Afleysingamaðurinn

Tweet

Að púlla pelsinn

Tweet

Það púlla ekki allir pelsinn, það vitum við öll. Sannarlega er það dálítið frumstætt að ganga um með dautt dýr hangandi utan á sér þegar kólna tekur í veðri. Minnir okkur dálítið á þetta stórepíska atriði:



Nokkrir valinkunnir NBA leikmenn hafa látið sjá sig í pelsum. Okkur datt í hug að sýna ykkur nokkrar myndir því til sönnunar og segja ykkur frá tveimur óþekktarormum sem fóru illa að ráði sínu í pelsadeildinni.

Fyrst skal frægan telja - það er Clyde karlinn Frazier - einn svalasti íþróttamaður sögunnar. Auðvitað púllaði Clyde pelsinn, enda á hann nóg af þeim. Hér fyrir ofan gefur að líta töff mynd af kappanum frá árinu 1974 þar sem hann stendur á tröppunum við Plaza hótelið á Manhattan. Sjóðandi svægi.

Hér má líka sjá Artis Gilmore

Reggie Theus

Kobe Bryant

Té-Mák

Og Iverson

Svo var ekki úr vegi að setja vinina Isiah Thomas og Magic Johnson inn saman. Miklir pelsamenn greinilega. Ætli megi ekki segja að Magic sé svar NBA deildarinnar við Arnari Gunnlaugs og Sol Campbell.

 Shaquille O´Neal á að sjálfssögðu pels og svo skemmtilega vill til að tveir af liðsfélögum hans létu taka mynd af sér í flíkinni af tröllinu. Þetta eru þeir Steve Nash (Suns) og Nate Robinson (Celtics). Það hafa ekki farið nema svona fjórtán refabú í þetta mannvirki sem pelsinn hans er.

Nú fara leikar að æsast og röðin komin að Gilbert Arenas. Hann lék í auglýsingu fyrir dýraverndunarsamtökin PETA* og sagðist frekar kjósa að vera blekaður en pelsaður.

Skömmu síðar létu þáverandi liðsfélagar hans Nick Young og Dominic McGuire hinsvegar bösta sig illilega. Þeir bjuggu þá í húsinu hans Arenas og sagði hann þeim að þeir mættu klæða sig í hvaða föt sem þeir finndu í kofanum.

Auðvitað fundu þeir tvo pelsa inni í skáp og létu taka myndir af sér sem fóru beint á netið. Vakti þetta litla hrifningu hjá PETA-mönnum, sem sáu strax að þar var eitthvað loðið á ferðinni (no pun intended). Sannkallaðir kjarneðlisfræðingar hér á ferð.

Síðasti snillingurinn á þessum lista notaðist ekki við neina milliliði þegar hann sendi PETA fingurinn. Þetta er auðvitað meistari Dennis Rodman. Margir muna eftir auglýsingunum þar sem hann píndi sig í að koma nakinn fram og sagðist heldur kjósa blek en pels.

Eitthvað hefur fulltrúi PETA sem samd við Rodman verið vitgrannur. Ef bókað er að einhver NBA leikmaður eigi pels, er það Rodman. Auðvitað var þess ekki langt að bíða að kappinn færi út á lífið með dautt dýr um hálsinn. Þó það nú væri!

* - PETA eru mjög umdeild samtök sem hafa komist í fréttirnar fyrir fantaskap og fjármálaóreiðu. NBA Ísland er mjög annt um dýravernd en við ráðleggjum fólki sem vill láta gott af sér leiða á þeim vettvangi að leita annað en til PETA.

Óæskileg tölfræði Nick Young

Tweet

Menn voru á báðum áttum þegar LA Clippers fékk Nick Young í sínar raðir í vetur.

Young kom frá Washington og þekkir því ekkert annað en að tapa á ferlinum. Hann hefur þó komið boltanum í körfuna annað slagið og því tóku forráðamenn Clippers þá ákvörðun að semja við hann.

Við höfum ekki horft á marga leiki með Nick Young, en við fréttum af tölfræði sem verður líklega til þess að við nennum aldrei að horfa á hann spila - jafnvel þó hann sé að spila með skemmtilegu liði Clippers.

Nick Young er eini leikmaðurinn í sögu NBA sem hefur ekki náð að gefa 350 stoðsendingar samhliða því að skora yfir 3500 stig. 

Og núna er hann búinn að bæta við metið - er kominn í 4000 stig, en enn ekki kominn með 350 stoðsendingar.

Hann er með EINA stoðsendingu að meðaltali í leik á ferlinum og hefur meira að segja lækkað í stoðsendingum síðan hann kom til Clippers.

 Stundum fá menn stoðsendingu þegar þeir missa boltann til félaga sinna eða skjóta loftboltum. Sendingarnar sem Young hefur fengið skráðar á sig hljóta að vera byggðar á slíkum mistökum.

Ef við skoðum menn í hans stöðu til samanburðar, er hann í 32. sæti yfir stoðsendingahæstu skotbakverðina í NBA í vetur. Það er með ólíkindum að leikmaður - og það bakvörður - sé með vinnu þrátt fyrir þennan hrikalega veikleika ef svo má segja.