Það liggur í augum uppi að þessir huggulegu menn eru allir þeldökkir og hafa spilað í NBA deildinni.
Tvö atriði í viðbót eiga þeir sameiginleg. Getur þú sagt okkur hver þau eru?
Thursday, December 13, 2012
Önnur hel***is getraun
Það liggur í augum uppi að þessir huggulegu menn eru allir þeldökkir og hafa spilað í NBA deildinni.
Tvö atriði í viðbót eiga þeir sameiginleg. Getur þú sagt okkur hver þau eru?
Tuesday, December 11, 2012
Getraunin góða
Undirtektirnar sem við fengum vegna síðustu getraunar voru vægast sagt hræðilegar.
Þó náði einn snjall piltur að koma með helminginn af svarinu. Við vorum að leita eftir amk tveimur hlutum sem tengdu þá Jeff Malone, Tyrone Corbin og Kevin Willis.
Það vildi svo skemmtilega til að þessir gömlu refir léku allir eitthvað með Miami Heat leiktíðina 1995-96 og voru þess vegna liðsfélagar Kurt Thomas sem enn er að spila í deildinni.
Thomas leikur með ellismellunum í New York Knicks í dag, en hann var á nýliðaárinu sínu með Miami árið 1995.
Af hverju er Golden State að vinna körfuboltaleiki?
Merkilegir hlutir eru að gerast í körfuboltanum í Oakland þessa dagana. Þó er kannski rangt að segja að þessir hlutir séu að gerast í Oakland. Þeir eru að gerast víða um Bandaríkin og koma sannarlega á óvart.
Golden State Warriors er nefnilega allt í einu farið að vinna körfuboltaleiki og það ekki síst á útivöllum. Liðið vann sinn fjórða útisigur í röð á erfiðu sjö leikja keppnisferðalagi í nótt þegar það skellti Charlotte "Við erum ekkert svo að fara að enda leiktíðina 7-75" Bobcats, 104-96.
Golden State hefur því tryggt sér yfir 50% vinningshlutfall á 7+ leikja keppnisferðalagi í fyrsta skipti síðan leiktíðina 1970-71.Þessi fjögurra leikja sigurganga Warriors er sú lengsta á tímabilinu og aðeins San Antonio (11-2) hefur byrjað betur á útivelli en Golden State (8-4).
Þessir átta sigrar í fyrstu tólf útileikjum Warriors er besta útivallabyrjun liðsins síðan leiktíðina 1993-94.
Sigur Warriors (14-7) á Bobcats tryggði að lokum bestu byrjun liðsins í deildakeppninni síðan leiktíðina 1991-92. Já, það eru um það bil tuttugu ár síðan körfuboltaþenkjandi Oakland-búar hafa verið svona glaðir að hausti.
Í tilefni af þessari litlu rispu Warriors ákváðum við að kíkja aðeins í bækurnar og komumst að raun um að þessi fjögurra leikja sigurganga liðsins - og sjö sigrar í síðustu átta leikjum - er besti árangur liðsins síðan haustið 2007 þegar það vann fimm leiki í röð og átta af níu.
Það er þó aldrei langt í grínið þegar þessi ágæti klúbbur á í hlut, því liðið hóf leiktíðina haustið 2007 á því að tapa fyrstu sex leikjunum áður en það náði ofangreindri rispu. Þetta félag er með ólíkindum.Það var auðvitað Stephen Curry sem fór fyrir Warriors í sigrinum á Kisunum í nótt þegar hann skilaði mjög svo Curry-legri 27/7/7 línu.
Merkilegt hvað þessi rúmlega 30 kílóa piltur nær alltaf að skila af fráköstum, en hann er með fjögur að meðaltali í leik auk sex stoðsendinga og tæplega 18 stiga á ferlinum og er að hóta því að skila 20 stigum í leik í fyrsta skiptið á ferlinum í ár.
Eins og nánast alltaf þegar lið stíga upp úr flórnum og fara að vinna leiki, eru það varnarleikur og fráköst sem eru að skapa velgengni Golden State, en liðið er nú samt að fá tölfræðigúrúa til að klóra sér ansi fast í hausnum í vetur. Þeir botna ekkert í því af hverju liðinu gengur svona vel.
Ykkur er óhætt að bæta okkur á þann lista - Golden State hefur ekkert með það að gera að vinna 14 af 21 leik. Ekki undir neinum kringumstæðum. Eins og alltaf, alltaf, alltaf, hanga lágmark ein alvarleg meiðsli eins og draugur á liði Golden State. Það er í meira lagi sorglegt að lesa línurnar "og þetta er þeim að takast án Andrew Bogut" í hverri einustu umfjöllun um liðið.
Bogut myndi styrkja liðið mikið ef hans nyti við, en við óttumst að það sama sé í gangi hjá Bogut og Andrew Bynum og ráðleggjum stuðningsmönnum Warriors að halda nú ekki niðri í sér andanum meðan þeir bíða eftir að Balkanskaga-Ástralinn skemmtilegi nái sér af einhverjum af þeim 1300 meiðslum sem hrjá hann.
Nú höfum við ekki horft mikið á Golden State spila í vetur, raunar ekki nema örfáar mínútur, en það þýðir ekki að við getum ekki myndað okkur skoðanir á ástæðunum að baki nýfundinni velgengni liðsins. Skárra væri það nú. Þú veist að við hötum nú ekki að freta einhverjum órökstuddum skoðunum út í loftið.
Við höfum minna en enga trú á Mark Jackson sem þjálfara, svo við ætlum ekki að þakka honum viðsnúninginn. Jackson er ekki annað en þeldökkur Vinny del Negro í okkar bókum. Afsakið orðbragðið.Nei, við ætlum freka að henda Ewing-kenningu á Monta Ellis.
Sá skotóði og skemmtilegi bakvörður fór eins og flestir vita til Milwaukee í skiptum fyrir Andrew Bogut (og fleira) og svo virðist vera að það hafi haft þessi fínu áhrif á Warriors, jafnvel þó Bogut spili ekki neitt.
Tölfræðingar hafa alla tíð haft uppi efasemdir um hagkvæmni þess að vera með lágvaxinn og óhemju skotglaðan mann í skotbakvarðarstöðunni og aumingja Milwaukee er að heita má komið með tvo slíka, því seint verður Brandon Jennings ruglað saman við John Stockton þegar kemur að leikstjórn og listinni að gefa boltann.
Milwaukee getur unnið hvaða lið sem er hvenær sem er eins og Boston og Brooklyn fengu að vita á dögunum, en oftar en ekki skjóta þeir Ellis og Jennings liðið sitt út úr leikjum en inn í þá þó þeir séu mjög erfiðir viðureignar fyrir hvaða bakverði sem er.
Auðvitað er það bilun að kenna Monta einum um þennan viðsnúning hjá Golden State, því liðið er jú líka með unga og efnilega leikmenn eins og Klay Thompson og Harrison Barnes í bland við fína rulluspilara eins og Jarrett Jack og Carl Landry.
Við ætlum samt að kenna aumingja Ellis um þetta allt saman, eins og kvikindin sem við erum.
Við könnumst við nokkra stuðningsmenn Golden State Warriors á Íslandi.
Þetta eru oftar en ekki menn á besta aldri sem festust í neti Oakland liðsins þegar það hafði Run-TMC gengið í sínum röðum í kring um 1990.
Það hefur ekki verið neitt grín að halda með þessu liði síðan og ef þetta það verður á einhvern hátt samkvæmt sjálfu sér, verða þeir Steph Curry og David Lee væntanlega báðir komnir í gifs áður en við vitum af. Ekki síst eftir að hafa fengið svona gott jinx frá ritstjórn NBA Ísland.Við vonum nú samt að Golden State pappíri sig og nái sér einu sinni á strik, fjandakornið. Það er nú kominn tími á það og stuðningsmennirnir eiga það skilið, enda með þeim hollari og betri í gervallri NBA deildinni.
Við erum fjarri því búin að fyrirgefa Warriors að tapa nær öllum leikjum sínum viljandi á síðustu leiktíð til að missa ekki valréttinn sinn frá sér, en okkur gruar að Körfuboltaguðirnir sjái til þess að jafnt verði í spilunum þegar yfir lýkur.
Það er venjulega þannig, nema einna helst þegar San Antonio á í hlut.
P.s. - Á neðstu myndinni í færslunni má sjá Stephen Curry sem barn í kjöltu föður síns Dell Curry sem var heimsklassa skotmaður á sínum tíma. Við hlið Curry-feðga situr Mitch Richmond úr Run-TMC genginu og sá gráhærði á bakvið er Don Nelson, sem þjálfaði Warriors-liðið með þá Mullin, Richmond og Hardaway.
Saturday, December 8, 2012
New York er enn að vinna körfuboltaleiki:
Geðveikustu einstaklingar hefðu aldrei spáð þessu. Breytingarnar sem urðu á liði New York milli tímabila þóttu fremur fyndnar en líklegar til árangurs. New York hafði ekki úr miklu að moða á leikmannamarkaðnum í sumar enda eru lykilmenn liðsins ansi dýrir í rekstri. Félagið ákvað þó að næla sér í nokkra leikmenn sem flestir voru komnir nokkur ár fram yfir síðasta söludag.
Spólum aðeins áfram og í dag sigur liðið í efsta sæti Austurdeildar eins og áður sagði, með 14 sigra og aðeins fjögur töp. Við skrifuðum nokkur orð um New York liðið fyrir nokkrum vikum en urðum hreinlega að endurtaka það úr því að Öskubuskuævintýrið lifir enn.
Það er ósköp eðlilegt að óvæntir hlutir gerist í NBA deildinni og við fáum oft óvæntar sigurgöngur úr ólíklegum áttum. Fáir sáu þessa hjá Knicks þó fyrir.Kíkjum á nokkrar tölur.
Vissirðu að New York er 32-10 síðan Mike Woodson tók við liðinu í mars?
Vissirðu að liðið er 19-1 á heimavelli í tíð Woodson? Nítján - eitt!
Liðið hefur aðeins tapað fyrir Miami (á síðustu leiktíð) í Garðinum síðan Woodson tók við, en það hlæja allir að því í dag, því nú virðist New York skyndilega vera komið með tak á meisturunum. Já, það heitir að vera með tak á andstæðingnum þegar Knicks hefur unnið báða leiki liðanna í vetur með tuttugu stiga mun!
Vissulega hefur New York mátt muna fífil sinn fegurri undanfarin ár, það dylst engum. Sérstaklega stuðningsmönnunum - fólkinu sem okkur verður alltaf hugsað til þegar við tölum um New York.
Það eru alltaf þessar villtu vonir í Madison Square Garden, en það er langt síðan partíið náði fram á morgun hjá Spike Lee og félögum.Knicks hefur ekki unnið meira en 50 leiki í deildakeppninni síðan árið 1997, eða rétt áður en Michael Jordan hætti að leika með Chicago Bulls.
Og já, New York hefur ekki unnið nema þrjá leiki í úrslitakeppninni síðan árið 2001.
Það er hræðilegur árangur - um það er engum blöðum að fletta. Þetta hefur verið hræðilegur áratugur.
En nú virðist skyndilega vöknuð von í New York - og það alvöru von - ekki bara einhver blaðra. Það á að vísu ekki að vera fræðilegur möguleiki að liðið haldi þeim dampi sem það hefur verið á á fyrsta fjórðungnum.
Það er svo sem engin ástæða til að ætla að liðið fari eitthvað að drulla alvarlega á sig úr því sem komið er ef það sleppur við meiðsli. Það á nú einu sinni þá Amare Stoudemir og Iman Shumpert inni, hvernig sem Mike Woodson fer að því að sauma þá inn í þetta á ný.
New York spilar vörn, passar boltann og deilir honum vel innan liðsins. Svo skjóta þessir brjálæðingar þriggja stiga skotum þangað til þeim blæðir úr fingurgómunum. Þetta hljómar allt voðalega einfalt og meira að segja vandræðapésarnir kaupa þetta og koma að notum.Ja, hérna. Lítið annað hægt að segja.
Það er kannski að koma upp úr kafinu að Mike Woodson sé eftir allt þokkalegur þjálfari - þó ekki sé hann brúnaþungur.
Hvað varð um allan þennan óþolandi Iso-Joe sóknarleik sem hann var gagnrýndur svo mikið fyrir þegar hann stýrði Atlanta Hawks?
Hvað hefur orðið um bölvunina sem legið hefur á New York-liðinu og hindrað framgöngu þess ár eftir ár?
Höfum við kannski vanmetið leiðtogahæfileika pensjónistanna svona rosalega?
Við höfum bara alls ekki nógu mikið vit á körfubolta til að geta svarað öllum þessum spurningum, en þess í stað lyftum við bara skál fyrir Knicks í annað sinn á leiktíðinni.
Drekkið á meðan þetta er heitt.
Svo skoðum við hvort New York ætlar enn að vinna Austurdeildina þegar Stjörnuleikurinn verður haldinn.
Friday, November 30, 2012
Ersan Ilyasova og Hedo-heilkennið
Ersan Ilyasova hefur verið nokkuð í fréttum í haust og þó það nú væri. Komið hefur í ljós að hann hefur skitið á sig eftir næstum hvern einasta leik Bucks til þessa.
Ilyasova er fæddur á Eskişehir (Eskifirði) í Tyrklandi þann 15. maí 1987. Fyrstu fimm árin sín með Bucks var hann með að meðaltali 1,6 milljónir dollara í árslaun, sem er ansi hreint lítið miðað við það sem gengur og gerist í NBA.
Ekki fór mikið fyrir piltinum fyrstu árin, en á síðustu leiktíð byrjaði hann allt í einu að leggja fram svona leiki (stig/fráköst):
19/15, 17/17, 20/16, 31/12, 32/10, 29/25, 17/16, 7/19.
Sannarlega ekki á hverjum degi sem menn bjóða upp á 29 stig og 25 fráköst í einum leik. Aðeins Ástþór býður upp á svona tölur - eða það héldum við þar til Ilyasova frussaði upp þessari stera-línu gegn Nets á síðustu leiktíð.Og svo er hann brúkleg langskytta líka, svona eins og sykurlaus Ástþór.
Þvílík tilviljun að Ersan okkar skuli hafa verið með lausa samninga mitt í öllum þessum látum!
Og rétt eins og landi hans Hidayet "Hedo" Türkoğlu hérna um árið, virðist Ilyasova nú ætla að gera fátt annað en að drulla í buxurnar eftir að hafa skrifað undir samning sem færir honum 8 milljónir dollara á ári næstu fimm árin.
Það er milljarður króna á ári.
Sjáðu bara hvað tölfræðin hans hefur hrunið.
Vonandi nær Ilyasova að hrista þetta af sér og vonandi er hér ekki um Hedo-heilkennið að ræða. Kannski væri heppilegra að kalla það bara Tyrkjarán.
Það er svívirðilegt hvað er auðvelt að búa til ódýra orðaleiki úr raunum Ilyasova og biðjum við lesendur umsvifalaust afsökunar á því.
Svo er auðvitað alltaf sá hræðilegi möguleiki fyrir hendi að Scott Skiles þjálfari drepi hann hreinlega með ryðfríum kartöflustappara.
Maður sem var tilbúinn að fljúgast á við Shaquille O´Neal lætur það nú ekki eftir sér að mauka einn Tyrkjadjöful sem er að stela kaupinu sínu.
Það er kannski ljótt að segja svona, en þið vitið að okkur gengur aldrei annað en gott til. Þetta er aðeins ætlað sem hvetjandi skrif til handa efnilegum leikmanni sem villst hefur af leið og stefnir í glötun.
* - (Lausleg þýðing) Áttavilltur ungur maður í NBA - ENDAÞARMSINNLEGG ERSANS
Ristill: David Stern vs San Antonio
Þetta er ekki í fyrsta skipti sem Popovich þjálfari Spurs gerir þetta. Hann gerði þetta amk í tvígang á síðustu leiktíð og fékk liðið stóran skell í annað skiptið. San Antonio hefur aldrei unnið leik þegar Popovich hefur ákveðið að hvíla þá Duncan, Ginobili og Parker og það breyttist ekki í nótt, þó tapið væri afar naumt gegn meisturunum.
Twitter hefur auðvitað logað út af þessu máli í alla nótt og við verðum að segja að það kemur okkur á óvart hve margir hafa tekið upp hanskann fyrir viðbjóðinn hann David Stern í þessu máli.Það þýðir þó ekki að megi ekki finna að þessari ákvörðun Popovich, alls ekki.
Við erum af gamla skólanum og þó Popovich eigi að heita það líka, hefur það ekki aftrað honum frá því að taka þessa umdeildu ákvörðun um að hvíla fjóra stigahæstu leikmenn sína fyrir leikinn í Miami.
Það sem við eigum við þegar við segjum að við séum af gamla skólanum, er best að útskýra með því að vitna í Jerry Sloan, fyrrum þjálfara Utah Jazz. Sloan benti alltaf á það að leikmenn skulduðu fólkinu það að gefa 100% í alla leiki - alltaf - því fólkið sem borgaði stórfé inn á leikina ætti það skilið.
Þetta er auðvitað alveg rétt hjá þeim gamla og ekki var hann að hvíla sína menn Stockton og Malone með þessum hætti, þó þeir spiluðu báðir fram undir og yfir fertugt hjá honum.
Sloan þekkti það jafnvel betur en Popovich hvernig var að keyra á lykilmönnum sem komnir voru langt fram yfir sitt léttasta skeið, svo hans skoðun telur því þungt í þessu samhengi að okkar mati.NBA leikmenn eru, þegar öllu er á botninn hvolft, milljarðamæringar og eiga því að vera nógu góðir til að spila þessa leiki sem eru á töflunni eins og allir aðrir.
Annað atriði sem er auðvelt að gagnrýna við ákvörðun Pop, er að hann skuli senda leikmennina upp í flugvél og heim til Texas - í stað þess að leyfa þeim bara að sitja á bekknum og hvíla.
Að senda þá heim gerir meira í því að senda deildinni langt nef en bara það að hvíla þá (þó það sé auðvitað miklu meiri hvíld í því að fara bara heim í sófa).
En nú komum við að hinni hliðinni á peningnum - hliðinni sem snýr upp að okkar mati.
Gregg Popovich ræður hvað hann gerir við liðið sitt og það kemur engum rassgat við. Hvorki þér né David Stern
Popovich, Duncan, Parker og Ginobili hafa unnið sér það inn frá því fyrir aldamót að gera það sem þeim fokkíngs sýnist. Þeir hafa unnið sér inn virðingu til þess og höfðu í þessu tilviki unnið sér inn fyrir því að fá smá frí, því liðið hefur byrjað leiktíðina með bravúr og var að koma úr bestu útileikjarispu Í SÖGU NBA áður en kom að Miami leiknum.
Þá hefur þessi lykilmannskapur San Antonio jú unnið fjóra meistaratitla, svo ef einhver þjálfari og einhver mannskapur hefur unnið sér það inn að fá að hvíla einn bévítans leik - er það þetta San Antonio lið.
Ef það er einhver ákveðin tegund leikmanna í NBA sem er líklegri en önnur til að meiðast, er það leikmenn sem eru undir gríðarlegu álagi.Ef einhver tegund leikmanna er líklegri en þessi til að meiðast, eru það gamlir leikmenn undir miklu álagi.
Það er nóg af þessum efnivið í San Antonio og þetta veit Popovich ósköp vel. Hann er að tefla til að vinna meistaratitil, ekki til að reyna að komast í úrslitakeppnina. Hann er að spila heilt tímabil, ekki bara að reyna að vinna næsta leik til að bjarga á sér beikoninu eins og svo margir aðrir þjálfarar í NBA.
Og ekki fara að væla um að stuðningsmenn Miami hafi borgað góðan pening til að sjá stórstjörnur San Antonio. Þið vitið öll að San Antonio er almennt álitið minnst sexí körfuboltalið í deildinni af Jóni Jónssyni úti í bæ og 90% af kasjúal fans eru búnir að fá hundleið á Spurs fyrir tíu árum síðan.
Það er ekki verið að neita þeim um að sjá Kobe eða Durant. Þetta er gamla, leiðinlega San Antonio, svo þessi afsökun er ekki tekin gild. Sorry.
Það er til fordæmi um svona sektir í NBA. Valdafyllibyttan David Stern sektaði Pat Riley og Los Angeles Lakers um 25 þúsund dollara árið 1990 fyrir að hvíla lykilmenn eins og Magic Johnson og James Worthy í lokaleik deildakeppninnar.
Það er einfaldlega rangt að Stern skuli rísa upp á afturlappirnar og taka geðkast allt í einu núna þegar Spurs er búið að gera þetta oft áður. Það er því eiginlega sársaukafullt hve augljóst það er af hverju Stern er að bregðast svona við núna.Stern hefur fengið símtal frá reiðum toppi frá TNT sjónvarpsstöðinni þegar í ljós kom að Spurs ætlaði að hvíla sína bestu menn, því auðvitað snýst NBA deildin ekki um neitt annað en peninga eins og allt annað.
Sjónvarpspeningar eru dýrmætustu og mestu peningarnir í öllu NBA-samhenginu og David Stern er ekki maður sem lætur skamma sig. Hann mun því taka alla sína ógæfu út á San Antonio og setja eitt af sínum fasistafordæmum, sannið til.
Refsingin sem hann mun skella á Spurs er aukaatriði í sjálfu sér, það eru viðbrögð Stern sem fara í taugarnar á okkur. Var virkilega ekki hægt að ræða málin? Var ekki hægt að gefa Spurs aðvörun?
Stern var maðurinn sem kom NBA deildinni á koppinn, það verður ekki af honum tekið, en rétt eins og margir menn í valdastöðum, vissi hann ekki hvenær hans tími var kominn. Hann hefði átt að hætta fyrir löngu síðan.
Verst af þessu öllu er svo þessi óþolandi hræsni í yfirlýsingu hans að biðja stuðningsmenn NBA afsökunar á gjörðum San Antonio í kvöld.
Ertu að grínast, gölturinn þinn!?!
*Hvernig væri að byrja á að biðjast afsökunar á Donaghy-skaldalnum?
*Hvernig væri að biðjast afsökunar á verkbanninu í fyrra?
*Hvernig væri að minnka álagið á leikmenn í deildinni?
*Hvernig væri að biðjast afsökunar á því hvernig nokkur lið gera það viljandi og kerfisbundið að tapa leikjum á hverju einasta vori út af gölluðu kerfi í deildinni? #Tanking
*Hvernig væri að biðjast afsökunar á Charlotte Bobcats og Washington Wizards?
Líttu í eigin barm, hrokafulla, elliæra svín.
Það verður dásamlegt þegar þú hættir.
Wednesday, November 28, 2012
Flensuleikurinn dugði ekki
George Hill var óhemju svalur í lokin og skoraði tvær síðustu körfur Indiana, sitt hvoru megin við stóran þrist frá Kobe Bryant sem lyfti honum í 40 stigin þrátt fyrir flensu.
Það er tíska að spila vel með flensu, rétt eins og að binda mönnum helskó til að ganga á til Valhallar.
Kobr Bryant hefur nú skorað 40 stig eða meira 114 sinnum á ferlinum. Hitti 12 af 28 skotum í nótt, hirti 10 fráköst og tapaði 10 boltum.
Verst að Lakers hafi tapað leiknum. Þú vinnur ekki þegar þú tapar 19 boltum og klikkar á tuttugu vítum. Tuttugu! Þar af var Dwight Howard 3 af 12. Þetta á ekki að vera hægt.Það er ekkert að marka þetta Lakers-lið fyrr en Nash kemur aftur og liðið nær að spila sig saman.
Það er reyndar langt í það, en stóra spurningin er líka hvort meiðslastandið á þessum fuglum kemur yfir höfuð til með að leyfa þeim að stilla saman strengi.
Ef þú heldur að Dwight Howard hafi verið dómínerandi í leiknum með 17 stig og 8 fráköst, bíddu þá þar til þú heyrir hvað Roy Hibbert gerði. Stjörnuleikmaðurinn sá skilaði 8 stigum og 5 fráköstum á hvorki meira né minna en 18 mínútum áður en hann fékk sjöttu villuna.
Þvílíkir kálfar, gungur og lyddur.
Lakers verður því eitthvað áfram með lakari árangur en Charlotte Bobcats.
Nú er nóg komið, sögðu Körfuboltaguðirnir...
...þegar Minnesota hafði tapað fimm leikjum í röð. Hvað getur það verið annað þegar Ástþór ísar leikinn með svona skoti. Hann hefur fengið einhverja hjálp við þetta síðasta skot sitt, þó hann hafi átt megnið af 23 stigunum og 24 fráköstunum sínum sjálfur.
Tuesday, November 27, 2012
Eigum við að hafa áhyggjur af Clippers?
Þetta er niðurstaða vísindalegrar skyndikönnunar sem við gerðum í nótt eftir að Clippers drullaði enn og aftur á sig á heimavelli gegn liði sem það ætti að nota sem dyramottu.
Smelltu á myndina hér til hliðar til að sjá skeddjúlið hjá Clippers það sem af er.
Leikur Clippers og Hornets í nótt var sannarlega fjörugur og meira að segja sögulegur í leiðinni.
Caron Butler sló félagsmet Randy Foye (8) frá í fyrra með því að setja níu þrista fyrir Clippers. Það kom þó ekki í veg fyrir að New Orleans færi með nokkuð sannfærandi sigur af hólmi 105-98 í Staples Center.
Fjögur stig (1-9 í skotum) Blake Griffin hjálpuðu Clippers liðinu frekar lítið.
Þetta var fjórða tap Clippers í röð og því eru margir farnir í panikk, því það eru ekki margir dagar síðan menn voru að tala um Clippers sem alvöru áskoranda í slagnum um Vesturdeildina.
Þolinmæði og yfirvegun hefur aldrei verið sterkasta hlið þeirra sem fylgjast með NBA. Gildir þá einu hvort um er að ræða blaðamenn eða almenna aðdáendur.Við skulum samt kíkja á töfluna hjá Clippers og kryfja þetta betur. Clippers átti, fyrir það fyrsta, að byrja leiktíðina 10-0.
Aðeins aulaleg heimatöp fyrir Golden State og Cleveland komu í veg fyrir þessa fullkomnu byrjun. Ekkert annað en vanmat og leti í gangi. Þess vegna byrjaði liðið 8-2 í stað 10-0.
Þessi fjögur töp sem hafa komið í kjölfarið eru svo ofur-skiljanleg.
Þrír fyrstu leikirnir voru á útivelli. Fyrst tapar liðið fyrir Oklahoma City í framlengdum naglbít og er því næst svo óheppið að hitta á einn af þremur leikjum Nets í vetur þar sem liðið nær að spila vörn.
Strax kvödið eftir kemur svo tap fyrir Atlanta Hawks, en slík töp er auðvelt að skrifa á þreytu.
Það er mikil og stór klisja í NBA að enginn leikur sé jafn "hættulegur" og fyrsti leikurinn á heimavelli eftir nokkurra leikja keppnisferðalag.Þessi klisja sannaðist heldur betur í nótt þegar Clippers tók á móti New Orleans Hornets, sem var án sinna tveggja bestu manna og búið að tapa sjö leikjum í röð.
Clippers átti aldrei möguleika í leiknum, þó baráttan hafi verið til staðar, amk í síðari hálfleik. Það er bara erfitt að vinna lið sem skjóta 15 af 25 (60%) úr þristum.
Stuðningsmenn Clippers þurfa ekki að örvænta. Við kíktum á töfluna hjá liðinu út árið og getum með sanni sagt að hún er ekki ýkja ógnvekjandi. Liðið á ekki einn leik við mjög sterkt lið fram að áramótum. Boston, Denver, Dallas - þetta eru bestu liðin sem Clippers á við að eiga út árið - restin er drasl.
Lamar Odom hefur kannski algjörlega misst áhuga og ástríðu fyrir körfubolta, en Clippers á eftir að fara skælbrosandi inn í nýja árið í bullandi samkeppni um toppsætið í Vesturdeildinni.
Það yrði þó enn betra fyrir Clippers ef töpin yrðu fleiri en sigrarnir á næstu vikum, því þá myndi stjórnin kannski sjá að sér og reka þjálfarann. Del Negro er engan veginn nógu góður þjálfari til að stýra jafn góðum mannskap og Clippers hefur innan sinna raða.
Ræður ekkert við verkefnið.
Subscribe to:
Posts (Atom)