Wednesday, May 14, 2014
Margt hangir á spýtunni í einvígi OKC og Clippers
Auðvitað gera menn oft klaufamistök þegar svona mikið er í húfi. Barkley gerði klaufamistök eins og aðrir, líka Kenny Smith. Við gerum flest einhverja bölvaða vitleysu annað slagið, ekki síst undir pressu.
Því kemur ekki til greina að fara að setja út á þennan sportbíl sem þetta einvígi er, bara af því hann er ekki með alveg nógu góðar bremsur. Fokk itt - þá krassar hann bara - það má hafa gaman af því.Við opnum á þessu tali um mistökin af því við viljum vera heiðarleg þegar við tölum um deildina okkar fögru. Við förum ekki að sópa því undir teppið að atriðin sem réðu úrslitum hafi sum ekki verið glæsileg. Það að einblína á það, væri samt rakinn hálfvitagangur.
Við sögðum ykkur allt frá því önnur umferðin byrjaði, en einvígi Oklahoma og Clippers ætti eftir að verða það besta í umferðinni. Og við höfum staðið við það. Þetta er langskemmtilegasta einvígið, þó aulagangur hafi vissulega sett svip sinn á síðustu tvo leiki - sérstaklega leikinn í nótt.
Clippers á að vera 3-2 yfir í einvíginu á leiðinni á heimavöllinn sinn til að loka þessu, en í stað þess að klára unninn leik, ákvað liðið að skíta á völlinn nákvæmlega eins og Oklahoma gerði í fjórða leiknum í Los Angeles. Það er því Oklahoma sem er yfir 3-2 og fær nú tvo sénsa til að loka þessu.
Það var ákveðið afrek hjá Oklahoma að klúðra leiknum á sunnudagskvöldið, en Clippers toppaði það í kvöld, á hreint út sagt glórulausum lokamínútum.
Clippers var yfir meira og minna allan leikinn og var með einvígið í hendi sér eins og frá byrjun fjórða leikhlutans í fjórða leiknum. Liðið var yfir 101-88 þegar 4 mínútur og 13 sekúndur voru eftir. Hey, þú ert með Chris Paul í leikstjórnandanum - hvað getur klikkað?

Allt.
Dómararnir flautuðu allt fyrir Oklahoma á lokamínútunum, þar sem Kevin Durant (3 af 18.879 á þeim tímapunkti) fór loksins að hitta og maður leiksins Russell Westbrook kláraði dæmið. Russ var stórkostlegur í þessum leik, en ef hann fær ekki flautið á Paul þarna í restina (sjá mynd) - er ekki talað um neitt annað fram að næsta leik en þetta glórulausa skot sem hann fór upp í á þessum tímapunkti.
Það er stundum ekki nema hársbreidd á milli þess hvort Russ er engill eða djöfull og í nótt var hann engillinn, sem var íííískaldur á vítalínunni og tryggði Oklahoma sigurinn með þremur vítum. Að hugsa sér hvað er stutt á milli Óskars og Ófeigs í þessu.
Á hinum endanum hefði einhver haldið að Chris Paul næði ágætis skoti á þeim sekúndum sem eftir voru af leiknum, en hann lét Reggie Jackson lemja sig svo fast í hendina að hann missti boltann og rann á rassgatið.
Leikur.
Eins og sönnum Twitter-notendum sæmir, höfum við að sjálfssögðu leitað logandi ljósi að einhverjum til að kenna um ófarir Clippers - bæði í þessum leik og hvar sem brugðið hefur út af leið í einvíginu. Sú leit hefur ekki borið mikinn árangur, en þó má hafa eftirfarandi í huga:
Russell Westbrook fer hamförum í þessu einvígi, fólk þarf að átta sig á því. Eins og hann er villtur og stundum bara æpandi geðveikur, ætti Oklahoma ekki séns í helvíti í þessa seríu ef hugrekki hans og krafta nyti ekki við.Og Russ er ekki bara búinn að drita skotum út um allt - hann er líka búinn að hitta þokkalega. Pilturinn er að skila 30 stigum, 7 fráköstum, 8 stoðsendingum, 2 stolnum, 53% skotnýtingu, 41% í þristum og 87% í vítum. Ekki slæm tölfræði frá næstbesta manninum í liðinu, ha?
Efnisflokkar:
Chris Paul
,
Clippers
,
Deron Williams
,
Drullan upp á herðar
,
Hatorade
,
Jamal Crawford
,
Leikstjórnendur
,
Russell Westbrook
,
Thunder
,
Úrslitakeppni 2014
Meistararnir eru ekkert rosalega sannfærandi:
Vissirðu að Dwyane Wade er ekki lengur næstbesti leikmaður Miami Heat?
Við föttuðum þetta allt í einu þegar við fórum að hugsa um hvað Miami (mínus LeBron James) er að spila illa. Þegar við sjáum meistarana láta miðlungslið Nets löðrunga sig aftur og aftur. Ef ekki væri fyrir ofurmannlega frammistöðu LeBron James í gærkvöldi, væri staðan í þessu einvígi 2-2.
Næstbesti leikmaður Miami átti ekkert sérstakan leik í gær, en hann skoraði nú samt þristinn sem ísaði þetta í lokinn. Við erum auðvitað að tala um Chris Bosh.
Bosh þessi hefur ekki alltaf verið hátt skrifaður hjá okkur og verður það ekki héðan af, en hann er óhemju mikilvægur Miami á báðum endum vallarins og þegar við förum að pæla í því, er langt síðan hann tók stöðu Dwyane Wade sem næstbesti leikmaður liðsins.
Manstu þegar Dwyane Wade var einn af fimm bestu leikmönnum NBA deildarinnar í nokkur ár? Við munum eftir því. Og það er ekki síst þegar við rifjum það upp, sem við áttum okkur á því hvað Wade hefur gjörsamlega hrunið sem leikmaður. Ekki kannski eins og Kevin Garnett, en ekki langt frá því.
Og í framhaldi af þessari pælingu - er eðlilegt að fólk hugsi: Er þetta Miami-lið þá einhver meistarakandídat? Með svona spilamennsku? Og það sem meira er - verður þetta lið þá einhver meistarakandídat á næsta ári og árunum eftir það?
Wade er alltaf lengur og lengur á felgunni og þeir varamenn og aukaleikarar sem Spoelstra treystir á í þessu liði eru bara að verða of gamlir.
Okkur grunar að Pat Riley sé með eitthvað í pípunum á næstu 18 mánuðum.
Og vitið þið hvað? Það verður að vera eitthvað mjög gott.
Efnisflokkar:
Dwyane Wade
,
Heat
,
LeBron James
,
Pat Riley
,
Úrslitakeppni 2014
Tuesday, May 13, 2014
Monday, May 12, 2014
Shaq stríðir Barkley
Efnisflokkar:
Charles Barkley
,
Inside the NBA
,
Shaquille O´Neal
,
Skrítlur
,
TNT
Frúin hlær á betri Beal
Þetta er mamma hans Bradley Beal hjá Washington Wizards. Og nei, við vorum ekkert að fótósjoppa hana eða nafnið hennar. Hún heitir í raun og veru Besta Beal. Það er ekki hægt að skálda svona! Hún er dálítið stórskorin blessunin, en líklega með Besta nafnið í bransanum. Þetta er efniviður í orðaleikjabrandara héðan og til ársins 2068. Svona eins og að pæla í því hvort gárungarnir kalli fjölskylduna Besta Flokkinn...
Efnisflokkar:
Bradley Beal
,
Dreptu okkur ekki
,
Eðlilegt
,
Mannanafnanefnd
,
Wizards
Saturday, May 10, 2014
Við leyfum þetta
Þið munið að við gáfum grænt ljós á það fyrir nokkru síðan að Kevin Durant yrði kjörinn Mest Verðmætasti Pilturinn í NBA árið 2014. Þeir Durant og LeBron James skiptust á að fara hamförum með liðum sínum í vetur og hafa hvor um sig verið að bjóða upp á tilþrif og tölur sem hafa ekki verið að sjást mikið í sögu deildarinnar.
Þess vegna erum við alltaf að hvetja ykkur til að njóta þess að horfa á þessa snillinga spila. Þið eigið eftir að horfa til baka seinna og hugsa með ykkur hvað þið voruð heppin að fá að fylgjast með þessum einstöku snillingum leika listir sínar dag eftir dag. Og þið verðið líka að segja öllum hinum frá því. Það er ennþá fullt af villuráfandi sauðum þarna úti sem vita ekki eða skilja ekki að körfubolti er það skemmtilegasta og dýrmætasta í lífi allra manna og kvenna á þessari jörð ásamt kærleikanum, frelsinu, góðri heilsu, fjölskyldu og vinum.
En nú erum við aðeins komin út fyrir efnið. Við ætluðum nefnilega að senda hérna út yfirlýsingu. Ekki um það hvort Kevin Durant var verðugur viðtakandi áðurnefndra verðlauna, heldur þurfum við að leggja dóm á ræðuna sem pilturinn hélt við tækifærið.Við erum nefnilega búin að sjá og heyra Kevin Durant fá mikið af skít og leiðindum út af öllum tárunum og tilfinningaseminni sem hann leyfði að skína í gegn.
Því verðum við að smella okkur í netlögreglugallann og dæma í málinu - þó það nú væri. Svona málefni koma ritstjórn NBA Ísland við bæði á beinan og óbeinan hátt.
Og hver er nú úrskurður NBA Ísland um athöfnina?
Við leyfum þetta.
Mörg ykkar spretta þá úr sætunum, hrópa að okkur fúkyrðum og kasta jafnvel skemmdu grænmeti í áttina til okkar. Hvernig dettur fólki í hug að taka jákvætt í svona tilfinningaklám og væl?Jú, jú, þetta var dálítið yfirgengilegt á tára- og tilfinningasviðinu, því verður ekki neitað. Þetta er tilfinningaþrungin stund og allt það, en... rólegur, K.D.
En af hverju erum við þá að leyfa þetta, spyrðu.
Af því Durant er svo góður strákur. Þess vegna leyfum við þetta. Ef þú gleymir því nú aðeins hvað runnu mörg tár þarna við athöfnina og beinir eyrum þínum að því hvað pilturinn var að segja, horfir þetta allt öðru vísi við.
Í stað þess að berja sér á brjóst og tala um sig í þriðju persónu eins og einhver hefði gert, tók Durant sig til og hélt, að því er virtist, fleiri klukkutíma langa blaðlausa ræðu þar sem hann hrósaði og þakkaði einhverjum 1700 manns.
Og þarna er þessum dreng rétt lýst.
Hann er alltaf að hugsa um liðsfélaga sína og er svo óeigingjarn að það er eiginlega óskiljanlegt að maðurinn geti skorað meira en 30 stig að meðaltali í leik.
Mörgum ykkar finnst þetta sjálfsagt vera innantómt væl og það er hið besta mál. Við kaupum þetta hjá honum og við erum líka að horfa á heildarmyndina.
Kevin Durant er nefnilega annar stærsti og mikilvægasti sendiherra NBA deildarinnar og deildin þarf nauðsynlega á svona piltum að halda. Durant er vel upp alinn sómapiltur og fagmaður fram í fingurgóma og okkur þykir svo vænt um að enn sé hægt að finna svona menn á þessum síðustu og verstu.
Þú mátt skammast eins og þú vilt yfir Kevin Durant, við kunnum að meta hann þó athöfnin hans hafi verið dálítið klámfengin. Hann er vel að þessu kominn strákurinn og er sannarlega búinn að gera mömmu stolta. Svo er í fínu lagi að menn séu að grenja við svona tækifæri meðan þeir standa sig inni á vellinum.
Og það er Durant sannarlega að gera um þessar mundir.
Efnisflokkar:
Kevin Durant
,
MVP
Meistaraheppni Miami er með ólíkindum
Það eina sem skyggir á þessa stórkostlegu úrslitakeppni er sú sorglega staðreynd að Austurdeildin er í besta falli arfaslök um þessar mundir. Vesturdeildin er búin að vera áberandi sterkari en systir hennar í um það bil aldarfjórðung, en aldrei hefur munurinn verið meiri en einmitt núna.
Vissulega hefur Austurdeildin átt flott lið og verðuga meistara á síðustu 25 árum. Þar erum við m.a. með tvö stykki af ógnarsterkum liðum bæði frá Detroit (´89-´90 + ´04) og Miami (´06 + ´12-´13), þrælsterkt lið frá Boston (´08) og svo auðvitað sögulegu ófreskjuna frá Chicago með alla sína titla á tíunda áratugnum (´91-´93 + ´96-´98).
Athugið að við erum ekki að halda því fram að ofangreind lið séu eitthvað annað en frábær. Það sem við erum að tala um er að Vesturdeildin á miklu fleiri góð lið en Austurdeildin og hefur átt lengi.
Við hugguðum okkur við það í vetur að þó megnið af liðunum í Austurdeildinni væru megarusl, ættum við þó að minnsta kosti í vændum jafnt og skemmtilegt einvígi í úrslitarimmunni austan megin eins og í fyrra þegar Miami og Indiana fóru alla leið í oddaleik. Þessar vonir eru nú að verða orðnar að engu eftir að Indiana byrjaði að drulla svona heiftarlega á sig.
Það getur vel verið að Indiana rétti eitthvað aðeins úr kútnum og það getur meira að segja vel verið að það nái að gera Miami lífið leitt ef við fáum sama úrslitaeinvígið í austrinu og við fengum í fyrra. Það breytir því þó ekki að Miami er að fara að setja neyðarlegt met núna. Miami er að slá metið sem við skulum kalla því óþjála nafni "auðveldasta leið síðari tíma í lokaúrslit."
Krambúleraðir keppinautar
Sko, það er ekki ætlunin hjá okkur að gera lítið úr afrekum Miami frá því að Sólstrandargæjarnir leiddu saman hesta sína á Suðurströnd. En það er með algjörum ólíkindum hvað heilladísirnar eru góðar við þetta lið. Við höfum skrifað um það áður bæði hvað Miami hefur verið heppið með meiðsli og hvað andstæðingar liðsins hafa á sama tíma verið lygilega óheppnir með meiðsli.
Sjáið bara hvaða lið hafa gert sig líkleg til að ógna veldi Miami í Austurdeildinni síðan LeBron James og Chris Bosh gengu í raðir liðsins. Þar var Chicago náttúrulega efst á blaði. Chicago veitti Miami verðuga samkeppni áður en Derrick Rose nánast hætti að spila körfubolta vegna meiðsla. Boston missti Rajon Rondo í meiðsli. Atlanta missti Al Horford í meiðsli. Orlando-liðið var leyst upp. New York hótaði því að verða gott en skeit svo gjörsamlega á sig í fyrravor og hefur ekki náð sér síðan.
Einhver hefði haldið að þarna væru ófarir keppinauta Miami á enda, en það var nú öðru nær.
Strax í fyrsta leik hjá Miami í úrslitakeppninni núna í vor, gufa þær litlu vonir sem Charlotte hafði um að veita meisturunum keppni út í loftið eftir að besti sóknarmaður liðsins (Al Jefferson) meiðist. Það var ekkert annað í stöðunni fyrir Miami en að sópa þessu og það var klárað.Þá er það næsta umferð. Þar er mótherjinn jú Brooklyn Nets, lið sem að sjálfssögðu er án eina leikmannsins sem gæti gert Miami lífið leitt - miðherjans Brook Lopez.
Það er fullt af flottum nöfnum í liði Brooklyn, en einu leikmennirnir hjá Nets sem tæknilega ættu möguleika á að vinna Miami eru bara orðnir svo gamlir að David Attenborough er að spá í að gera þátt um þá.
Efnisflokkar:
Austurdeildin
,
Fret úr fortíðinni
,
Heat
,
Lakers
,
Lifðu í lukku en ekki í krukku
,
NBA 101
,
Sigurgöngur
,
Sögubækur
,
Titlar
,
West is best
Friday, May 9, 2014
Það var árið 2005
Fyrir sléttum níu árum síðan voru San Antonio og Seattle að berjast í annari umferð úrslitakeppninnar. Seattle var eitt af Spútnikliðum vetrarins undir stjórn Nate McMillan og rúllaði Sacramento nokkuð óvænt upp 4-1 í fyrstu umferð úrslitakeppninnar.
Liðið veitti San Antonio svo harða keppni í annari umferðinni þar sem það jafnaði 2-2 heima eftir að hafa lent undir 2-0, en San Antonio kláraði síðustu tvo leikina og vann svo titilinn nokkrum vikum síðar með því að leggja Detroit í lokaúrslitum.
Þetta Spútnik sem var í Seattle-liðinu á þessum tíma náði þó ekki lengra en þetta. Nate McMillan var látinn fara og stórskotalið þeirra Rashard Lewis (Orlando) og Ray Allen (Boston) leituðu loks annað. Eins og þið sjáið á myndinni hérna fyrir neðan var Manu Ginobili með hár á þessum tíma. Þarna er hann í baráttu við stórmeistarann Nick Collison hjá Seattle, sem tæknilega er enn hjá sama félagi, þó Oklahoma komi Seattle auðvitað ekkert við.
Efnisflokkar:
Fret úr fortíðinni
,
Gamla myndin
,
Manu Ginobili
,
Nick Collison
,
Sonics
,
Spurs
Velgengni Tim Duncan og Spurs er alls ekki eðlileg
Það er kannski orðið dálítið þreytt umræðuefni í úrslitakeppninni, en tölfræðin sem sýnir reynslu Tim Duncan og félaga hans í San Antonio liðinu í úrslitakeppni er hreint út sagt ótrúleg.
Það er með ólíkindum að hugsa til þess að Tim Duncan sé búinn að spila jafnmarga leiki (220) í úrslitakeppni og Portland Trailblazers hefur spilað í sögu félagsins. Og Portland er enginn skítaklúbbur. Portland vann titilinn með Jack heitnum Ramsey og Bill Walton árið 1977 og lék til að mynda tvívegis til úrslita um titilinn í kring um árið 1990.
Duncan er einn síns liðs búinn að spila fleiri leiki í úrslitakeppni en næstum því helmingurinn af liðunum í NBA deildinni hafa náð að afreka í sögu sinni.* Þetta er á engan hátt eðlilegt.
Þetta undirstrikar annars vegar ótrúlega velgengni San Antonio Spurs á síðustu tæpum tveimur áratugum og hinsvegar hvað Tim Duncan hefur verið þungamiðjan í allri þessari velgengni ásamt Gregg Popovich þjálfara og síðar þeim Tony Parker og Manu Ginobili.
Hægt og örugglega, stundum litlaust og leiðinlega en fagmannlega, þokast Tim Duncan upp alla afrekalista sem til eru varðandi velgengni í úrslitakeppni.
Rétt eins og fólk í dag hugsar sér hvernig í ósköpunum Wilt Chamberlain fór að því að skora 100 stig í einum leik, á fólk örugglega eftir að hrista höfuðið yfir því eftir 30 ár þegar það lítur yfir söguna og pælir í því hvernig í fjandanum þetta San Antonio lið og Tim Duncan fóru að því að vera á toppnum í hartnær tvo áratugi.
Við vitum ekki með ykkur, en við erum að sjúga í okkur hverja mínútu sem við sjáum með þessu Spurs liði núna. Ekki aðeins er það sögulegt, heldur er það bara svo drullu skemmtilegt. Eftir að hafa lent í bölvuðu basli með vel þjálfað og reynslumikið lið Dallas í fyrstu umferð úrslitakeppninnar, fer San Antonio vélin nú hamförum gegn aumingja strákunum í Portland.
Efnisflokkar:
Blazers
,
Sögubækur
,
Spurs
,
Tim Duncan
,
Úrslitakeppni 2014
,
Velgengni
Wednesday, May 7, 2014
Sportþátturinn á Suðurland FM
Baldur Beck fór í smá spjall hjá Gesti frá Hæli í Sportþættinum á Suðurland fm í kvöld. Umræðuefnið var merkilegt nokk úrslitakeppni NBA deildarinnar og nýkjörinn Verðmætasti leikmaður ársins í NBA - Kevin Durant.
Efnisflokkar:
Hlaðvarpið
,
NBA Ísland
,
Útvarp
Saturday, May 3, 2014
Goðsögn er fædd
Efnisflokkar:
Á flautunni
,
Á ögurstundu
,
Blazers
,
Damian Lillard
,
Goðsagnir
,
Úrslitakeppni 2014
Friday, May 2, 2014
Oklahoma gaf skít í sumarfríið (í bili amk)
Oklahoma var með bakið upp við vegg, það vantaði ekki. En eftir allar þessar framlengingar reiknaði enginn með svona leik. Að Oklahoma færi til Memphis og einfaldlega drullaði yfir heimamenn.
Auðvitað fór Memphis inn í þennan leik, vitandi það að það yrði að loka þessu í nótt. Auðvitað vissu heimamenn að þeir þyrftu að vinna oddaleik á útivelli ef þeir töpuðu þessu. Og þeir vita að útisigrar í oddaleikjum eru álíka algengir og grænir hrafnar.
Jæja, eins og þið sáuð, var bara annað liðið tilbúið í þennan leik. Það var Oklahoma. Og Oklahoma spilaði ekki sekúndu í örvæntingu, per se. Liðið kom bara inn í þennan leik eins og það kom inn í alla leiki í vetur - vitandi að það væri betra - og lokaði.
Þetta er dásamlega fljótt að breytast og nú falla öll vötn til Dýrafjarðar, ef hann er að finna í Oklahoma.
Spennustigið hjá Oklahoma-strákunum verður örugglega hærra á laugardaginn, en nú reikna auðvitað allir með því að þeir klári þetta á heimavelli. Ekki síst í ljósi þess að aumingja Mike Conley virðist hafa tognað á læri og þið vitið að hann er ekkert að fara að jafna sig af því á tveimur dögum. Þetta verður hrikalega erfitt hjá Memphis.
En það er einmitt þannig sem þeir vilja hafa það, þessi ólíkindatól öll sömul. Þeim líður best í harkinu og drullunni og það verður nóg af því á laugardaginn.
Það sem stendur upp úr eftir leik sex er samt karakterinn í Durant, Russ og Oklahomaliðinu öllu. Þú þarft að vera með pung til að koma svona á sterkan útivöll og valta yfir mótherjann. Svona er sjaldgæft. Það sem þeir KD og Russ voru flottir í þessum leik. Rosalegir!
Hvernig ætli hægðaheilanum á bak við forsíðuna hérna fyrir ofan líði núna?
Bókað að hann segist núna aðeins hafa gert þetta til að mótívera Kevin Durant. Það er helvítis lygi, en þessum asna skjátlaðist ef hann hélt að þetta bull ætti eftir að hjálpa Durant eitthvað. Þetta olli í besta falli pirringi í herbúðum liðsins.
Hugsið ykkur líka hvað þessi hérna til hliðar var hrottalega nálægt því að missa vinnuna í kvöld. Reyndar var sigur Oklahoma aldrei í hættu, en ef liðið hefði ekki hitt á svona frammistöðu og tapað, væri hann að skoða smáauglýsingarnar núna.
Oklahoma er meistarakandidat og á ekki að falla út í fyrstu umferð - alveg sama hver mótherjinn er. Við erum reyndar búin að segja ykkur það oft áður að þó Scott Brooks karlinn sé vissulega búinn að gera fína hluti með Oklahoma, erum við óskaplega hrædd um að sóknarleikurinn sem hann er að bjóða upp á muni aldrei nægja til að vinna meistaratitil.
Það er svakalega þægilegt að vera með menn eins og KD og Russ í liðinu sínu, en sóknarleikur þess er stundum bara vandræðalegur. Við höfum á tilfinningunni að ef að maður eins og Rick Carlisle væri að þjálfa Oklahoma, væru fá lið sem stæðu því snúning. Kannski væri það bara langbesta liðið í deildinni. Það kemur ekki í ljós fyrr en nýr þjálfari tekur við. Það er alls ekki sama hver tekur við af Brooks þegar hann kveður.
Ykkur að segja, erum við óhemju fegin að Oklahoma féll ekki úr leik. Þið vitið að við elskum Russ, en þess utan er náttúrulega ekki hægt að meistarakandítadar séu hrynjandi úr keppni í fyrstu umferð eins og leit út fyrir á kafla hjá bæði t.d. Oklahoma og San Antonio.
Að okkar mati eru bara þrjú lið í deildinni sem hafa fulla burði til að vinna meistaratitil. Miami er búið að vinna þetta tvisvar í röð, San Antonio kann þetta allt saman og var í úrslitum í fyrra og Oklahoma var í úrslitum árið þar á undan og er ekki mikið lakara núna (Harden).
Svo er að sjá hvað liðin á jaðrinum eins og LA Clippers segja við því. Við sjáum bara ekki alveg að þessi lið eins og Portland, Houston, Golden State, Memphis og Indiana séu nægilega sterk til að komast lengra en í undanúrslit.
Ef annað kemur í ljós, er það ekkert nema jákvætt. Við erum ekkert að loka á það.
Það er bara þannig, eins og þið vitið, að við viljum alltaf að bestu liðin í NBA haldi sínu. Okkur fannst gott að Miami næði að verja titilinn í fyrra af því að þá sannaði það að titillinn á verkbannsárinu var engin tilviljun.
Það er alltaf dálítið erfitt að díla við nýja meistara, sérstaklega ef þeir eru bara svona "ein dolla og búið" eins og Dallas 2011.
Þetta Dallas-lið var vissulega mjög sterkt, en það vann titilinn að hluta til með því að detta í stuð á réttum tíma. Nokkuð sem kemur sjaldan fyrir. Meistararnir vinna venjulega titilinn af því þeir eru einfaldlega með besta liðið.
Efnisflokkar:
Á ögurstundu
,
Kevin Durant
,
Russell Westbrook
,
Thunder
,
Úrslitakeppni 2014
Það er erfitt að vera Roy Hibbert núna
Efnisflokkar:
Drullan upp á herðar
,
Roy Hibbert
,
Sjoppan
,
Úrslitakeppni 2014
Thursday, May 1, 2014
Er Oklahoma City á leið í sumarfrí?
Það er óhemju mikið í húfi í kvöld þegar Oklahoma sækir Memphis heim í sjötta leik liðanna í fyrstu umferð úrslitakeppni Vesturdeildarinnar í NBA.
Oklahoma City er eitt af liðunum sem flestir reiknuðu með að ættu eftir að berjast um meistaratitilinn í vor, nú þegar lykilmenn liðsins (Russell Westbrook) hafa náð heilsu á ný. Því miður fyrir þetta skemmtilega lið, byrjar sóknin að titlinum á einvígi við Memphis Grizzlies.
Það er þreytt tugga að tala um að lið sem hafnar t.d. í 7. eða 8. sæti og fer í úrslitakeppni sé "miklu sterkara en sætið segir til um." En þó það hljómi klisjulega, er Memphis slíkt lið.Memphis myndi til dæmis valta yfir öll lið í úrslitakeppni Austurdeildarinnar nema Miami.
Já, valta yfir þau.
Eina ástæðan fyrir því að Memphis hafnaði í 7. sæti Vesturdeildarinnar en ekki ofar, er að miðherjinn Marc Gasol missti af mörgum leikjum í vetur vegna meiðsla. Hann er hjartað í þessu liði og ef hans hefði notið við, hefði Memphis haft alla burði til að ná heimavallarrétti í fyrstu umferð.
Memphis er líka lið sem er byggt til að spila í úrslitakeppni. Þetta er sterkt varnarlið sem spilar hægt og klípur, krafsar og klórar sig til sigurs. Spurðu bara strákana í Oklahoma.
Ekki halda að við séum að halda þessa lofræðu um Memphis til þess að taka upp hanskann fyrir Oklahoma. Það er ekki ætlunin. Oklahoma er skipað mannskap sem á að geta séð um sig sjálfur þó flestir lykilmenn liðsins séu enn tiltölulega ungir. Oklahoma á ekki að vera undir 3-2 í fyrstu umferð, á leiðinni á einn brjálaðasta heimavöll deildarinnar með það fyrir augum að enda í sumarfríi ef það tapar.
Það er löngu búið að ákveða að Kevin Durant verði útnefndur Verðmætasti leikmaður NBA deildarinnar í vetur. Hann mun taka við þeim verðlaunum á næstu dögum, það er 99,9% öruggt.Ef hann tapar í kvöld, verður hann einn af örfáum MVP-höfum í sögunni sem þurfa að upplifa þá skömm að tapa í fyrstu umferð úrslitakeppninnar.
Aumingja Dirk Nowitzki lenti í þessu síðast þegar hann árið 2007 mátti sætta sig við að falla úr leik í fyrstu umferð með Dallas gegn Golden State og þurfa svo að taka við styttunni nokkrum dögum síðar.
Það er erfitt að hugsa sér öllu neyðarlegri blaðamannafund og við gleymum aldrei svipnum á aumingja Dirk Nowitzki forðum. Úff.
Já, það er SVONA mikið undir í nótt þegar Oklahoma mætir til Memphis. Sögubækurnar eru opnar og fjölmiðlar bíða spenntir eftir að hengja upp fyrirsagnirnar.
Ástæðurnar fyrir því að Oklahoma er komið ofan í þessa drulluholu eru
Það eina sem við skulum gera er að horfa á þennan leik á miðnætti í kvöld (Stöð 2 Sport) og alla þá leiki sem við náum að sjá, því þessi fyrsta umferð úrslitakeppni NBA boltans í ár hefur verið einhver sú besta í sögunni. Það eru engar ýkjur.
Góða skemmtun.
Efnisflokkar:
Grizzlies
,
Kevin Durant
,
Marc Gasol
,
Öskubuskuævintýri
,
Russell Westbrook
,
Sögubækur
,
Thunder
,
Tony Allen
,
Úrslitakeppni 2014
Subscribe to:
Posts (Atom)





























