Glöggir taka eftir því að þetta eru ekki alveg réttar tölur, því tæknin var eitthvað að stríða mönnum fyrstu mínúturnar í leiknum.
Það voru vandræði með netið í Seljaskóla og það er ekkert nýnæmi. Það hafa verið vandræði með netið í Seljaskóla amk síðan árið 2005. Oft er ekkert net þar.
Seljaskóli er ekki eina íþróttahúsið sem er með allt niður um sig í netmálum. Það er leiðinlegt að vera að tuða yfir þessu, en svona er þetta bara.
Það getur vel verið að sé kreppa og allt það, en félög í úrvalsdeild - alveg sama hvort það er í körfu, hand- eða fótbolta - eiga að vera með skothelda nettengingu. Annað er GLÓRULAUST! Þetta er ekki árið 1986. Fólk vill fá tölfræðina sína strax og blaðamenn þurfa að geta unnið á netinu til að sinna starfi sínu almennilega.
Við ætlum að nota þetta tækifæri og skora á félögin í Iceland Express deildinni að fara yfir netmálin sín og kippa þeim í lag. Við ætlum að gera lauslega könnun á netmálum og aðbúnaði næstu daga og birta niðurstöðurnar hér á vefnum. Við hvetjum fjölmiðlamenn og aðra til að senda okkur ábendingar á netfangið okkar nbaisland@gmail.com. Félög sem standa sig fá klapp á bakið en þau sem eru með allt niður um sig fá skussaverðlaunin.
Er þitt félag í ruglinu og með netið í ólagi? Bjargaðu því fyrir horn sjálfur eða láttu einhvern annan kippa því í liðinn. Þetta er prinsippatriði fyrir félög með metnað.
