Leiðin lá að sjálfssögðu í Ásgarðinn þar sem Stjörnumenn voru að frumsýna nýjan leikmann að nafni Jarrid Frye og stóð hann sig ágætlega.
Það gekk ekki þrautalaust hjá meistaraefnunum í Garðabæ að klára leikinn, því Fjölnisliðið barðist eins og ljón allan leikinn eins og þeir hafa gert í þeim leikjum sem við höfum séð með þeim í vetur.
Kannski var það formsatriði fyrir Stjörnumenn að loka svona leik, en þeir spiluðu dálítið þannig á köflum og menn geta brennt sig á því.
Þessi deild er svo jöfn að allir geta tapað leikjum ef þeir eru ekki 100% með hausinn í þessu. Sjáðu bara hvernig Skallagrímur fer í Þorlákshöfn og nær í sigur.
Það fór þó þannig að lokum að Stjarnan kláraði dæmið 95-87 og maður leiksins hjá okkur í kvöld (af því við gerum bara það sem okkur sýnist) var án efa Endurskoðandinn, Brian Mills hjá Stjörnunni.
Þessi skemmtilegi miðherji heldur áfram að terrorísera andstæðinga Stjörnunnar á báðum endum vallarins eins og sjá má á myndasamsetningunni hér fyrir neðan.
Hann lætur ekki mikið yfir sér þegar hann kemur trítlandi með skjalatöskuna og skallann, en svo treður hann í andlitið á þér og ver skotið þitt upp í stúku.
Talsmaður NBA Ísland hjá Stjörnunni segir að Mills hafi ekki hlotið náð fyrir augum tölfræðihaldara á Íslandi í vetur og verji mun nær fjórum skotum í leik en þeim tveimur sem skráð hafa verið á hann.
Menn draga það nú ekki í efa þegar þeir sjá svona tilþrif eins og hann sýndi í kvöld.
Ps - Við erum reyndar með bölvað samviskubit yfir því að vera að búa til veggspjöld með ungum og efnilegum leikmönnum, en svona ógæfu eiga þeir að nota sér til framdráttar. Taka betur á því á næstu lyftingaæfingu, borða rétt og mæta fljótari og sterkari í næsta leik.
