Kapphlaupið um MVP styttuna hefur ekki oft verið jafn óspennandi og í vetur. James var kjörinn leikmaður Austurdeildarinnar alla mánuðina nema einn (þegar hann fór að hvíla og Melo hitnaði) og er nú kominn í ansi magnaðan hóp manna sem hlotið hafa nafnbótina MVP fjórum sinnum.
Þetta eru Jabbar (6), Russell (5), Jordan (5) og Chamberlain (4). James á nokkuð eftir í þrítugt enn þá og því mætti ætla að hann ætti nóg eftir ef hann sleppur við alvarleg meiðsli og nennir yfir höfuð að spila svona fast í deildakeppninni.
Síðasta rúma árið á ferli LeBron James er á pari við hvaða frammistöðu sem er í sögu NBA. Við vitum alveg að hann skilaði ekki 50/25 meðaltali eins og Wilt gerði hér áður, en við verðum að skoða það í samhengi. NBA deildin var aðeins öðruvísi fyrir hálfri öld síðan.
Hérna eru nokkrar myndir af kappanum. Við samgleðjumst honum sannarlega, enda er hann vel að þessu kominn pilturinn.
