Við vorum að hugsa um að krota niður smá hugleiðingu um þá staðreynd að NBA deildin er búin að láta ljósmyndafyrirtækið Getty fjarlægja úr safni sínu mynd af Gilbert Arenas þar sem hann bregður á leik með félögum sínum í liði Washington og skýtur á þá með ímyndaðri skammbyssu.
En við nennum því ekki, af því þetta er svo óendanlega kjánalegt. Júróvisjón-kjánalegt.
Kannski álíka kjánalegt og að halda úti bloggsíðu með það göfuga markmið að birta eins margar photoshoppaðar myndir af Arenas með sjálfvirk skotvopn og hægt er?
--------II----------
Í stað þess að eyða tíma í að tala um pólítískan rétttrúnað í NBA deildinni, væri nær að tala aðeins um ykkur lesendur góðir.
Það er nefnilega þannig, að þrátt fyrir þá gríðarlegu neikvæðni, vænisýki og þunglyndi sem virðist nú tröllríða íslensku þjóðinni - hafa ótrúlega mörg ykkar gefið sér tíma til að setjast við tölvuna og senda okkur línu.
Póstunum hefur rignt inn og satt best að segja erum við hrærð yfir jákvæðni og hlýhug lesenda okkar. Okkur þykir miður að hafa átt það til að draga einhver ykkar í dilka með fólkinu sem gerir eitraðar athugasemdir á eyjunni.is, barnalandi og moggablogginu. Það var óréttlátt af okkur og biðjumst við velvirðingar á því.
Það er gaman að fá að heyra frá ykkur og þökkum við ykkur kærlega fyrir þann góða anda sem þið hafið blásið okkur í brjóst með bréfunum ykkar. Við reynum að svara þeim öllum eftir bestu getu.
Þú getur sent okkur línu með því að smella á tengilinn "hafa samband" á hægri spássíunni á síðunni.
Ef þú veist ekki hvað spássía er - er ólíklegt að við þurfum að heyra frá þér.