Úlfagleði

Þú tapar ekki mörgum leikjum þegar varaframherjarnir þínir spila eins og Derrick Williams og Michael Beasley gerðu í nótt. Úlfarnir þeirra gerðu sér þá lítið fyrir og völtuðu yfir Clippers á útivelli 109-97.

Það fer Úlfunum ágætlega að vera yfir 50% og vonandi halda þeir sér áfram á sigurbraut.

Ricky Rubio hefur sannarlega reynst liðinu happafengur og hefur pilturinn staðið undir öllu skruminu. Það má samt ekki gleyma þætti Rick Adelman þjálfara í velgengni liðsins. Hann setti sér að laga tvö stærstu vandamál liðsins þegar hann tók við taumunum - tapaða bolta og varnarleikinn.

Það hefur hann gert og Úlfarnir eru allt í einu komnir með fantalið og fullt af strákum sem eru ágætir í körfubolta. Sannarlega skemmtilegir hlutir að gerast í Minnesota.