Það er gaman frá því að segja að okkur hér á NBA Ísland hefur borist fjöldinn allur af skemmtilegum tölvupóstum eftir að síðan var sett á laggirnar. Okkur þykir vænt um það. Það er gott að heyra að lesendur kunna að vel að meta framlag okkar.Sumir hafa spurt okkur hvers vegna við höfum ekki athugasemdakerfi á síðunni. Fyrir ykkur þarna úti sem eruð að spá í það, bendum við ykkur á að skoða athugasemdakerfið á Eyjunni. Óþarfi að útskýra það frekar.
Okkur á ritstjórninni þykir líka skemmtilegra að fá tölvupósta frá ykkur. Við kannski birtum bestu bréfin í framtíðinni.
Nokkrir lesendur vildu líka vita af hverju pistlahöfundar NBA Ísland skrifa ekki undir nafni. Svarið við því er einfalt. Við hér á NBA Ísland erum lið - og vinnum sem lið. Hér eru allir jafnir. Við erum öll NBA Ísland. Líka þið.
Þess vegna er ykkur guðvelkomið að senda okkur línu um hvað sem í brjósti ykkar brennur. Bara smella á "hafa samband" hlekkinn á hægri spássíunni.