Saturday, May 8, 2010
Hvar varst þú þegar Dragic-leikurinn fór fram?
Ef þú hafðir tök á því að fylgjast með þriðja leik San Antonio og Phoenix í nótt en tókst þá ákvörðun að gera það ekki... nú, þá var það afspyrnu léleg ákvörðun.
Ekki segja að við höfum ekki varað þig við.
Í framtíðinni verður sama hvort við lesum sögubækur San Antonio eða Phoenix - nú eða jafnvel annála NBA deildarinnar. Leiksins í nótt verður í framtíðinni minnst sem Dragic-leiksins.
Slóveninn Goran Dragic er aukaleikari í liði Phoenix. 24 ára gamall bakvörður sem skoraði innan við átta stig að meðaltali í vetur. Maður, sem uppáhalds NBA-rýnir okkar Charley Rosen kallaði "mögulega lélegasta leikmann í NBA deildinni" í pistli í byrjun vetrar.
Jæja, til að gera langa sögu stutta, skoraði Dragic þessi 23 af 26 stigum sínum í fjórða leikhluta og skaut San Antonio ofan í holu sem engu liði í sögu deildarinnar hefur tekist að klóra sig upp úr.
Phoenix hefur tekið 3-0 forystu í einvíginu við San Antonio eftir lygilegan 110-96 útisigur í nótt.
Þú sérð svona lagað ekki á hverjum degi. Áttar þig líklega á því nú þegar.
San Antonio á ekki svör við Phoenix-liðinu. Á ekki svör við Nash og Stoudemire, en Phoenix þurfti ekki einu sinni á þeim að halda í fjórða leikhluta gegn Spurs-liði sem var með bakið uppi við vegg. Króað af úti í horni.
"Strákar, svo verðum við að passa upp á Goran Dragic í þessari sériu," er klárlega ekki það fyrsta sem valt af vörum Gregg Popovich á liðsfundi Spurs fyrir einvígið. Þrátt fyrir að það hafi upphaflega verið San Antonio sem draftaði piltinn á sínum tíma (fail!)
Dragic skoraði einu sinni yfir 26 stig í leik í allan vetur (32 stig á 32 mín í Salt Lake City) og við sáum reyndar þann leik. Drengurinn getur sannarlega hrokkið í gang.
Það er freistandi að hrauna dálítið yfir Spursara eins og Richard Jefferson og kannski George Hill (þó hann hafi bjargað liðinu í Dallas-seríunni).
Það er freistandi að segja að San Antonio hafi verið með þennan leik fullkomlega í hendi sér og hefði geta klárað hann með því að aulast til að setja niður vítin sín í öðrum leikhluta - en við ætlum ekki að eyða tíma í það.
Förum bara inn í skáp, finnum fleiri hatta, étum nokkra þeirra og tökum afganginn ofan fyrir liði Phoenix Suns. Frábær frammistaða hjá þeim.
Cleveland er aftur farið að spila körfubolta
Við sögðum að Boston ætti ekki að geta unnið meira en einn leik í einvíginu við Cleveland.
Boston náði í þennan sigur í Cleveland í leik tvö. Það fór kliður um NBA þjóðina í kjölfarið.
Enn var eldur í gömlu glæðunum. Cleveland réði ekkert við Rondo. Boston gat enn spilað vörn. Garnett fékk að leika lausum hala. Þrír stóru áttu eitthvað inni eftir allt saman.
Cleveland var alls ekki ósigrandi, LeBron var meiddur og Mike Brown var enn lélegur sóknarþjálfari.
Svo kemur þriggja daga pása og einvígið flytur til Boston.
Eftir á að hyggja, var leikur þrjú búinn eftir sex mínútur. Það var tíminn sem það tók Cavs að slíta hjartað úr Boston-liðinu, trampa á því og henda því í trjákurlarann.
Staðan eftir fyrsta leikhluta: LeBron 21 - Boston 17. Og varð ekki mikið vænlegri fyrir Boston það sem eftir lifði leiks. Niðurstaðan 124-95, versta tap Boston á heimavelli í úrslitakeppni. Ekkert minna en það.
Þessi úrslit verða til þess að róa alla nema stuðningsmenn Boston. Við finnum til með þeim. En við erum fegin að Cleveland beit frá sér í leik þrjú. Almennilega. Tók þá grænu í sögulega kennslustund á þeirra eigin heimavelli.
Af hverju?
Af því lið sem gera tilkall til titilsins í deildinni okkar eiga að hafa drápseðli. Alveg sama hvað lið á í hlut. Meistaraefni, lið með jafn mikla breidd og hæfileika og Cleveland, á að stúta liði eins og 2010 Boston í sjö leikja seríu. Með fullri virðingu fyrir þeim grænu.
Það er bara þannig.
Friday, May 7, 2010
Fríkað Föstudagskvöld
Já, það er rétt. Það verður svo gaman í kvöld að við urðum að fara upp á háaloft og dusta rykið af orðinu fríkað!. Áttum bara engra annara kosta völ.
Cleveland og Boston mætast í leik þrjú í Boston klukkan 23 í kvöld og klukkan hálftvö eftir miðnættið hefst svo þriðji leikur Phoenix og San Antonio í Texas - sem sýndur verður þráðbeint á Stöð 2 Sport. Leikur fjögur hjá Cleveland og Boston verður svo í beinni á Sport 3 klukkan 19:30 á sunnudaginn.
----------
Það er ansi vægt til orða tekið að NBA Ísland hafi tekið sér bólfestu í hjörtum Íslendinga í vetur. Heimsóknafjöldinn hefur meira en tífaldast á síðustu mánuðum og við fáum mjög reglulega tölvupósta frá fólki um land allt sem lýsir yfir ánægju sinni með störf ritstjórnar.
Þetta gleður okkur mjög og þökkum við kærlega fyrir þessar góðu undirtektir. Þú getur haft samband við okkur á nbaisland@gmail.com ef þú ert í góðum anda. Ef þér mislíkar efnið á síðunni er upplagt að hætta bara að lesa og snúa sér aftur að spjallinu á barnalandi.
Fyrir þá sem ekki vita, er rétt að minna á að NBA Ísland er bæði á Facebook og nú síðast á Twitter eins og sjá má hér efst á síðunni.
Á Twitter stöndum við gjarnan vaktina meðan leikir standa yfir og dælum inn þönkum okkar og skemmtilegum fréttum sem við rekumst á.
Skorum á fólk að fylgjast með áfram og auðvitað láta alla körfuboltaáhugamenn og konur sem ráfa enn um í myrkrinu vita af þessari síðu. Það er svo gaman að vera hérna saman í veislunni.
Atlanta er ekkert rosalega frumlegt körfuboltalið
Orlando er 6-0 í úrslitakeppninni eftir nokkuð öruggan sigur á Atlanta í öðrum leik liðanna í kvöld.
Orlando vann fyrsta leikinn með 43 stiga mun eins og frægt er orðið, en mótspyrna andstæðinganna var allt önnur og betri í leik tvö. Atlanta spilaði miklu betur, en aðeins í rúman hálftíma og heimamenn krúsuðu yfir þá í fjórða leikhlutanum.
Það er átakanlegt að horfa á einhæfan sóknarleik Atlanta. Fjórir menn sem standa kjurrir og horfa á þann fimmta fara einn á einn. Josh Smith var skelfilegur á köflum í leik tvö. Þvingaði skot og í tvígang í síðari hálfleik nennti hann ekki að hlaupa til baka í vörnina og lið hans fékk fimm stig í grillið á meðan. Svona menn á bara að senda í sturtu.
Andinn í Atlanta-liðinu er eins og í jarðarför. Liðið er miklu ferskara á heimavelli þar sem það hittir betur og ver skot og djöflast í vörninni, en það er erfitt að sjá þessa seríu fara langt.
Það er líka rosalega erfitt að sjá hvort Orlando er að spila gullbolta eða ekki. Auðvitað er liðið að spila sæmilega "vel" þegar það klárar seríuna í fyrstu umferðinni með sópnum, en það segir okkur ekki nógu mikið.
Höfum í huga að það gerði Cleveland nákvæmlega ekkert gott að fara 8-0 í gegn um slaka andstæðinga í fyrstu umferðunum í fyrra.
Því er ekki að neita að Orlando hefur rosalegt vopnabúr. Sérstaklega ef stjörnumiðherjinn þeirra er nú að hanga inni á vellinum. Jameer Nelson er að spila eins og algjör töffari og þarna eru byssur í hverju horni. Það er bara drulluerfitt að eiga við Orlando þegar það fær að spila sinn leik.
Við eigum samt enn eftir að sjá það gerast að Dwight Howard og Vince Carter fari fyrir liði sem gerir eitthvað í úrslitakeppni. Það væri bara á skjön við öll okkar NBA-trúarbrögð.
Ótrúleg staðreynd að staðan á öllum vígstöðvum í annari umferðinni skuli vera 2-0 eftir tvo leiki nema hjá Cleveland og Boston.
Ok, kannski ekki. Við héldum bara að Suns og Spurs myndu skipta með sér leikjunum í Phoenix.
Hey - leikur þrjú milli Spurs og Suns er einmitt í beinni á Stöð 2 Sport klukkan 1:30 í nótt (fös). Horfðu á það ef þú ætlar að kveikja á sjónvarpinu yfir höfuð í þessum mánuði.
Thursday, May 6, 2010
Popovich hress á blaðamannafundi
Gregg Popovich var léttur og hress á blaðamannafundinum eftir annan leik Phoenix og San Antonio í gær. Ef hljóðið er hækkað í botn má heyra hvernig blaðamennirnir míga á sig af hræðslu.
Wednesday, May 5, 2010
Körfuboltalið óskar eftir sentimetrum
Það er eiginlega hallærislegt að vera að monta sig af því að allt sem við spáðum fyrir um í einvígi LA Lakers og Utah hefur komið á daginn.
Það var vitað mál að Lakers myndi rúlla þessari sériu upp hvort sem Jazz væri með allan sinn mannskap heilan eða ekki. En það er átakanlegt að horfa upp á þetta.
Lakers vinnur fyrstu tvo leikina með fimm og átta stigum, en við höfum sjaldan eða aldrei séð jafn ójaft einvígi. Það er nógu skelfilegt fyrir Utah-menn að skoða tölfræðina yfir fráköst og varin skot, en hún nær þó engan veginn að endurspegla muninn sem er á liðunum í teignum.
Carlos Boozer fer langverst út úr þessu. Öll skotin hans í seríunni eru erfið stökkskot úr jafnvægi og Lakers-menn eru búnir að draga úr honum vígtennurnar. Boozer er búinn að taka þrjú vítaskot í seríunni á næstum 80 mínútum. Og það er kannski ekki skrítið. Tölfræðingar sögðu okkur að Lakers hefðu varið sex skot frá honum í leik tvö.
Verðum samt að gefa mönnum eins og CJ Miles, Wesley Matthews, Paul Millsap og Ronnie Price eitt risastórt kúdós. Hvaða menn eru þetta segirðu? Nákvæmlega.
Utah er búið að tapa 16 leikjum í röð í LA og á því verður engin breyting, þó Lakers hafi ítrekað gefið Jazz færi á að stela leik í fyrstu leikjunum tveimur.
Liðin skipta með sér leikjunum í Salt Lake City og Lakers klárar þetta heima í fimmta leik.
Mikilvægasti sigur úrslitakeppninnar til þessa
Í færslunni hérna fyrir neðan töluðum við um að stórsigur Boston í Cleveland í gær hefði verið sá óvæntasti í úrslitakeppninni til þessa.
Sigur Bucks á Hawks í leik fimm var reyndar ansi óvæntur, en í kvöld kom í ljós að Atlanta er búið að gleyma hvernig á að spila körfubolta og því kemur í raun á óvart að liðið skuli yfir höfuð hafa klárað Milwaukee.
Hafi Boston sigurinn í gær verið sá óvæntasti, var sigur Phoenix Suns á San Antonio Spurs á mánudagskvöldið sá mikilvægasti fyrir nokkurt lið í úrslitakeppninni til þessa.
Phoenix varð að vinna þennan leik.
Spurs-grýlan hefur verið Steve Nash og Suns-mönnum ansi erfið í úrslitakeppninni undanfarin ár og það síðasta sem Nash og félagar hefðu þurft var að tapa fyrsta leik á heimavelli í einvígi þar sem Phoenix er að mörgum talið sigurstranglegra.
Nash, sem er 0-6 í seríum gegn Spurs á ferlinum (2 með Dallas, 4 með Phoenix), var líka ekki á því að tapa þessum leik og spratt upp úr startblokkunum skjótandi. Það er ekki hægt að ítreka nógu oft hvað þessi maður er mikill snillingur.
Eins og reikna mátti með var þessi fyrsti leikur háklassa skemmtun. Sveiflukenndur, hraður og dramatískur.
Það er fyndið að hugsa til þess hvað eru margir sem eru fyrir löngu búnir að fá nóg af að horfa á Spurs-liðið. Segja að liðið sé leiðinlegt á að horfa og allt það. Samt er San Antonio auðveldlega það lið sem er að bjóða upp á bestu skemmtunina í úrslitakeppninni til þessa. Serían við Dallas var sú besta í fyrstu umferðinni og þessi gegn Phoenix verður betri.
Við skitum upp á bak með að að spá fyrir um þessa seríu af því við áttum erindi við lækna og lyf, en af því Phoenix vann fyrsta leikinn - getum við látið spá okkar líta betur út en ella.
Við ætlum nefnilega að spá Spurs sigri í þessu einvígi.
San Antonio þarf að finna svör við Nash og Stoudemire, en Phoenix þarf að finna svör við Parker, Hill, Ginobili og Duncan. Þessi sería snýst mikið um tempó alveg eins og Dallas-serían.
Pop þarf líklega að sjá af sérvisku sinni og smella Parker í byrjunarliðið aftur, en hann þarf líka að reyna að passa upp á að Jason Richardson sé ekki að skora 20+ stig í leik í þessari sériu.Phoenix er búið að vinna ellefu leiki í röð þegar hann gerir það ef við munum rétt.
Richardson er búinn að vera algjör x-faktór hjá Suns í úrslitakeppninni og einn af þeim leikmönnum sem hafa spilað einstaklega vel og enginn talar um.
Enn einu sinni. Þessi sería verður jöfn og taumlaus skemmtun og þú getur séð þriðja leik liðanna í beinni á Stöð 2 Sport á föstudagskvöldið klukkan 1:30 eftir miðnætti.
Við kennum Mike Brown um ófarir Cleveland í körfubolta
Óvæntustu úrslitin í úrslitakeppninni til þessa áttu sér stað á þriðjudagskvöldið þegar Boston valtaði yfir rænulaust Cleveland-lið á útivelli.
Staðan þar er því orðin 1-1 og næstu tveir leikir fara fram í Boston.
Það væri hægt að skrifa nokkrar blaðsíður um þetta einvígi og hvert það er að stefna.
Rajon Rondo er besti og mikilvægasti leikmaður Boston og liðið fer eins langt í þessu einvígi og hann fer með það. Það þýðir líklega að hann þarf að spila 48 mínútur í leik til að gera það.
Við nennum ekki að pæla í því hvort LeBron James er meiddur eða ekki. Látum öðrum það tuð eftir.
Margir hafa þegar afskrifað Cleveland í úrslitakeppninni eftir þetta ljóta tap, en þó það sé full mikil dramatík, rifjaði þetta tap heimamanna upp staðreynd sem við vorum búin að steingleyma.
Mike Brown er ekki nógu góður þjálfari.
Við höfum oft lýst þessari skoðun okkar, hvort sem það var hér eða á kaffistofunni, en við vorum búin að gleyma þessu.
Brown, sem er drengur góður og dagfarsprúður alla jafna, var brjálaður á blaðamannafundinum eftir tapið. Hann er orðinn hræddur og má vera það.
Það er auðvelt að gleyma því að lið sé ekki með nógu góðan þjálfara þegar það krúsar í gegn um deildakeppnina á góðum mannskap og vinnur 60 leiki.
Svo byrjar úrslitakeppnin og þá reynir meira á þjálfarana. Þeir verða að vera með gameplan og vita hvað þeir ætla að gera með róteisjónið sitt. Það hefur Mike Brown ekki.
Af hverju er hann t.d. að spila Shaquille O´Neal og Zydrunas Ilgauskas núna þegar Anderson Varejao og JJ Hickson voru mennirnir sem voru að dílivera þegar liðið spilaði best í vetur? Shaq skoraði nokkrar körfur í fyrsta leiknum en heilt yfir tekur hann meira af borðinu en hann gefur Cavs. Það er augljóst.
Og af hverju er Cleveland að mæta til leiks á móti Boston eins og þeir séu að fara að spila sýningarleik við Tindastól? Muna þeir ekki hvað kom fyrir Apollo Creed þegar hann barðist við Ivan Drago?Við viðurkennum að við vanmátum Celtics líklega meira en Cleveland gerði, en það er ástæða fyrir því. Boston var 50% lið frá áramótum og nennti þessu ekki. Virtist hlakka til að fara á Benidorm í lok apríl ef eitthvað var.
Við erum með óbragð í munninum yfir þessari séríu og við viðurkennum það fullkomlega að það fer í taugarnar á okkur að Celtics skuli allt í einu hafa ákveðið að spila eins og menn núna. Fengum magakrampa þegar við sáum Rasheed Wallace setja niður þessi skot.
Það er sama hvort það er í vörn eða sókn, Cleveland er bara að líta illa út. Talandi dæmi um það er þegar Kevin Garnett fær að líta vel út í sóknarleiknum. Garnett hefur ekki gert annað en að taka stökkskot í tvö ár, en núna er hann að skora í teignum og fær að hlaupa í gegn og troða með annari - nokkuð sem við höfum ekki séð síðan hann spilaði með Minnesota.
Þetta er gaman fyrir græna en skelfilegt ef þú heitir Mike Brown.
Ef við lítum á björtu hliðarnar, þýðir þetta tap Cleveland bara að þessi séría verður háklassa skemmtun. Það hefði verið frekar lélegt að hafa bara eitt spennandi einvígi í annari umferðinni.
Cleveland þarf samt alvarlega að taka sig saman í andlitinu og finna drápseðlið. Liðið hefur verið afleitt í fyrstu tveimur leikjunum og Boston er bara skrefinu á undan það sem af er.
Eins og við sögðum hér fyrir ofan. Það er kannski óþarfi að fara fram úr sér út af einum leik og dæma Cleveland úr leik, en ef Boston næði að vinna þessa seríu - yrði það mesta skita síðan Dallas tapaði fyrir Golden State í fyrstu umferðinni hérna um árið (og það var söguleg skita).
Cleveland hefði átt að skipta um þjálfara fyrir löngu, löngu, löngu síðan. Ef liðið verður ekki meistari í næsta mánuði, verður sú ákvörðun mjög auðveld.
Og þessi yfirlýsing kemur frá okkur, sem erum á móti því að kenna þjálfurum alltaf um ófarir liða í NBA deildinni.
Tuesday, May 4, 2010
Hrunskýrsla úr MVP kjörinu
Í gremjupistlinum okkar um bestu leikmenn heims í gær vorum við að frussa yfir því að nokkrir aðilar hefðu ekki sett LeBron James í efsta sætið í kjörinu á verðmætasta leikmanni deildarinnar á dögunum.
Fleirum en okkur þótti þetta reginhneyksli og nú er búið að hafa upp á nokkrum af þessum vitleysingum.
Þrír af þeim sjö sem ekki settu James í efsta sætið á kjörseðlinum, settu Dwight Howard í efsta sætið.
Og gettu hvar þeir vinna?
Eins og við sögðum. Þessi MVP kjör eru bull.
Ætli þessir eldflaugavísindamenn hafi verið að fylgjast með einvígi Orlando og Charlotte í fyrstu umferðinni?
Monday, May 3, 2010
Cleveland-Boston #2 í beinni á NBA TV á miðnætti
Þetta verður bara flottur leikur.
Boston verður að vinna.
Síðar í kvöld er svo fyrsti leikur hjá Phoenix og San Antonio.
Okkur barst líka leiðrétting. LeBron James var auðvitað meiddur á olnboga en ekki öxl eins og við sögðum í færslu hér fyrir skömmu.
Það breytir þó engu um skrif okkar.
Það er skrítið að maður sem er meiddur á hægri olnboga skuli keyra með hann á undan sér inn í andstæðinginn og klára með vinstri hendi.
Þökkum fyrir ábendinguna.
Gremjupistill um bestu körfuboltamenn í heimi
Fyrir nokkrum mánuðum lofuðum við að rökstyðja í pistli hérna þá skoðun okkar að LeBron James væri besti leikmaður heims.
Það er auðveldlega versta ákvörðun sem við höfum tekið síðan við opnuðum þetta vefsvæði.
Skrifuðum þrjá risavaxna pistla um þetta í kvöld, en hentum þeim öllum í ruslið um leið og við settum punktinn aftan við síðustu setninguna og bölvuðum eins og timbraður pólskur verkamaður eftir langa helgi.
Á sínum tíma vorum við að hugsa um að skrifa þennan pistil af því sumum fannst það í raun og veru vera einhver spurning hver væri besti leikmaður deildarinnar. Sem er galið.
Það hefur ekki verið spurning í ein tvö ár.
Ef þú ert einn af þeim sem heldur ennþá að Kobe Bryant sé besti leikmaður í heimi, ættir þú kannski að fara og kaupa þér ársmiða hjá HK í DHL-deildinni.
Kobe var bestur í heimi í nokkur ár. Þegar deildin var að verðlauna menn eins og Steve Nash og Dirk Nowitzki fyrir að vera verðmætustu leikmenn deildarinnar. En allir vita að það var Kobe var bestur. Við vissum það að minnsta kosti.
Svo hljóp Kobe á vegg í lokaúrslitunum árið 2008. Síðan hefur LeBron James verið að bæta sig og bæta sig og bæta sig.
Kobe er enn frábær leikmaður, en hann er ekki Mamba lengur. Mamba spilaði einn á fimm og skoraði sextíu og áttatíu stig upp á grínið - bara af því hann langaði að prófa það.
Kobe á erfitt uppdráttar núna af því hann er farinn að dala líkamlega, getur ekki lengur gert hvað sem hann vill á vellinum og er þar að auki að glíma við 1400 tegundir af meiðslum.
Það er dálítið spes að einmitt eftir að Kobe hljóp á Boston-vegginn fyrir tveimur árum, fóru allir að kalla hann besta leikmann í heimi.
Kannski af því að þá var hann kominn með Pau Gasol við hliðina á sér og Lakers-liðið varð loksins gott lið aftur.
Segðu hvað sem þú vilt. Kobe var ekki betri. Lakers-liðið var bara betra.
Við kaupum heldur ekki þetta "Nú er Kobe orðinn rosalega góður af því hann er búinn að þroskast og spilar nú fyrir liðið og gerir aðra betri" og allt það bull.
Kobe gaf aðeins eftir Mömbuna þegar liðið tryggði sér meistaratitilinn í fyrra, en þú þarft ekki að horfa lengra en á leik fjögur gegn Oklahoma um daginn til að sjá að hann er alls ekki orðinn sáttur við að spila leikinn ekki á sínum forsendum. Og verður það líklega aldrei héðan af.
Kobe Bryant er einn hæfileikaríkasti körfuboltamaður allra tíma og við horfum alls ekki framhjá því hvernig hann tryggði Lakers sigurinn leik eftir leik í vetur. Þessi pistill er ekki skrifaður til að dissa Kobe. Þetta er bara ískaldur NBA veruleiki, byggður á áhorfi atvinnuáhugamanna sem breytt hafa dögum í nætur og sundrað fjölskyldum til að komast að niðurstöðum á borð við þessa.
Kobe Bryant hefur ekki meðfæddan þennan einstaka hæfileika sem er að vita hvenær á að slá og hvenær á að verjast. Þetta element sem bestu leikmenn allra tíma hafa flestir. Að gera aðra leikmenn í kring um sig betri og vita nákvæmlega hvenær þeir eiga sjálfir að sjá um hlutina. Þessa töfrablöndu sem gerði Magic Johnson og Larry Bird að þeim goðsögnum sem þeir eru.
LeBron James var kominn með þetta element þegar hann var í menntaskóla og var einstakur leikmaður strax í fyrsta leik í atvinnumennsku.
Var bara með þetta.
Við höfum fylgst með þessum einstaka íþróttamanni frá því hann kom fyrst inn í deildina og það fyrsta sem við hrifumst af í leik hans var einmitt sú staðreynd hve mikill liðsmaður hann er.
Hann treystir alltaf liðsfélögum sínum - alveg sama hver það er og á hvaða tíma það er. Það er hrein unun að fylgjast með því.
Það er ansi hreint gott að búa yfir þessum hæfileikum sem taldir eru upp að ofan og þetta eitt væri nóg til að búa til fínan körfuboltamann. En LeBron James er líka fyrirbæri á vellinum út af líkamsburðum sínum og hæfileikum.
Það er enginn leikmaður í deildinni í dag sem getur dómínerað leik jafn fullkomlega og James. Með stigaskorun, fráköstum, stoðsendingum, stolnum boltum, vörðum skotum - nefndu það. Það er eiginlega óþarfi að telja þetta allt upp. Fólk sem hefur horft á nokkra leiki með Cleveland í vetur veit þetta.
Og það sem er súrrealískast við þetta er sú staðreynd að James er enn eftir að bæta sig umtalsvert. Hann verður betri og betri með hverjum mánuðinum sem líður og á enn talsvert í að ná toppaldri sem leikmaður.
Hann er bara 26 ára gamall og er ávísun á 30 stig og sjö til átta fráköst og stoðsendingar að meðaltali í leik. Aðeins handfylli af leikmönnum í sögu NBA hafa boðið upp á tölfræði sem er nálægt þessum klassa og þeir eru allir í heiðurshöllinni.
Það er ansi djúpt í árina tekið að líkja manni sem hefur ekki unnið titil við menn eins og Bird og Magic. En honum til varnar verður að taka með í reikninginn að hann hefur ekki verið umkringdur jafn miklum gæðaleikmönnum og hinir tveir.
Cleveland-liðið í fyrra var gott og átti erindi í úrslitin, en liðið í ár á að vera nógu gott til að klára dæmið. Maður eins og James á að vera nógu góður til að fara með þennan mannskap alla leið og við munum senda honum harðorðan tölvupóst ef hann fer ekki að bæta nokkrum titlum inn á lygilega ferilská sína í NBA deildinni fljótlega.
LeBron James, Kobe Bryant og Dwyane Wade eru bestu leikmenn í heimi.
Skrefi á undan öðrum.
Ef LeBron sleppur við alvarleg meiðsli, kemur enginn leikmaður nálægt honum næstu sex ár.
Kevin Durant er eini maðurinn á séns á að stríða honum eitthvað.
Dirk, Nash, Melo, Howard og þvílíkir eru annað hvort komnir yfir það besta eða of gallaðir til að eiga skilið að vera með í þessari umræðu.
James var í kvöld kjörinn verðmætasti leikmaður deildarinnar annað árið í röð.
Það sem vekur ógleði okkar í kjörinu er að sjö af þeim 123 sem greiddu atkvæði settu hann ekki í fyrsta sæti - og það sem meira er settu fimm hann í annað sæti og tveir í þriðja sæti.
Ætli það hafi ekki verið sömu sauðnautin og settu Stephen Jackson í fimmta sætið á seðlinum sínum. Svona fólk á ekki að fá að koma nálægt körfubolta.
En þetta er nú ástæða þess að við höfum ofnæmi fyrir þessu MVP-bulli. Af því það er á margan hátt nákvæmlega það. Bull.
Þetta var fjórði pistillinn okkar um besta leikmann heims í kvöld. Vorum að spá í að henda honum eins og hinum þremur. En við getum ekki svikið gefin loforð.
Kobe Bryant er viss í sinni sök
Segðu hvað sem þú vilt um Kobe Bryant.Maður þarf að vera nokkuð "viss með sig" til að bjóða upp á eitthvað svona í miðri úrslitakeppni.
Er hann að púlla þetta?
Við segjum nei. Fjandakornið, nei.
Grace Jones hefði kannski púllað þennan galla í "A view to a kill"
Kannski.
Ekki þú, Kobe. Taktu frekar mynd af þér á gemsann næst þegar þú ferð í sturtu og settu á netið eins og allir hinir.
Hæð og gæði
Fyrsti leikur LA Lakers og Utah Jazz í kvöld fór alls ekki eins og við spáðum hér fyrr í dag.
Þristarnir hans Fishers komu aldrei, Kobe tjaldaði ekki á vítalínunni fyrr en hann kláraði leikinn, sveiflurnar voru ekki eins miklar og venjulega og Kyrylo Fesenko tapaði ekki einum einasta bolta.
Allt hitt sem við töluðum um í dag stóð eins og stafur á bók.
Carlos Boozer átti þokkalegan leik á pappírunum, en hann átti í mestu vandræðum innan um hávaxna varnarmenn Lakers í sókninni og gerði nokkur átakanleg mistök í vörninni.
Gasol gerði nákvæmlega það sem honum sýndist í teignum og var ekki mataður nærri nóg frekar en svo oft áður.
Og Lamar Odom var gríðarlega mikilvægur hjá Lakers í þessum leik eins og alltaf á móti Utah. Níu stig, tólf fráköst (fimm í sókn) og tvö varin skot.
Varnarleikur Utah var alls ekki nógu góður, sérstaklega í fyrri hálfleiknum, en það var gaman að sjá þetta samansafn af aukaleikurum liðsins stíga upp í fjórða leikhlutanum og gefa allt í þetta.
Þessi fyrsti leikur í einvíginu undirstrikar fyrri spár. Lakers vinnur þetta 4-1 af því Utah á ekki svör við hæð og gæðum Lakers-manna. Kobe og félagar gerðu bara það sem þeir þurftu að gera í dag og halda því áfram þangað til þeir eru búnir að klára þessa seríu.
Sunday, May 2, 2010
LA Lakers vinnur fyrsta körfuboltaleikinn gegn Jazz í kvöld
Í kvöld klukkan 19:30 verður fyrsti leikur LA Lakers og Utah Jazz í annari umferð Vesturdeildarinnar. Leikurinn verður sýndur beint á Stöð 2 Sport 3 samkvæmt þeim gögnum sem við höfum undir höndum.
Þetta er þriðja árið í röð sem þessi lið mætast í úrslitakeppninni og þess má til gamans geta að í síðustu fimm skipti sem þessi lið mættust í úrslitakeppni, fór sigurvegarinn í seríunni í lokaúrslit.
Við vonum að við drögum ekki úr eftirvæntingu neins þegar við segjum að þetta einvígi á aldrei eftir að verða spennandi. Ekkert lið í NBA deildinni hentar öðru eins vel í úrslitakeppni og Jazz hentar Lakers. Og það hefur enda sýnt sig síðustu þrjú ár.
Utah ætti ekki möguleika gegn Lakers, jafnvel þó liðið væri með þá Mehmet Okur og Andrei Kirilenko heila - og þá skiptir engu máli hvort Andrew Bynum er heill heilsu eða ekki.
Utah vann síðast í Staples Center á nýársdag árið 2006 í leik þar sem Kobe Bryant tók út leikbann.
Kíktu á leik liðanna í kvöld og taktu eftir því hvernig miðherjinn Fesenko hjá Jazz fær tvær villur og tapar 2-3 boltum strax í fyrsta leikhluta.
Taktu eftir því að fyrsta skot Deron Williams verður þristur sem klikkar.
Taktu eftir því hvað Carlos Boozer verður skíthræddur við stóru mennina hjá Lakers og hikar við að koma nálægt teignum. Hann er alltaf hræðilegur á móti Lakers og á því verður engin breyting.
Taktu eftir því þegar Derek Fisher skorar tvo til þrjá þrista í fyrsta leikhluta
Taktu eftir því hvað Kobe Bryant fer oft á vítalínuna í einvíginu (ef hann treystir sér í að keyra á körfuna).
Taktu líka eftir því hvað Lamar Odom á eftir að eiga marga stórleiki í þessari séríu og Pau Gasol á eftir að eiga náðuga og árangursríka daga í teignum.
Taktu eftir sveiflunum sem eiga eftir að verða í fyrstu tveimur leikjunum í LA.
Taktu eftir því hvað Lakers-liðið fer vandræðalaust í gegn um heimaleikina þó andstæðingar þeirra klípi og klóri og gefist ekki upp.
Þetta verður serían þar sem sérfræðingarnir fara að tala um að sé að verða kominn meistarabragur á Lakers-liðið. Spáum þessu 4-1 fyrir Lakers.
Það þarf ekki að fjölyrða um það að fyrsti leikurinn ræður öllu í þessu. Phil Jackson er að nálgast 50-0 árangur í seríum þar sem lið hans nær 1-0 forystu og því er þetta ekkert flókið.
Þetta þýðir líka að Kobe og félagar fá góðan tíma til að sleikja sárin og safna kröftum fyrir sigurvegarann úr einvígi Phoenix og San Antonio og það er þess vegna sem við tippum á að LA Lakers spili til úrslita í NBA í næsta mánuði.
Cleveland vann fyrsta leik en leyfði Boston að spila körfubolta
Cleveland náði í gær 1-0 forystu gegn Boston með ósannfærandi sigri á heimavelli sínum í fyrstu viðureign liðanna í annari umferð Austurdeildarinnar.
Heimamenn byrjuðu afleitlega í leiknum og þar kom tvennt til. LeBron James fór ekki einu sinni í árásarhaminn í fyrri hálfleiknum og skaut með vinstri. Þessi meintu axlarmeiðsli hans eru afar undarleg, því hann notaði hægri öxlina til að keyra inn í andstæðingana og skaut með vinstri.
Það var ekki það versta. Varnarleikur Cleveland var út úr kortinu. Þú veist að mótherjar Boston eru ekki að spila vel þegar Kevin Garnett er farinn að geta keyrt í gegn um alla vörnina og troða með annari. Það var enginn eldur í Cleveland-mönnum lengi vel í þessum leik.
Cavs fengu fínt framlag frá mörgum mönnum i þessum leik og Mo Williams skaut liðið í gang með flottri rispu í þriðja leikhlutanum.
Boston var að spila ágætlega af því Cleveland-vörnin leyfði þeim það. Cavs réðu ekkert við Rondo framan af, en þegar þeir náðu að loka á hann, fann Boston engin svör.
Rondo er besti leikmaður Boston. Þetta big three dæmi hjá Boston heyrir sögunni til. Boston fer eins langt og Rondo fer með liðið í þessu einvígi gegn Cleveland. Og það er áhugavert að meta möguleika Boston í seríunni út frá því.
Eftir fyrsta leikinn mætti ætla að Cleveland færi áfram í þessari sériu af því liðið er bara með svo miklu meiri breidd. Við setjum þó spurningamerki við marga hluti hjá Cavs.
Það er reyndar ekkert að öxlinni á LeBron, en liðið þarf að fá meira frá Antawn Jamison og spila meira á Varejao og Hickson en á O´Neal og Ilgauskas. Shaq var að taka meira frá liðinu en hann kom með inn á borðið í þessum leik.
Cavs ættu að vinna þessa seríu 4-1, en á miðað við það sem við sáum í fyrsta leik, virðast þeir hafa mikinn áhuga á að leyfa Boston að vera með í þessu einvígi. Slakur varnarleikur og skortur á drápseðli sýndu okkur það.
Saturday, May 1, 2010
Þetta þarft þú að vita um Vesturdeildina
Nú er að koma mynd á fyrstu umferðina í úrslitakeppninni.
Atlanta á enn eftir að pappíra sig og klára leik sjö í einvíginu við Milwaukee (klukkan 17 á sunnudag á nbatv), en annars er fyrstu umferðinni lokið.
Í gær, föstudag, náðu LA Lakers og Utah að tryggja sér sæti í annari umferð og mætast því í annari umferð þriðja árið í röð.
Leikur eitt þar í beinni á einhverri af rásum Stöðvar 2 á sunnudaginn klukkan 19:30.
Denver er búið að toppa
Utah kláraði Denver 4-2 eftir sigur á heimavelli sínum í leik sex í gær. Það kom ekkert sérstaklega á óvart úr því sem komið var í þessari sériu - ekki frekar en allar tæknivillurnar sem dæmdar voru á leikmenn Denver þegar þeir töpuðu kúlinu í leiknum.
Það er dálítið grimmdarlegt að segja svona, en við ætlum að segja það núna. Þetta Denver-lið á aldrei eftir að ná lengra en það hefur þegar náð. Toppaði í fyrra og þó það hafi ekki haft heppnina með sér að þessu sinni, er farið að hausta á þennan mannskap.
Denver er slakt varnarlið, agalaust fyrir utan Chauncey Billups, með einstaklinga sem hafa ekki burði eða hjarta til að fara lengra - og er með sýstem sem mun aldrei skila almennilegum árangri í úrslitakeppni. Það er bara þannig.
Vissulega var slæmt fyrir Denver að missa George Karl þjálfara í þessi veikindi og vera án hans á lokasprettinum, en við gefum liðinu enga fría passa út á það. Ekki í seríunni gegn Utah.
Kirilenko og Okur eru mikilvægari en þú heldur
Utah var án Andrei Kirilenko og Mehmet Okur í þessari seríu og Denver hafði heimavöllinn.
Þessir tveir leikmenn eru miklu mikilvægari fyrir Jazz en flestir gera sér grein fyrir.
Utah er nefnilega með sýstem - ólíkt Denver. Og þessir tveir leikmenn sem liðið missti í meiðsli eru gríðarlega mikilvægir hlekkir í þessu sýstemi.
Það þýðir ekkert að horfa á saklausa tölfræði Andrei Kirilenko og segja "Hann skorar innan við 12 stig að meðaltali í leik - af hverju ætti liðið að sakna hans?"
Kirilenko er sá maður sem er búinn að spila lengst undir stjórn Jerry Sloan, kann öll kerfi aftur á bak og áfram, stýrir oft á tíðum spili liðsins og er að auki fjölhæfasti (og eini) almennilegi varnarmaðurinn og skotblokkarinn í öllu liðinu.
Okur er ekki hefðbundinn miðherji. Hann tekur virkan þátt í spili liðsins, hefur mikla reynslu og teygir mikið á vörn andstæðinganna af því hann er ógnandi skotmaður út á tólf metra. Bara sú staðreynd að þau tæplega sjö fet sem Okur er á hæðina skuli vera farin alveg út úr hópnum hjá Utah er rándýrt fyrir þetta smávaxna lið.
Dýrt, af því samanlögð reynsla varamiðherja Utah af því að spila í deildakeppni er nánast engin - hvað þá reynsla í úrslitakeppni. Þetta reynsluleysi stafar ekki bara af því að þeir eru ungir að árum - heldur af því þeir geta ekkert. Ekki. Neitt.
Utah tæki því grínlaust fagnandi ef því stæði til boða að fá Guðmund Bragason eða Baldur Ólafsson inn í hópinn í dag.
Lakers kláraði dæmið - Hvað segir það okkur?
Það fór svo að lokum að meistarar LA Lakers reimuðu á sig skó sína og kláruðu erfitt verkefni sitt gegn Oklahoma City í gær.
Það segir sína sögu um seigluna og baráttuna í ungu liði Oklahoma að það hafi verið einu litlu atviki frá því að ýta meisturunum sjálfum alla leið í oddaleik. Hvaða atviki segirðu? Þeirri staðreynd að Serge Ibaka hafi klikkað algjörlega á að stíga Pau Gasol út í síðustu heilu sókninni í leiknum. Rándýr byrjendamistök.
Það væri samt enginn að tala um það ef Kevin Durant hefði verið með meira en 22% skotnýtingu í þessum leik. Svona er að vera ungur og óreyndur (og með Ron Artest límdan við endajaxlana á sér).
Það er klisja að afsaka ung lið frá svona löguðu með því að segja að þeirra sé framtíðin og gangi betur næst og allt það kjaftæði, en það á raunverulega við um Oklahoma-liðið. Meðalaldurinn í þessu liði er fáránlegur og framtíðin er björt hjá Thunder ef haldið verður rétt á spöðunum þar næstu ár. Nokkuð sem þó er alls ekki gefið í NBA.
Hvað vitum við um meistarana eftir þessa seríu? Eitthvað aðeins meira en áður en hún hófst. Við spáðum því að Lakers tæki þetta 4-2 og það kom á daginn (leyfið okkur að monta okkur aðeins - brakketið okkar er farið til helvítis).
Við vitum að Kobe Bryant gengur ekki alveg heill til skógar (þó hann hafi verið mjög flottur í síðustu tveimur leikjunum), Pau Gasol fær ekki nóg af boltanum, Artest er að hitta illa, Lamar Odom er enn að hverfa mikið, Fisher er orðinn of gamall til að halda kartöflupoka fyrir framan sig í vörninni og að bekkurinn er í besta falli vafasamur.
Það verður þó ekki tekið af þeim gulu að þeir kláruðu verkefnið gegn Thunder með sóma og fengu meira að segja flottan leik frá varamönnum sínum í sjötta leiknum. Kom okkur á óvart. Við skulum segja að Lakers-liðið sé í aðeins betri málum en ástæða var að ætla fyrir seríuna.
Þessi færsla er orðin allt of löng, svo við ætlum að geyma það að spá fyrir um einvígi Lakers og Jazz. Það hefur enginn undir fertugu athygli í að lesa meira í einu.
Subscribe to:
Posts (Atom)
























