Æsilegar lokasekúndur í KEF (via Leikbrot)

Tweet

Garðabær virðist sterkari en Breiðholt í körfubolta

Tweet

Það er útlit fyrir að þetta verði langur vetur hjá ÍR-ingunum. Þeir áttu aldrei möguleika í Ásgarðinum í kvöld þar sem þeir steinlágu 89-61. ÍR hefur aðeins náð að vinna Val og Skallagrím í deildinni, sem er hið besta mál út af fyrir sig, en virðist ekki eiga erindi í sterkari lið í bili.

Lið Stjörnunnar er búið að taka dálítið jójó undanfarið en það hefur kannski eitthvað með það að gera hvað liðin í deildinni eru missterk. Stjarnan skíttapaði fyrir Grindavík með 20 stigum um daginn, en beitir svo ÍR svipuðum fantabrögðum í kvöld og vinnur risasigur. Mikill munur á þessum þremur liðum.

Við erum enn að reyna að reikna hvar Stjarnan á að fá 30 stigin sem hurfu á braut með þeim Jovan Zdravevski og Brian Mills. Vorum búin að ákveða að Marvin Valdimarsson fengi megnið af þeim, að minnsta kosti fleiri skot. Marvin er allt of kurteis og þarf að reyna að vekja sinn innri J.R. Smith.

Hey! Myndir.

Ungu mennirnir halda áfram að gera það gott

Tweet

Leikur KR og Stjörnunnar í kvöld var ljómandi skemmtilegur. Heimamenn í KR unnu sigur 88-82 og hafa því klárað alla fjóra leiki sína í mótinu. Stjörnumenn byrja 1-3 og eru hægt og bítandi að finna taktinn. Staða þeirra í töflunni er önnur en hún hefur verið undanfarin ár, en eins og Teitur þjálfari sagði í samtali við Vísi í kvöld, fer hann ekki á taugum þó hann tapi nokkrum haustleikjum.

Enn er ákvörðunin um að fækka útlendingum í deildinni að líta betur út og við erum farin að hallast að því að þetta sé það besta sem hefur komið fyrir deildina okkar á undanförnum árum. Gallinn við þetta er að einhverjum af félögunum úti á landi gengur víst illa að manna sig, en þar fyrir utan sjáum við bara ekkert sem mælir móti þessu fyrirkomulagi sem nú er komið á í úrvalsdeildinni.

Martin Hermannson nýtti sér útlendingaleysið til hins ítrasta í kvöld og sallaði 31 stigi og gaf 8 stoðsendingar hjá KR - hitti úr 13 af 15 skotum og bauð upp á 39 í framlag. Þetta er svo dásamlega falleg tölfræði - svo góð að Ruslinu á karfan.is þótti ástæða til að geta þess sérstaklega í kvöld. Þó það nú væri.. Frábær leikur hjá drengnum, sem hafði haft hægt um sig í upphafi móts vegna meiðsla.

Við höfðum það einhvern veginn að KR væri bara á krúskontról og langt yfir lengst af í leiknum í kvöld, en eins og þið vitið er Stjörnuliðið alltaf eins og hundur sem bítur í buxnaskálmina hjá þér og neitar að sleppa. Þeir eru alltaf þarna, þó þeir líti kannski ekkert sérstaklega út á köflum. Garðbæingarnir hefðu alveg getað tekið þennan leik með smá heppni, en hún var KR megin í kvöld.

Eins og áður sagði fór Martin Hermannsson á kostum í liði KR en auk hans var iðnaðar- og fagmaðurinn Darri Hilmarsson betri en enginn í síðari hálfleiknum.

Pavel okkar Ermolinski bauð upp á 13/15/5 leik en hitti skelfilega úr skotunum sínum (4-17).

Kannski að hann ætti að skipta aftur um númer við Martin, það er ekki sjón að sjá Pavel í treyju númer níu, þó guttinn beri númer fimmtán ágætlega.

Brynjar Þór Björnsson gegnir nú hlutverki súpersöbbs hjá KR og spilaði 22 mínútur af tréverkinu í kvöld. Lúxus að hafa svona mann á bekknum, en við veltum því fyrir okkur hvort hann er sáttur við þetta hlutverk. Á hann að fá fleiri mínútur - eða er hann kannski ekki búinn að vinna sér inn fyrir því í vetur? Ja, hvur veit.

Eins og venjulega var það Justin Shouse sem fór fyrir liði Stjörnunnar (26/5/9) og Matthew Hairston var sömuleiðis með 26/9.

Hairston þessi er nokkuð sérstakur leikmaður, gormur bæði og spóaleggur, en það á eftir að koma í ljós hvort hann er það sem Stjörnuna vantar í vetur.

Einu verðum við bara að koma frá okkur og það er gremjan yfir hlutverki Marvins Valdimarssonar hjá Stjörnunni.

Að okkar mati á hann að fá 70-80% af skotunum sem Jovan tók áður og vera grimmari í sókninni.

Marvin hefur alla burði til þess að skora miklu meira. Hann er alltaf að leita af félögum sínum og er það vel, en það er ergilegt að sjá hann hika við að taka skot sem hann á einfaldlega að taka sjálfur. Með fullri virðingu fyrir t.d. Fannari Helgasyni, á hann ekki að vera nálægt Marvin í skottilraunum undir neinum kringumstæðum. Marvin var stórskorari í 1. deildinni hérna fyrir nokkrum árum og þó við vitum að 1. deildin sé ekki úrvalsdeildin, er hann alveg búinn að sýna að hann veit hvar karfan er.

Látum Marvin skjóta meira.

Frelsum Marvin!

Myndir, jó! Smelltu.

Þetta er að byrja krakkar

Tweet

Enn einu sinni er körfuboltavertíðin farin af stað hérna heima á klakanum. Um leið og við heyrum boltann skoppa og ískrið í skónum, hefst fuglasöngur í hjörtum okkar því þá er stutt í jólin.

Við skelltum okkur á leik Stjörnunnar og Njarðvíkur í Ásgarði í vikunni. Þetta var leikur í Reykjanesmótinu og voru það heimamenn sem höfðu betur þó þeim gengi illa að hrista af sér baráttuglaða guttana úr Njarðvík.

Það er ekki tímabært að ræða strategíu eða spilamennsku í þessum leik, en það sem er ofar á baugi er að skoða leikmannamálin.

Stjarnan hefur endurheimt sjálfan Kjartan Atla Kjartansson í skotbakvarðarstöðunni og er það afar jákvætt. Ká Joð er óhemju jákvæður maður sem sómi er að fá aftur í úrvalsdeildina eftir að hann tók Riley-inn með FSu.

Sem dæmi um jákvæðni Kjartans má nefna að hann hefur ákveðið að leyfa Marvin Valdimarssyni að halda treyjunúmerinu sínu (4) og spilar því í búningi númer sjö í vetur.

Það er alltaf bræðrabragur á Stjörnumönnum og veturinn ´12-´13 verður engin undantekning.

Ekki er vitað hvernig verður með tvíburana í miðjunni, en það er gaman að geta þess að hinn efnilegi fyrrum FSu-maður Lil Marv er genginn til liðs við bróður sinn Marvin Valdimarsson í Stjörnunni.

Lil Marv heitir réttu nafni Sæmundur Valdimarsson, en mun að öllum líkindum ganga undir nafninu Lil Marv hér á síðunni þangað til hann treður yfir einhvern í leik.

Það ætti ekki að vera ósanngjörn uppástunga, þó bróðir hans sé enn feiminn við að troða nema í upphitunum. Þú sérð Marvin klappa yngri bróður sínum á kollinn á myndinni hér til hliðar.

Erlendur leikmaður Stjörnunnar er í okkar huga dálítið spurningamerki, en hann mun einmitt ganga undir nafninu Erlendur þangað til hann sannar sig.

Verður trúlega ekki eini maðurinn sem fær það gælunafn á haustmánuðum.

Eitt af því skemmtilegasta við haustleikina er að sjá hvernig ungu mennirnir hafa varið sumrinu.

Hafa þeir verið duglegir að æfa? Munu þeir bæta sig og taka við stærra hlutverki í vetur?

Okkur skilst að Dagur Kár Jónsson hafi gert meira en að tana sig og skerpa hárgreiðsluna í sumar og það verður óhemju áhugavert að fylgjast með pilti í vetur.

Þar er á ferðinni einn af áhugaverðustu ungu leikmönnum deildarinnar. Hann fær væntanlega stærri rullu hjá Teiti í vetur.

Hvað Njarðvíkurliðið varðar verður ekki auðvelt fyrir það að toppa síðasta vetur þegar það fór fram úr væntingum flestra. Þar á bæ eru líka margir vel þjálfaðir ungir og efnilegir piltar sem gaman verður að skoða í vetur.

Við fengum troðslu frá Marv (Staðfest)

Tweet

Það hefur myndast einhver hefð fyrir því að vera með kyndingar á Marvin Valdimarsson á Twitter og víðar af því hann er ekki nógu duglegur við að troða.

Sumir gengu svo langt að segja að hann gæti það ekki.

Einhverjir liðsfélagar hans eru sagðir hafa lagt undir að hann myndi ekki ná að troða í bikarleiknum við B-lið Stjörnunnar í gærkvöldi.

Það er skemmst frá því að segja að það var slæm hugmynd. Auðvitað laumaði Marvin inn einni troðslu.

Við höfum öll séð karlinn þruma honum niður í upphitun og það liggur fyrir krafa um að sjá hann smella fleiri troðslum í leikjum.

Það er búið að vera gaman að fylgjast með Marv í vetur. Hann er búinn að spila reglulega vel.