NBA Ísland

Sunday, October 10, 2010

Saturday, October 9, 2010

Undirbúningstímabilið er nú í fullum gangi og NBA TV er með beinar útsendingar flest kvöld. NBA TV er á rás 48 á Digital Ísland ef þú vissir það ekki.

Í nótt fáum við að sjá Phoenix Suns taka á móti Dallas klukkan 1:30. Phoenix-liðið kemur nokkuð breytt til leiks. Missti t.d. Amare Stoudemire og Leandro Barbosa en er komið með Hedo Turkoglu í staðinn. Dallas bætti heldur við sig og er það lið sem er gjarnan tippað á að muni taka annað sætið í Vesturdeildinni.

Annað kvöld verður svo NBA TV með beina útsendingu frá leik Houston og Cleveland klukkan 23:00 og á mánudagskvöldið klukkan 0:30 eigast við Dallas og Cleveland.

Það verða beinar útsendingar á hverju kvöldi í næstu viku. Við hendum leikjaplaninu inn í dagskrána hérna á síðunni fljótlega. Látum ykkur vita þegar það er klárt.

Blake Griffin spilar körfubolta

Blake Griffin var valinn númer eitt í nýliðavalinu í fyrra en þurfti að sitja meiddur á hliðarlínunni allan veturinn.

Hann byrjar undirbúningstímabilið alveg eins og maður sem hefur þurft að halda í sér í eitt ár eins og tölfræðin hans ber með sér.

Það veitir ekki af að fá nýtt blóð í stórustrákaflóruna í NBA. Þess vegna fögnum við því að hann skuli vera að finna sig og ná heilsu á ný.

Liggjum á bæn og vonum að hann haldist heill í vetur.

Hver veit nema Clippers-liðið verði bara sómasamlegt einu sinni.

Mannskapurinn er til staðar, það vantar ekki. En Clippers-bölvunin virðist samt alltaf sitja eins og skuggi yfir liðinu.

Jet er ekki dauður úr öllum æðum

Heimabrugg: Geitungurinn

Duttum í Grafarvoginn í gær og sáum Fjölnismenn taka á móti Snæfelli. Mjög hressandi leikur, frábær skemmtun. Snæfell hafði þetta í restina en það sem upp úr stóð var að skrumið sem dunið hefur á okkur um ungu mennina í Fjölni á fullan rétt á sér.

Það er frábært að horfa á þessa stráka, sérstaklega Geitunginn, Ægi Þór Steinarsson. Hann er gulur, hann er snöggur og hann stingur.

Guttinn bauð upp á 25/11/4/4, flotta hittni og boltameðferð að hætti CP3. Þetta er strákur sem þú ættir að kíkja á við fyrsta tækifæri. Óvíst að hann verði mikið lengur á klakanum.

Getum ekki beðið eftir að sjá hann og hans menn sækja Stjörnuna heim á sunnudaginn. Þar eru á ferðinni tvö hörkulið sem töpuðu með súrum hætti í fyrstu umferðinni og það verður gaman að sjá Ægi og Shouse kljást í Ásgarði. Mælum eindregið með því.

Friday, October 8, 2010

Heimabrugg

Karfan á klakanum fór af stað í gær. Við duttum að sjálfssögðu í vesturbæinn og sáum KR-Stjarnan. Hörkuspennandi leikur sem lofar góðu fyrir veturinn. Okkar maður Ermolinskij þrennaði þetta upp eins og hann er vanur, en drollaði við það alla leið í framlengingu að þessu sinni.

Leikurinn til að sjá í kvöld er klárlega í Grafarvogi þar sem drengirnir í Fjölni taka á móti Íslandsmeisturum Snæfells. Við erum mikið að spá í að kíkja á þennan leik af því okkur hefur verið sagt að ungu byssurnar í Fjölni séu að gera gott mót.

Ef þú ert á suðurnesjunum er auðvitað ástæðulaust að fara í bæinn. Þá rúllarðu bara í Njarðvík og horfir á Njarðvík-Grindavík. Þeir gulu að frumsýna einhvern Evrópukana sem heitir Pétrúnella

Thursday, October 7, 2010

Name-Dropping

Hlassið

Leikmenn New York Knicks komast ekki upp með neitt múður í æfingabúðunum hjá Mike D´Antoni. Þeir eru með raftæki á stærð við gsm-síma saumað inn í bakið á vestunum sínum sem kallað er "The Load"

Tækið sendir skilaboð í fartölvu sem situr í kjöltunni á þrekþjálfaranum og gefur honum nákvæmar upplýsingar um hreyfingar leikmannsins. Hvað hann hleypur langt, hve hratt og meira að segja hvað hann tekur mikið kontakt.

Þetta er dálítið áhugaverð aðferðafræði hjá Knicks. Væri gaman að fá að lesa á tækið hjá Eddy Curry.

Les það hvað hann fór oft í bakaríið þann daginn og hve mikið og hve hratt hann fitnaði? Og ætli Curry mæti yfir höfuð á einhverjar æfingar? Og hvernig getur atvinnumaður í íþróttum verið með hærri fituprósentu en Egill Helgason?

Nítjánhundruð níutíu og fjögur

New York Knicks hefur ekki unnið Atlantshafsriðilinn síðan árið 1994 og vinnur hann trúlega ekki næsta vor.

Amare Stoudemire á tæplega eftir að breyta því, þó hann eigi vonandi eftir að gleðja sárþjáða stuðningsmenn félagsins með tilþrifum sínum í vetur.

Árið 1994 voru menn eins og Patrick Ewing, Charles Oakley, John Starks og Doc Rivers í liði Knicks sem náði alla leið í úrslitin þar sem það tapaði fyrir Houston í frægum oddaleik.

Þetta ár var Amare Stoudemire tólf ára, nýbúinn að missa föður sinn úr hjartaáfalli og sá á eftir móður sinni í fangelsi hvað eftir annað.

Hann lýsti því yfir í viðtali síðar að Guð og Tupac Shakur hefðu haldið honum gangandi á þessum erfiðu tímum.

Skrítið sumar í Chicago

Flestir reiknuðu með að Chicago yrði stór spilari á leikmannamarkaðnum í sumar. Það gekk ekki eftir. Ekki eins og stuðningsmennirnir voru að vona. Þeir voru auðvitað að hugsa um heimamanninn Dwyane Wade, sem ákvað að vera áfram í hitanum í Miami.

Forráðamenn Chicago sátu þó ekki á höndunum á sér í sumar, heldur fóru út í búð og keyptu... Utah Jazz.

Carlos Boozer, Ronnie Brewer (óbeint) og Kyle Korver komu allir frá Utah. Kurt Thomas og Keith Bogans fylgdu í kjölfarið og þjálfarinn verður Tom Thibodeau, fyrrum varnarþjálfari Boston Celtics.

Það verður áhugavert að sjá hvernig Bulls-liðið kemur út í vetur. Þjálfarinn er óskrifað blað þegar kemur að því að vera aðal. Hann á eftir að hressa mjög upp á varnarleik Bulls en það er spurning hvað gerist á hinum enda vallarins.

Chicago hefur sárlega vantað ógnun inni í teig undanfarin ár og sumir segja að ef hún hefði verið til staðar hefði liðið verið við toppinn í Austurdeildinni. Nú er búið að lappa aðeins upp á það með Carlos Boozer en að okkar mati er enn stórt gat í þessu liði.

Boozer er kominn með sinn 20/10 leik og það er vel, en hvar eru skytturnar í liðinu? Mennirnir sem geta búið til sitt eigið skot og hitt reglulega fyrir utan? Þú veist, menn eins og Ben Gordon og John Salmons - sem eru farnir.

Chicago á eftir að verða gott lið en ekki nógu gott. Það vantar skyttur. Rose er ekki nógu góður skotmaður, Noah er lítill sóknarmaður, Boozer þarf að láta mata sig, Brewer hittir ekki hafið þó hann standi í árabát og Korver fær fjögur stig á sig fyrir hver þrjú sem hann setur í sókninni.

Við vorum búin að minnast á Boozer og meiðslin hans. Grátlegt. Boozer spilaði nákvæmlega 2 af hverjum 3 leikjum fyrir Utah Jazz á árum sínum þar og hann stefnir á að halda þeirri hefð áfram hjá Bulls. Hann á eftir að missa úr fyrstu vikurnar á tímabilinu og fyrir lið sem treystir á hann og er í bullandi baráttu í Austurdeildinni gætu þetta orðið dýrir leikir sem hann er að fara að missa af.

Þetta er það sem þú ert að kaupa þegar þú færð Boozer. Hann skilar oftast góðu verki, þegar hann spilar. Hann talar eins og stjórnmálamaður og er gjörsamlega skelfilegur varnarmaður. Það hentar honum samt betur að spila með Bulls en Jazz í vörninni, þar sem hann er með Noah til að hreinsa upp eftir sig skítinn.

Ástæða þess að við erum að röfla þetta um Chicago er að við erum lúmskt hrifin af þessu liði og sáum Bulls sem lið þyrfti ekki að bæta miklu við sig til að verða alvöru lið. Félagið hamaðist mikið í sumar en niðurstaðan er dálítil vonbrigði. Það getur vel verið að Chicago eigi eftir að bæta sig nokkuð, en þetta lið er mjög augljóslega einum sterkum skotbakverði frá því að verða alvöru.

Það sem forráðamenn Chicago þrá þó mjög líklega mest af öllu er góð heilsa lykilmanna. Meiðsli fóru illa með Bulls í fyrra og við skulum vona fyrir þeirra hönd að Boozer sé ekki að leggja línurnar fyrir komandi vetur í þeim efnum.

Wednesday, October 6, 2010

Stutt generalprufa hjá Heat

Stjörnulið Miami Heat var með generalprufu í gær. Burstaði Detroit í fyrsta æfingaleik sínum. Frumraun LeBron James, Chris Bosh og allra hinna með Heat vakti svo mikla athygli að leikurinn var sýndur á NBA TV og sá sjálfur Marv Albert um lýsingu.

Eins og þeir vita sem fylgdust með var þetta ekki fullkomin frumsýning, því Dwyane Wade tognaði á læri og missir þar af leiðandi af næstu viku eða tveimur. James var flottur en það var lítið hægt að lesa út úr þessu með Wade utan vallar og andstæðingurinn Detroit Pistons.

Margir pistlahöfundar ytra eru þó strax byrjaðir að skrifa "þetta verður liðið hans LeBron James" greinar. Gott fyrir þá.

Það er ekki laust við að sé spenna í loftinu hérna á ritstjórninni nú þegar undirbúningstímabilið er hafið. Lífið verður aðeins skemmtilegra fyrir vikið. Ok, mikið skemmtilegra. Gleðilega hátíð.

Sunday, October 3, 2010

Carlos Boozer er með meiddi

Svo virðist sem áhangendur Chicago Bulls fái ekki að sjá nýja kraftframherjann sinn fyrr en í desember. Carlos Boozer datt heima hjá sér og handarbrotnaði. Sagt er að meiðsli sem þessi taki um átta vikur að gróa.

Ef við miðum við hvað Boozer er lengi að ná sér t.d. af tognun aftan í læri, myndum við ekkert gera ráð fyrir kappanum á þessu ári ef við værum stuðningsmenn Bulls.

Það er alltaf dálítið áhugavert þegar íþróttamenn meiðast illa á heimilum sínum. Sérstaklega ef það eru grunsamleg meiðsli. Lestu bara greininguna hér fyrir neðan.

What is a fifth metacarpal fracture?

The metacarpals are the long bones in the hand. The fifth metacarpal is the bone in the hand that attaches to the pinky finger. A fracture is a break in the bone.

How does it occur?

A fifth metacarpal fracture usually occurs from hitting a hard object with your fist. That is why it is also called a boxer's fracture. It can also occur from falling onto your hand.

Friday, September 3, 2010

Fjör á Fjölbraut

Tuesday, August 24, 2010

M.C.F.C.

Þá koma jólin

Friday, August 20, 2010

Serbar stóluðu á Krstic

Við höfum átt það til að stríða serbneska miðherjanum Nenad Krstic hjá Oklahoma fyrir að vera kisa. Það fauk aðeins í hann, eins og raunar alla leikmenn Serba og Grikkja í landsleik í dag. Okkur þótti þetta dálítið fyndin atburðarás, eins og kvikindin sem við erum. Hérna er smá myndband.