

Við hvetjum fólk eindregið til að bæta NBA Ísland í félagsmiðlaflóruna sína. Það borgar sig.

Það er til dæmis ógeðslega hallærislegt að síðan skuli vera föst í 980 lækum á Facebook. Þetta á að fara yfir þúsund og það strax.

Sömu sögu er að segja af Twitternum, þar sem við erum með 1890 fylgjendur í stað 2000+, sem er algjört lágmark ef við eigum að vera að þessu yfir höfuð. Verið endilega dugleg að læka og fylgja og fáið vini ykkar og fjölskyldu til að taka þátt líka.

Einhverra hluta vegna virðist ákveðinn hluti lesenda okkar einfaldlega ekki hafa andlega burði til að átta sig á því að það er hægt að sjá það á ákveðinni síðu á NBA Ísland hvaða leikir verða í beinum útsendingum bæði á Stöð 2 Sport og NBATV. Kannski er það af því það stendur ekki ritað "Dagskrá/Leikir í beinni" með nógu stórum og skýrum stöfum á tveimur stöðum á síðunni. Hvur veit.

Þeir sem kynnu að hafa áhuga á að auglýsa eitthvað á síðunni geta haft samband á nbaisland@gmail.com, en við þurfum ef til vill að fara að hressa aðeins upp á þann hluta hjá okkur. Í framhaldi af því þyrftum við svo dæmis að reyna að keyra NBA Ísland punktur is aftur í gang.

Að lokum viljum við fara þess auðmjúklega á leit við lesendur síðunnar að þeir aðstoði okkur við að reka hana með fjárframlögum, en það er hægt að gera í gegn um paypal-þjónustuna með því að smella á gula hnappinn "Þitt framlag" til hægri á síðunni eða smella hér. 

Það er dýrt að endurnýja tölvukostinn, myndavélaflotann og byggja upp hljóðver fyrir hlaðvarpsupptökur og því þætti okkur vænt um ef þið gætuð veitt okkur lið í þeim efnum, það þurfa alls ekki að vera stórar upphæðir ef þeir sem eru aflögufærir taka þátt. Allt efnið á NBA Ísland er frítt og verður það áfram, en þeir sem vilja koma þakklæti sínu á framfæri geta notað tækifærið og gert það núna. Hver veit, kannski verða þeir gjafmildustu verðlaunaðir með NBA Ísland bol...

Ykkur er að sjálfssögðu alltaf frjálst að hafa samband við ritstjórnina á nbaisland@gmail.com ef þið hafið einhverjar spurningar eða athugasemdir um eitthvað tengt Íslandinu ykkar. Það er mjög gefandi að fá bréf frá lesendum og heyra hvernig efnið leggst í þá, því stór partur af öllu þessu umstangi er jú alltaf tileinkaður ykkur - lesendunum okkar.

Viðingarfyllst,

Ritstjórn NBA Ísland

Gleðilega hátíð

Tweet

Gleðilegt ár krakkar

Tweet

NBA Ísland óskar lesendum gleðilegs árs og þakkar fyrir lesturinn
og stuðninginn á árinu 2013. Þið eruð sannkallað úrvalsfólk.

Einar Bollason er sjötugur í dag

Tweet

Eftir því sem við komumst næst, er stórhöfðinginn Einar Bollason sjötugur í dag. Af því tilefni þótti okkur ekki annað hægt en að segja um það nokkur fátækleg orð.

Einar er auðvitað goðsögn í körfuboltaheiminum hér á landi og saga hans bæði sem leikmanns og þjálfara er rík og merkileg. En við ætlum að láta öðrum eftir að segja þá sögu og skrifa um það bækur, enda fengum við ekki að fylgjast með afrekum Einars á vellinum og á hliðarlínunni.

Nei, það er sjónvarpsmaðurinn Einar Bollason sem við fengum að fylgjast með og það er sú hlið á Einari sem okkur langar að hampa við þetta tækifæri. Hvort sem hann veit af því eða ekki, ól Einar nefnilega upp heila kynslóð af körfuboltaaðdáendum um allt land þegar hann lýsti NBA körfuboltanum á Stöð 2 á tíunda áratug síðustu aldar.

Eins og flestir vita var tíundi áratugurinn gullöld körfuboltans á Íslandi hvað vinsældir snertir. Michael Jordan og körfuboltamyndir voru það eina sem komst að á landinu og allir frá smábörnum til ellilífeyrisþega söfnuðu körfuboltamyndum og vissu hver Muggsy Bogues, Spud Webb, Manute Bol og auðvitað Michael Jordan voru.

Og maðurinn sem batt þetta saman var Einar Bollason.

Þeim sem fylgdust spenntir með NBA boltanum á þessum árum er líklega enn í fersku minni líflegar lýsingar Einars í beinni útsendingu, hvort sem var með Heimi Karlssyni,Valtý Birni Valtýssyni eða Snorra Sturlusyni.

En í þá daga voru leikir mun sjaldnar í beinni útsendingu en nú tíðkast og þá var NBA leikur vikunnar á Stöð 2 oftast nokkurra daga eða jafnvel viku gamall. Þá var fyrri hálfleikurinn sýndur klipptur og svo var farið yfir í "beina" í síðari hálfleiknum og leiknum fylgt til enda.

Það góða við leik vikunnar var að hann var valinn eftir á og því fengu áhorfendur jafnan að sjá góðan og gjarnan mjög spennandi leik. Eftirminnilegir leikir sem við munum eftir voru til dæmis óvæntur sigur Minnesota Timberwolves þegar liðið var á sokkabandsárunum, spennandi leikir með Spútnikliði Cleveland undir forystu Mark Price, ævintýralegur leikur milli Boston og Portland þar sem Larry Bird sýndi af hverju hann er einn af þeim bestu og svo nokkrir skemmtilegir Stjörnuleikir - ekki síst leikurinn frá árinu 1989 sem var m.a. síðasti Stjörnuleikur Kareem Abdul-Jabbar.

Alltaf náði Einar að glæða þessa leiki lífi þó hann hafi nær örugglega vitað úrslit þeirra allra þegar hann settist inn í mynd/hljóðverið.

Það er ekki víst að allir áhorfendur þá hafi gert sér grein fyrir því að úrslit leiksins sem sýndur var hverju sinni voru löngu ráðin.

Lýsingar Einars gerðu það hinsvegar að verkum að fólk upplifið þetta allt eins og í þráðbeinni um leið og það kveikti á sjónvarpinu.

Einari var svo mikið í mun að gera leikina spennandi og skemmtilega að hann átti það oft til að lýsa því yfir að nú væri sigurinn allt nema í höfn hjá liðinu sem væri yfir - sagði þá gjarnan þessa klassísku setningu "þett´er búið!" - en auðvitað sneri þá liðið sem var undir við blaðinu, kom til baka og vann.

Það má vel vera að það hafi ekki verið erfitt að selja vöruna körfubolta á öndverðum tíunda áratugnum, en við erum óendanlega þakklát fyrir að það hafi verið Einar Bollason sem færði okkur NBA deildina heim í stofu með þekkingu sinni, mælsku og umfram allt ástríðu fyrir leiknum.

Allir sem vettlingi gátu valdið spiluðu körfubolta á blómaskeiði íþróttarinnar (hjá almenningi) á árunum um og eftir 1990 og úti á leikvelli var ekki óalgengt að heyra unga iðkendur fara með frasa úr smiðju Einars eftir leik vikunnar helgina áður. Það er alveg öruggt að margir af frösunum sem við notum í kring um NBA boltann í dag koma beint úr smiðju Einars.

NBA Ísland óskar Einari Bollasyni hjartanlega til hamingju með stórafmælið og óskar honum alls hins besta í framtíðinni. Hafi hann okkar einlægu þakkir fyrir að kynna okkur fyrir skemmtilegustu deild í heimi og um leið fallegasta leik veraldar.

Ritstjórnin

(Myndin með færslunni kemur frá Körfuknattleikssambandinu og er af þeim Heimi Karlssyni, Michael Jordan og Einari Bollasyni).

Nokkur orð frá ritstjórninni

Tweet

NBA Ísland hefur verið til í núverandi mynd í meira en þrjú og hálft ár. Það er skrítið, þar sem okkur finnst ekki vera nema nokkrir mánuðir síðan ýtt var úr vör.

Skondið að minnast þess að það fyrsta sem tekið var til umfjöllunar á síðunni var brottrekstur Lawrence Frank frá New Jersey Nets haustið 2009, en liðið hafði þá tapað fyrstu sextán leikjum sínum á leiktíðinni.

Byrjun Frank hjá félaginu var spegilmynd þeirrar ógæfu, því þá vann liðið fyrstu þrettán leikina sína þegar hann var að stíga sín fyrstu skref sem aðalþjálfari fyrir sléttum níu árum.

Og hver var nú aðalmaður Frank inni á vellinum þegar hann tók við liðinu á sínum tíma?  Jú, Jason Kidd, sem nú er að reyna að fá Frank til að aðstoða sig eftir að hann landaði óvænt aðalþjálfarastöðunni hjá Nets á dögunum - korteri eftir að hafa lagt skóna á hilluna.

Annars var pælingin með þessum pistli ekki að fara yfir afreksverk Lawrence Frank. Okkur langaði bara að staldra aðeins við og höfða til samvisku lesenda.

Við vorum nefnilega að setja upp Paypal-fídus á síðuna sem þýðir að nú geta þeir sem eru aflögufærir lagt okkur lið með beinum hætti (ef apparatið virkar, það er að segja).

Ef þig langar að hjálpa til við rekstur síðunnar eða bara þakka okkur fyrir að sjá þér fyrir lestrarefni á köldum vetrarnóttum í gegn um árin, máttu endilega taka þátt í þessu. Ekki veitir af. Hnappinn finnurðu til hægri á síðunni, hann er gulur og á honum stendur "Þitt framlag."

Ef þið lendið í vandræðum með þetta getið þið haft samband á nbaisland@gmail.com og bölvað hressilega, en hljótum að fá þetta apparat til að virka.

NBA Ísland er einn af þessum fáum ósviknu hlutum í lífinu sem eru ókeypis og verður það vonandi áfram, en allir þurfa jú að fæða og klæða börnin sín eins og Latrell Sprewell sagði forðum.

Þið takið vonandi ekki illa í þetta, vefurinn breytist ekkert efnislega.

Nú er veturinn liðinn og leiktíðinni senn að ljúka. Það er ekki ólíklegt að einhverjar útlitsbreytingar verði á vefnum næsta haust en það er allt í athugun núna.

Ljóst er að samningar verða líklega gerðir við nýja stuðningsaðila - bæði fyrir síðuna sjálfa og Hlaðvarpið. Þeim sem hafa áhuga á að skoða það er bent á að hafa samband á nbaisland@gmail.com.

NBA Ísland er hægt og bítandi að ná til fleiri lesenda um allt land og er að verða fast stopp í vefrúnt þeirra sem fylgjast með körfubolta hér heima og erlendis. Við vonum að síðan eigi eftir að halda áfram að vaxa og dafna á næstu árum og hver veit nema hún fái andlitslyftingu í haust.

Að lokum viljum við endilega hvetja fólk til að láta í sér heyra með því að senda okkur póst ef það hefur eitthvað við síðuna að athuga  - jákvætt eða neikvætt - við tökum allar ábendingar (og sérstaklega hrós) alvarlega.

Það er gaman að skrifa fyrir fólk eins og ykkur.

Að lokum eru hér nokkrir punktar sem flestir hafa vonandi á hreinu:

Hérna finnurðu NBA Ísland á Facebook
Hérna finnurðu NBA Ísland á Twitter
Hérna finnurðu upplýsingar um NBA Ísland
Hérna finnurðu upplýsingar um hvaða leikir eru í beinni, hvar og hvenær.
Hérna finnurðu hið gríðarlega vinsæla Hlaðvarp NBA Ísland

Til að hafa samband við NBA Ísland sendirðu svo (enn og aftur) póst á nbaisland@gmail.com - og hikaðu ekki við það - við eigum augljóslega ekki marga vini.

Takk kærlega fyrir okkur, elskurnar.

Ritstjórn NBA Ísland